Chin Peace & Reconciliation Meeting thatih

Chin State liata apahrapa chipho sakah nata sakha likaw liata adyuna zy tlô pathao ta, cha a dyuna vâta chipho sakha nata sakha ahnia viana hlâta ahla viana, a pôkhana hlâta achhai viana atlô lyma bapa vâta, Chin State liata adyhna a charei thei awpa he USA râh liata a pahrâpa Chin Awnanopa Nopaw zyta ama kho chaipa nata thla ama chha khei chaipa achâ. Chavâta Chin State liata adyhna acharei thei nawpata Chin Baptist Church USA nôpaw zy nata Chin Baptist Association of North America nôpaw zyta 2024 kôthao tawhna khata Chin Peace and Reconciliation Initiative tapa py padua eita rai ama vaw hria pathao.

Châhrasala amo py 2 saita raihria pata adyhna hmeiseipa tlo thei aw vei, chihropa awnanopa phupy zydua chhaota hriapahmao awpa abyu tapa ama pahnopa vâta Chi hropa awnanopa chhao hruapata Indianapolis khi liata Oct. 1-2, 2024 noh ta Adyhna a y thei nawpata kheita ma hma la ei sila, eima hria aw tapa kyh rei awpata Meeting taopa achâ. Cha meeting ahlao hra awpata Mara Evangelical Church in America chairman Rev. Dr. Chou Hlychho nata Executive Secretary Rev. Hietha Tuza zy hruapa cha eita, meeting cha amâ hlao thei hra. Meeting a hlao theipa zydua cha mo 23 pha eita, a hlao theipa awnano phupy zy cha:

  1. Chin Baptist Association of North America (Falam based Baptist) tawhta mo 6
  2. Chin Baptist Church-USA (Hakha-Thatla based Baptist) tawhta mo 5
  3. Mara Evangelical Church in America tawhta mo 2
  4. Matu Christian Church tawhta mo 2
  5. Lutuv (Lautu) Church of America tawhta mo 2
  6. Zotung Chin Baptist Association tawhta mo 1
  7. America Zotung Christian Association tawhta mo 2
  8. North America Mizo Christian Fellowship tawhta mo 2 nata
  9. Myanmar Christian Assembly tawhta mo 1

Hriapazi awpata ama reipa zy

Meeting a vaw hlaopa nôpaw zyta adyha a y thei nawpata Chin State liata phupy zy, Chinland Council & CNF/CNA, ICNCC & Chin Brotherhood, nata Mizoram sawkha nôpaw zy anano ta atyhna hnei awpa châ sala, adyhna nata azaopa palô phaozy nata a dy thei lei awpata a pakhâpa ama hneipa thatih zy achu awpata parysapa achâ.

A rai kaw hriana dei cha Chin Peace and Reconciliation Initiative nôpawzy ku liata pahniepa achâ. Abeipa eima Khazohpa ta Chin State liata a dyhna vaw patlôsa ha bei mawh sy.