ZISU ZERUSALE ANGIANA TAWHTA ACHU AWPAZY

1. Apachupazy “Alâ taw” a vaw chhi awpa ta bie a pie no ta, ahneituhpa chhao a pakhâ thei leina chhâpa cha “ABeipa ta a khohpa” (The Lord needs it) vâta a châ. Eima hrona, hneina, thaina nata taotheina zy ABeipa ta a hmâ khoh khiah tala pasai kawpa ta pie awpa maniah a pachu!

2. Zisu ta Zerusale angiana daihti he “Zawpakhô Ku” (Passover) daihti liata pachhyhpa ta a ngia tahpa Biehrai athaipazy ta ama reih. Chahawhta a pachhyh raruana cha, Izarei sawzy Izi seichâna tawhta ABeipa thatlôna ta vaw pachha papua ei ta, Kana râh a ngia kheipa ta khotalaina a pie ei. Cha Khazohpa pachhana rônahpa atheithlâhna ku cha, “Zawpakhô Ku” tahpa ta ama vaw cha-ô tyh. Cha hmo yzie mopazihna chôta, Zisu cha Zerusale khihpi châta khotalaina hmeiseihpa (pachhana kipa) pie awpa ta a vypa ABeipa a châ tahpa a vaw palâsa.

3. Khizaw pheisaihzy nata khizaw beipa zy hawhta pahniena arâ tôhpa chô liata kia leipa ta “alâ taw” chô lia kiapa ta “Adynana Beipa” (King of Peace) a châpa â vaw palâsa. Zerusale khisaw thokhazy deikua cha “Khizaw Beipa” (Ama khizaw râh padua heihtuhpa) châ ta, hnabeiseihpa ta a reithaipa ama y. Keimo zaw Zisu he kheita e eima pa bei sa?

4. “Reithaina nata Adyuna” cha a hnia ta ta a chakhiapa ta ama y rairi! Zawpi thokhazy reithaina ta Zisu ama dy ngânona chata, pharisai zy deikua cha reithaina pakhâ awpa ama haw. Awnanopa liata kheihawhpa kyh ta tlyma ABeipa reithai awpa a khohpa ama ypa hawhta, cha alyna a dyuhpa, a pakhâpa Sâta chhao a hnia ta liata a y tahpa a chu awpa eima hnei. Eima hrona liata reithaina a dyuhpa reipasaotuhpa a y.

5. Zisu ta Zerusale châta pachhatuh hmeiseihpa (Abeipa) a chânazie palâsa awpa ta a vaw ngia taraw cha, khihpi chhôh â vaw ngia hmeiseih na ta, a cha khei tahpa eima hmô. Ama duahmo hmeiseihpa a pahno pasia vâta a châ thlyu aw. Tanoh eima palôh liata Zisu a vaw ngia heih mawh sala, maniah a ly aw vama, maniah a cha khei thlah hr’aw vama? tahpa a mo pasia chyu si la. Chôpho ta Zisu a lytuhpazy châ lei si la, eima Beipa nata pachhatuhpa châta a pyh hmeiseihpa, eima hrona zydua biehnei awpa ta “ABEIPA” châna tovyuh a pietuhpa châ awpa tha a patlô heih suh vy.

Ei cha ly kaw ei.
Rev. Pahmo (LTC)