MEC Local Church sa 6* ta taopa Mara Evangelical Church in America Pakhypi (3) na cha MEC Maryland liata September 3-4, 2016 noh ta tao awpa acha. September 2 noh (Friday) ta khichhai tlô-aw eita, September 5 (Monday) noh ta khichhai ama pai aw.

State hropa lâ tawta Pakhypi a hlao awpata mokhâhpa khichhai zydua cha mo 250 nata 300 likaw cha eita, khichho malu mo 200 hlei, zydua mo 500 ta Pakhypi ei (3) ama hlao aw tapa Pakhypi Board tawta thatih daopa acha.

MEC Myanmar tawta nopawpa mo 2, Rev. Dr. LB Siama (GS, MEC) nata Rev. Dr. Bizo (MEC Yangon biatuhpa) zyta MECA Pakhypi Ei (3) Na, ama hlao aw tapa thatih daopa achâ vata USA Mara awnanopa zy ama tha a paw (ama ly) ngasa.

MECA Pakhypi Ei (1) Na cha 2014 kô liana khata MEC Indiana liata taopa châta MEC Myanmar tawta Rev. Sitlo (Moderator) ahlao theita, 2015 ko, MEC Colorado liata taopa Ei (2) na Pakhypi liata Rev. Satu Ve-u (GS, MEC) nata Rev.  NC Vabeilua (Fmr. Moderator, ECM) zy ama hlaothei. Pakhypi atlôna maita Mara rah tawta nopawpazy ama hlao thei lymapa he MECA awnanopazy byhna tona sakha acha.

MECA pakhypi ei (3) na he hlaotloh kawpa ta nata Abeipa Zisu moh rôhnahna alâna acha thei nawpata Abeipa Khazohpa hnota thlachha khei chyu bei su vy.

Pakhypi a hma chhôta Abeipa Zisu achhyna a pakhyna ei 4 hneipa châ awta, cha a pakhyna service zydua cha râhto liata a ypa Mara awnanopa zydua mothei awpata youtube tawta Stream Live pathliepa acha aw. Mo nawpa su deikua a daihti a hniavia tawta pahnosapa acha aw tapata Pakhypi Board tawta thatih dao chaneipa acha.

*Ary liata MEC Local a duana khi nata State zy palasapa acha.

  1. MEC, Baltimore, Maryland State (Biatuhpa: Rev. Cho U)
  2. MEC, Charlotte, North Carolina State (Biatuhpa: Rev. Mara Hrato)
  3. MEC, Indianapolis, Indiana State (Biatuhpa: Rev. T. Hietha)
  4. MEC, Denver, Colorado State (Biatuhpa: Pro. Pastor Caleb)
  5. MEC, Atlanta, Georgia State (Biatuhpa: Pro. Pastor Auko Chozah)
  6. MEC, Des Moines, IOWA State (Biatuhpa hnei ma vei)
baltimore

Za ta Baltimore khipi downtown (khichho chaipa) ala dah acha.

church1

MECA Pakhypi ei (3) na a hma nawpa su: 200 Melvin Ave, Catonsville, MD 21228

church2