KRISTA ZISU KRAWS BIEZY
Zisu Khaipâ Noh (Good Friday)

By Rev. Pahmo

Biehmiapa

Kraws liata chyhsa moleipazy khaipâna he Phônisia chyhsa zy ta ama vaw hmâ tua chai. Chatawhta, Krika chyhsa nata Rawma chyhsa zy ta ama ryureina pabohsa nawpa châta amo âdyuhtupa zy cha Kraws liata ama khaipâ tyh hra. Kraws liata khaipâpa chyhsa cha thi charâ leipa ei ta, ama khaina hmah zy cha pasa ngâsa ta, dusaw ta ta ama thi tyh.

Chatawhta kraws liata khaipâna taihta a moleipazy cha alei liata ama thi awpa chhao a phuh leipa hawhta pachâpazy ama châ. Ama ri zy cha avâ pavaw zy ta nie sala, thlâsu chhao hnei lei awpa ta khaipâpa chhao ama châ hra. Chahawta riethei chhihzi nata tao a ru zi zy, thina hry liata nohâh y lei chaipa a châpa chhao ta, moleina ry liata a ypa chyhsazy chatlai papua nawpa nata pachha papua nawpa ta “Kraws liata thina tovyuh chhiepa cha” Krista Zisu ta â vaw tlyh. Moleina chhiesana tawhta pachhapa ta eima y thei nawpa ta kyhpachâna ta riethei a tao. Chatlaina mâ a ru rima cha!!!

“Khaipâ Noh” ahmâna liata Krista Kraws yzie he kao 4 ta pachâpazih tua si la,

1.  Khazohpa kyhpachâna palâsana
2.  Molei chatlaina Kraws
3. Siana ta pachiana Kraws
4. Moleina châta hlâpa chhazaw atheihna

1.  Khazohpa kyhpachâna palâsana

Hmô thai leipa Khazohpa cha a chyhsazy kyh a pachâna palâsa nawpa ta keima kakuapa ta vaw pi ta, eima hry liata a pahrâ. Cha dei châ leipa ta kyhpachâna âsâh chaipa – mohropazy vyuhpa ta hro a piena – ta maniah a thi kâ. Rawma 5:7-8 liata “Chyhsa siapa vyuhpa ta thi awpa chyhsa ta kho chhei ha tlô lei kha ta, chyhsa phapa vyuhpa ta deikua cha chyhsa ahy tlyma chhâta cha a ngâ ngyu ma. Chahrasala Khazohpa chata a kyhpachâna cha reithai tlâhpa ta paluahsa ta, moleipa eima châ nota Krista eima vyuhpa ta a thipa vâna kha ta.”

Kraws cha a sawchapawpa tlai chhao pahlôh lei ta maniah a chatlaipa Khazohpa kyhpachâna palâsana su, paluahsana su a châ hmeiseih. Reih nah kah ta palâsa thaina hlâta âsâh viapa kyhpachâna taozie a châ. 1 Zh 4:19 liata “Ano ta kyh maniah a pachâ vâta, a kyh eima pachâ.” Moleipa eima châ no chhao ta, kyh maniah a pachâ. Krista Kraws cha Khazohpa kyhpachâna ngiana, hmôthai nawpa su a châ. Chavâta cha Khazohpa kyhpachâna cha keima/nama chhao kheihta eima chhy lilaw hra aw? Khazohpa kyh eima pachâ hra awpa a châ.

2. Molei Chatlaina Kraws

Kao kha lâ tawhta ‘Kraws’ cha chyhsa moleina zydua vyuhpa ta Zisu Krista hrona a piepa ta maniah a chatlaina su a châ. “… chyhsa hluhpi chatlaina awpa ta a hrona pi awpa ta a zupa châ tlô ta, tah ta,” Mk 10:45. Eima moleina mâ cha Kraws liata piepa a châ. Pawla ta, “… mâ ta chaleipa nama châ haw mâta. Chavâta nama pôhpa liana châta Khazohpa palyupalih teh u,” 1 Kaw 6:20. Krista Zisu thisaih ta chaleipa/chatlaipa eima châ.

Kraws ta moleipa eima châpa a palâsa. Ngiapachhina ta Khazohpa lâ kua heih awpa maniah pahnosa heih. “Charasala ano cha eima taopasinazy vâta hmah phaopa ta y ta, eima hmoparaonazy vâta thi padôpa ta y ta; eima thlalôhna awpa ta chhoreina cha a chô liata tlah ta, a chheina hreichheipazy ta patlâhpa ta eima y haw,” (Is 53:5). Moleina tawhta khotalaina cha Krista Zisu Kraws liata a thina tawhta eima hmôpa a châ.

Thokha pi cha Kraws he a thei tlâ khao tyh leipa pi ta, chatlaina mâ ru zie chhao pachâ beih khao mapi. Hrosopa Zeremiah ta “… ahyhma ta, ‘Khapa ma ei tao haw tly? tahpa ta ama hmoparaona ro hra veih ei …,” (Zer 8:6) a tah. Krista khaipâna a theithlâhna chô ta, “Ei paraonazy he pahno haw tlô na ta, eima moleina he ei hmiakô liata khâ y ta, Na chô liata, nama dei chô liata, ei molei haw, na mohmô liata hmo moleina tao haw na ta …” tahna chô ta, Abeipa lâta ngiathaina ahaw heih awpa Hlazy rotuhpa ta maniah a pachu, Hla 51:3-4.

4. Siana ta pachiana Kraws

Chyhsapa cha Khazohpa ryhpa (biepiepa) zyh leina/paraona vâta moleipa a châ haw. Cha moleipa chyhsa cha Khazohpa pachiana siapa khôkhâh theipa châ rima vei. Chavâta thai lei pachâsana a hlao tlâhpa a châ. Cha thai lei pachâsana zydua cha moleipazy vyuhpa ta Krista Zisu chô liata a tla. Pawla ta “Moleina hlao cha thina châ tlô ta, Khazohpa hmosaipipa deikua cha eima Beipa Krista Zisu zawzi ta chhâzaw hrona a châ,” (Raw 6:23).

Moleina a hnei leipa tlai cha, moleipazy vyuhpa ta pachiana pahlaosapa a châ. “Ano liana chata Khazohpa siana eima châ thei nawpa ta, moleina rai a pahno leipa cha, Khazohpa ta keimo vâta moleipa hawhta tao ta,” (2 Kaw 6:21). Hebrai rotuhpa ta “… thisaih palo leipa ta molei ngiathaina rai y vei,” (Heb 9:22) a tah. Keimo thatlôna, pahnona, taotheina, hneina rôhna zy ta khôkhâ thei rimapa a châ leipa, Khazohpa pachiana siapa tawhta Krista thisaih ta maniah/eina chatlai haw tahpa atheina chô ta, Khazohpa châta hmopha tao awpa, chyhsa chô ta hmopha tao hra awpa he eima taovyuh nata tovyuh chhao a châ.

5. Chhâzaw atheina hlâna

Moleina vâta Khazohpa nata chyhsa azaona rao haw ta, cha azaona tao heih thei nawpa châta ‘Atheina ryhpa” cha Mawsi liata piepa a châ. Anodeikua “atheina” he ta moleipa cha chhâzaw hrona pie thei vei. Krista atheina deikua cha chhâzaw ta â daih paki. “Hmohlâpa miakha deitata pathaisa chipazy cha chhâzaw châta paki hâ tlôh ta,” Heb 10:14.
Eima chhâzaw thaichâna cha Krista Kraws liata a châ. Eima moleina hluhzi he sahro thisaih ta hlâ tiah rima lei awpa châta, cha chhao rai ta moleinazy pahlei thei vei. “Raopa ta hlânazy nata molei châta atheinazy liana cha alyna rai hnei va chi,” Heb 10:6.

Biepachhâna: Keimo nohto Kraws

Ngiapâna hro he sapa khotalaina ta hrona he châ vei. Krista Zisu lâthlô a chhihna he tlao a châ. Chatawcha Zisu ta a pachupazy hnohta, “Ahyrai ta na zi khohpa ta cha, ama rietheina papeisa leipa ta, kraws pupa ta na zi se,” Mt. 16:24.
Maniah chatlaituhpa Krista moh ta pasa tao hra awpazy, riethei tao hra awpa zy he tovyuh rônahpa tlao châ vei ma? “Krista vâta ano nama ngiapâpa dei cha leipa ta, ano vâta pasa nama tao awpa chhao pasaipa cha tlô ta,” (Phil 1:29). Krista moh vâta riethei tao awpa, pasa tao awpa he ‘eima kraws” cha a châ.

“Kraws a pu” tahna yzie keimo nohâh y nawpa, lôhrâ tlô nawpa, mopha nawpa vâta riethei taona châ vei. Krista Zisu moh rônah nawpa châta hrona, mohropazy pha nawpa, thlalôh nawpa, padua nawpa châta hrona zy tlao a châ. Khazohpa khohzie nata a chakhiapa sapa châna, khohna zy mao-oh na, riethei taona chhao a châ hra. Zisu moh eima dua kheipa vâta reipachhiena, riethei taona, a pie pasaina, hneina a pahryhna hawpa zy he aly kawpa ta tao ei si la. Krista Kraws bie he zakhei leipa ta phuah si la, a pachhana rônahpa vâta lyna bie khâ hlâ ei suh vy.

Khazohpa ta Abie byhnâ pie mawh sy! AMEN

____________________________

Rev. Pahmo cha Mara Evangelical Church Pastor zy hryta pakha châta Lorrain Theological College and Misssion Study Center liata Academic Dean kô 2 a hria khai tawta tahma Trinity Theological College, Singapore liata M.Th (New Testament) achu ngahaipa nata MEC, Singapore biatuhpa acha. Article,”Krista Zisu Kraws Biezy,” aropa hma thei awpata pasaina mia a piepa vata achô liata marachurch.org ta alyna bie a rei. Achuna nata achakaona liata Khazohpa ta byhna pie sala chhitha mawh sy tapa he marachurch.org thlachhana acha.