Kôkha ta eikha patlô tyhpa Mara Evangelical Church in America Pakhypi Ei (9) Na cha September 2-3, 2023 noh ta “Khazohpa Rônahna Palâsana Hro” (1 Kaw. 10:31) tapa biepipa hmâpata MEC Maryland Local Church liata patlôpa achâ aw. Pakhypi chhôta Abeipa Zisu achhyna apakhyna service ei (4), September 2, 2023 (Pachynoh) noh ta ei 2 (nohchhô nata zâ apakhyna), September 3, 2023 (Pahanoh) noh ta ei 2 (nohchhô nata zâ apakhyna) hneipa achâ aw. September 2, 2023 (Pachynoh) nohchhô ta MECA Church Council ryureina meeting hneipa achâ aw.

Apakhyna service zy liata speaker châta a pahawhpa zy cha Rev. Auko Choza (MEC Georgia biatuhpa), Rev. Caleb (MEC Tennessee biatuhpa nata church council education secretary), Rev. Daniel T. Hietha (MEC Indiana biatuhpa, church council mission secretary nata treasurer), Rev. Dr. Chou Hlychho (MEC Maryland biatuhpa, church council secretary) zy châ eita, local church sâkha tawhta hlapy sakha nata solo sakha chyuta Abeipa reithaina hla sa awpata a pahawhpa ama châ. Chahleikho ta Evangelical Church of Maraland awnanopa member zy achâpa Pupa John Beizachhi Phuto, Ls. Fc. Nipar, nata Ls. Jessica Ngody Hlychho zycha Pakhypa a hlao awpata hruapa châ eita, Abeipa reithaina hla sana chhao ama hnei awpata a pahawhpa ama châ.

Baltimore khipi, Maryland state he Mara Evangelical Church a vaw dua tuana su châta, July 4, 2010 noh ta paduapa achâ. 2016 kô liana khata MECA church council pakhypi eikha vaw patlô ha eita, September 2-3, 2023 noh ta patlo awpa he a einona ama patlôna awpa acha.

Mara Evangelical Church in America church council chhithana ry liata MEC local church sa 8 yta, 2014 ko tawhta pathaopa ta church council pakhypi nata ryureina vaw hneipa châta 2020 kô (covid 10 hri vâta tao theipa châ vei) ta deileipa ta cha kôkha ta eikha tao thei lymâpa achâ. Takô 2023 kô ta patlô awpa he a Ei (9) na achâ.