ZISU KRAWS ACHHYPALIENA (RESPONSE) CHI – 7
Rev. Pahmo

Zisu Kraws liata riethei a taona nata thina kha ta chyhsa nanopazy ta achhypaliena chi nano nano ama tao chyu. Keimo chhao Krista Kraws cha kheita eima chhypalie.

1. Rawma pheisaihzy
Pila beipa ta Zisu cha khaipâ awpa ta pasaina a pie tawhta, Rawma pheisaihzy ta Zisu cha “Hro pareih mah y, Zuzy Beipa” tahpa anaoh ei ta, hloh lakho pakhopa ta taolâna chô ta ama khaipâ.
Pawla ta, “Kraws bie cha leidia haipazy châta hruna châta, pachha haipazy châta hmotaotheina a châ,” a tah (1 Kawrini 1:8).

2. Pachârôh kheipa zawpi nata chanôzy
Zisu cha a kraws a pupa ama pasiesa no na kha ta, zawpi hluhpi nata chanô thokha zy vaw pazi laih ei ta, pachârôkhei ei ta ngiachhie tah ngai ta ei ta ama chakhei. Anodeikua Zisu ta amo lâ a vaw heih ta, “Zerusale sawchanôzy saih u, nâ chakhei khah u, nâmo nata nama sawzy châta cha teh u,” a tah hra ei (Lk 23:28).
Zisu rietheipa pachârôh khei awpa hlâta, keimo nata sawnahzy châta pachârôh awpa a peimawh via ngyu aw.

3. Kalili chanôzy
Zisu khaipâna daihti liata kô 3 chhôh a hnoh a zi tyhpa pachutuhpazy cha ama râ sai khai haw tahpa “Chatawhcha ama zydua ta ano cha pathluapa ta a râ khai haw ei ta,” (Mk 14:50) eima hmô. Anodeikua Kalili râh tawh chanô zy deikua cha Zisu cha a hla pi tawhta saipa ta ama ngâchhihna ama palâsa. Cha dei châ leipa ta, thyuheihna a pahnotua chaipa chhao kha chanôzy ama châ.

4. Kurini khihpa Saimaw
Zisu ta a pupa kraws cha a hri kawpa tho kraws a châ vâta kheihawhpa su tlyma a vaw tlô nata cha hmiala sie thei khao vei. Cha daihti liata Rawma pheisaihzy ta Zu chyhsa pakha – Kurini khihpa Saimaw – cha Zisu kraws a pu khei awpa ama papusa rarua (Lk 15:21). Saimaw cha reipasipasana hnei leipa ta vaw pu khei ta, Zisu riethei taona cha a vaw tao khei. He he ta Saimaw hrona he a panano haw ngyu aw. Saimaw he awnanopa thâtih liata moh a luah kawpa Alexander Rufus a châ tahpa eima hmô. Rawma 16:13 lia chhao ta Pawla ta Alexander nata a nô he ngachhihpa awnano sahlao moh liata a palâsapa eima hmô hra.

5. Moleipa pa – 2
Zisu ama khaipâ no kha a chavei nata chachâh lâta moleipa pa-2 chhao ama khaipâ hra. Pakha cha Zisu hnoh ta, nama a pachha la, keimo chhao maniah pachha bao, tahpa ta a reipachhie. Pakha deikua cha eima moleina vâta khaipâ tlâhpa a châ zie a pahno ta, “Zisu, na khihnarâh na tlô tita, nâ thei thlâh hâ mah y,” (Lk 23:42) a haw. Zisu chhao ta a hnoh ta “Hmeiseihta ta ei cha chho hi, atanoh he ei hnoh ta Paradi lia na y hra aw,” (43) tahpa pachhana a pie. Eima taocheina a pahnopasiapa ta Zisu kraws cha moh la pachhapa ta na y aw.

6. Pheisaih zakha hyutuhpa
Rawma pheisaih hluhpi ta Zisu cha khaipâpa ta ama taola. Zisu deikua a reipasia rai leipa ta taola reipachhiena cha thlalôhna ta a taopa a hmôpa Zenitaih pheisaih hyutuhpa cha ta, “He chyhsa he Khazohpa Sawchapawpa a châ hmeiseih tlai na,” (Mk. 15:39) a ngiapâna palei ta a reipapua. Eima khisa lâhpa hluhpi nata raihria lâhpa hluhpi hmia liata Zisu he Abeipa a châ tah thei a chhuah suh vy.

7. Arimathai khihpa Zawsi
Zisu cha a do lei ngaita ta pachiapa ta ama khaipâ no na khata pachutuhpa zy ama papha sai khai haw. Kao kha lata reipa khiah la pachutuhpazy chhao pachiapa ta ama y pathlei awpa ama chi vâta a châ. Anodeikua pachiana do leipa a chi tiarâh leipa pakha eima hmô heih. Ano cha Arimathai khihpa Zawsi kha a châ. Ano he Sandedrin ryureituhpa sahlao liata pakha chhao châta, zawpi ama paryhsapa chhao kha a ryh a tah rai leipa a châ hra (Lk 23:51). Zawpi hluh via ta a do ama tahpa chhao a do vei a tah ngâhpa a châ.
Ano chata Pila hnohta Zisu ri cha hiah ta, la ta poh râhpa ta pahly ta, ahy hmah ta ama pazia bei leina su liata Zisu ri cha a vaw pabu.
Cha daihti liata Zisu thina kha a palopasa chaipa thâtih châ ngyu aw ta, chyhsa hluhpi nata a pachai ta pachutuhpazy cha chipa ta ama chalyu ngana daihti liata Zisu ri pabu awpa ta riaphana a hneipa ngiapâna he a rônah hmeiseih.
Arimathai khihpa Zawsi ta Zisu ri kha vaw pabu vei mawh sala, thyuheihna daihti chhao khataih lâ ma ama tlua aw tahpa maniah a pachâsa ngasa.

Nâma zaw Zisu Kraws he kheita nâ chhypalie aw?

Ei cha ly kaw ei!
Rev. Pa Hmo