MECA EC Meeting Ei (4) na MEC Iowa liata Hnei

Mara Evangelical Church in America, Church Council Executive Committee Meeting ei (4) na cha Iowa State, Des Moinse khipi liata April 15, 2017 noh ta taopa acha. Meeting tao nawpa su nata Meeting a vaw hlaopa MECA awnanopa nôpawzy tlô nawpa su cha MEC IOWA awnanopa ta Hotel pha ngasapa (Days Inn) a hlâpa eita, cha liata thlalôh kawpata Abeipa moh ta Meeting cha ama hnei.

Church Council nôpaw Htp. John Kha-u(Chairman ), Htp. Meipaw Aung Shwe (Vice Chairman), Rev. Auko Choza (Secretary), Htp. Za Hu (Assist. Secretary), Mc. Henry Ngochho (Finance Secretary) nata Church Council Executive member achâpa local church to tawta Hyutuhpa nata secretary zy, zydua mo 19 ta meeting cha ahlaopa acha.

Htp. John Kha-u (Chairman) tawta chibai abuna nata bietana bie pachhopa reina hneita, Rev. Auko Choza (Secretary) ta 2016 ko MEC Maryland liata taopa MECA Pakhypi ei 3na ryureina bie pathlupazy reina nata saipazina nata MECA awnanpa statistics reportna a hnei khai tawta Agenda zy pachiana hneipa acha. Awnanopa hmasie nawpata agenda phapa hlupi pachiana nata bie chhawna zy hnei khai tawta Meeting cha Abeipa hnota alyna hlana thlachhana hnei pata pachhapa acha.

Bie pachiapa hlupi hry tawta zawpi pahno awpa ta palâsa khohpa sakha cha Pastor a hnei mah leipa Local Church zy mohona thatih reipa châta, a ry liata palâsapa hawta bia raipa acha. MEC Texas cha MEC Maryland bia liata sopa châta, Rev. Chou Hlychho ta a vao aw. MEC Iowa he MEC Indiana bia liata sopa châta Rev. Daniel T. Hietha ta a vao aw. MEC Kentucky he MEC Georgia bia chho liata sopa cha Rev. Auko Choza ta a vao aw. Pro. Pastor Caleb Ngochho chakaona su MEC Tennessee cha MEC North Carolina biatuhpa Rev. Mara Hrato ta Abeipa tlakhai a rai tyh awpata parysapa acha.

North America liata MEC local church sa (8) yta awnanopa malu zydua cha 980 acha. He he March, 2017 MEC Assembly lâta report piepa base pa châta Report pie khai tawta a poh viapa malu pahlaopa cha mah vei.