Mara Evangelical Church in America, MEC Tennessee local church liata biatuhpa rai a hria ngâhaipa nata Church Council Education Department liata Secretary a hria ngâhaipa Rev. Caleb (Official moh: Rev. Ngo Chho) cha May 1, 2023 (Hriatuanoh) noh ta Emmanuel Theological Seminary tawhta Mastor of Theology (M.Th) degree a vaw la theipa vâta byhna a pietuhpa Khazohpa hnota nata awnanopa sahlao nata chhôkha zy khâsia pâna chôta he hawhpa degree rônah kawpa avaw hmô theipa Pastor chô liata MECA awnanopa ta alyna bie eima rei.

Rev. Caleb he Mara Evangelical Church in America pastor mo 6 hry pakha châta ta, a panawhna hro a hneipa, Khazohpa a chipa, nata chakaona rai liata nata achuna liata ngâchhihpa nata tiama hro ahneipa acha. Ano he MECA Pastor zy hry liata USA achuna Institute sâkha tawhta degree ala tuachaipa acha. Hlaotlona byhna a topa cha a ly khei pita Khazohpa ta a chakaona raihria liata hmâvia lyma sala byhna pie rili mawh sy tapata khokheina sachaipa eima hlâ.