Pâra MEC Local Church liata taopa Mara Evangelical Church, General Assembly ei 44 na liata pathlupa bie hria pazi awpa nata Mara Evangelical Church in America (MECA) vai awpata USA lâ a siepa Rev. Satu Veu (General Secretary, MEC) cha September 2, 2015 nohta China Airlines ta Yangon-Hongkong-Los Angeles,  Los Angeles – Denver (MECA Pakhypa a y nawpa su) la America Airlines ta a zaw ta, Denver khipi cha September 2, 2015, Za daw 10:00 pm ta atlô.

Denver International Airport lâ va dypa zy na ta

September 4 noh ta khizaw liata tlâh moh pathapa Rocky Mountain, Rev. NC. Vabeilua, Rev. Cho U nata Visa thokha zy chhaota ama mo. September 5 noh ta MECA Pakhypi ryureina a hlaota, GS ano pohpa tlaita ryureina a hlaopa vata ryureituhpazy thla a palo hleikho ta pachâna phapazy thyuta, chadei châlei pata MEC Assembly vyupa ta ryureina a hlaopa achâpa vata  achô liata MECA ta alyna thata a hnei.

Ryureina dyuchhai liata achali kawpa ta a tyu thlahapa Rev. Satu Veu (GS, MEC)

September 6, 2015 (Sunday) noh my a pakhyna service liata Pro. Pastor pa 2, Pro. Pastor Hietha nata Pro. Pastor Mara Hrato zycha Pastor pitlohpa châ awpata chahnaona chakaona hnei ta, September 6, 2015, za a pakhyna service liata Km. Dawhlo (MEC, Colorado), Km. Sahmo, Km. Bietlei (MEC North Carolina zycha Awnanopa Macha châ awpata chahnaona chakaona chhao a hnei.

Pakhyi a chhâ khai tawta MEC Colorado liata chakaona hnei pazao ta, September 16, 2015 noh ta MEC North Carolina lâ asie aw. Charlotte liata hata eikha y awta, MEC Georgia lâ asie aw. Georgia tawta Maryland lâ sie hei awta MEC Maryland liata hata eikha a y khai tawta Indiana lâ a vaw aw. MEC Indiana liata chakaona hnei pazao awta, Evangelical Lutheran Church in America office liata a hriapa nopaw thokha nata Awnanopa raihria kyh nata azaopa ta atyhna (ahmona0 chhao a hnei aw.

MECA liata a y chhota MECA awnanopazy nata Khazohpa bie nata hla ta a kaona hnei awpa nata, Awnanopa chhituhpazy chata Leadership training tao awpa he a chhua chaipa acha.  Abeipa ta ary ata khiala October hata eithona (third week) liata Myanmar lâ alie awpa ta achhuana a hnei.