Khapa vata Paha Noh ta Khazohpa eima chhy?

Biehrai Thiehpa daihti liata awnanopa hlupi ta Sabbath noh he cha-ô khao leipa eita Sabbath noh (Saturday) vyuhpata Sunday noh, nohsarinoh noh hmiatua chaipa noh, Abeipa Zisu thyuhei noh he Khazohpa achhyna noh ta ama vaw hmâ haw.

Achhâpa cha Biehrai Paropa daihti liata cha-ô cheingei awpa achâzi, Mawsi ryhpata â hnaw hapa kha Biehrai Thiehpa daihti liata â ngiah khao leipa hawta pahnona vâta nata ryhpa a kina cha Abeipa Zisu a châna nata ryhpa pietuhpa cha ABeipa Zisu achâ tapa pahnona nata ngiapâna vâta acha. Abeipa Zisu ta, “Sabbath châta chyhsa taopa châleipata chyhsa châta Sabbath taopa achâ,” atah. (Maka 2:27).

Biehrai thiehpa liata nohsarinoh he cha-ô khao leipa ula, nohsarinoh noh hmiatua chaipa noh he cha-ô ba awpata reina y taraw leipata hmiatua awnanopa zyta a hmaopakhy noh, Khazohpa a chhyna noh ta ama vaw hmâ lai hapa vâta awnanopa hlupi ta he noh he Khazohpa achhyna noh ta ama vaw hmâ pazao laipa achâ.

Chyhsa mo thokha tacha Sunday noh ta achhyna he AD 321 Constantine daihti tawta â vaw thao ama ta. Achhâpacha ano he Rawma sawkha bie hneina râh liata Kri azypa Rawma beipa châta, Rawma sawkha biehneina râh zydua Kriszyna rah ta a pachâsa hapa achâ hleikho ta Sunday noh he a râh chyhsa zy apaha noh ta a vaw tao hapa vâta achâ. Châhrasala Awnanopa hlupi ta, cha cha apy leipa eita ary liata palâsapazy chô liata achopata Sunday noh he Khazohpa achhyna noh ta ama vaw hmâpa achâ.

Nohsarinoh noh hmiatua chaipa noh he Biehrai liata he hawta hmôpa achâ.

  1. Abeipa Zisu thyuthei noh nata Aluah noh (Zawhana 20:1, 20:26).
  2. Thlahpa pathaipa tlô noh  (Hmo. 2:1).
  3. Zisu pachhana Thatihpha reitua chai noh  (Hmo. 2:14),
  4. Zisu a ngiapâpazy Bâti ama châ hmiatua chai noh (Hmo. 2:37).
  5. Trosa khi liata Pawla cha Noh sarinoh noh hmiatua chaipa liata Thatihpha bie reita, Abeipa chhôkha pati chhao niena ahmâna hnei (Hmo 20:7).
  6. Nosarinoh noh hmiatuapa liata Kawrani awnanopazy a hmaopakhy tyh eita,  Zerusale mo rairuna pathlâ khei awpata Pawla ta amocha sôh thyupakhy awpata a chho ei (1 Kaw. 16:2).

Biehnaw:

  1. http://www.christiananswers.net/q-acb/acb-t007.html,
  2. https://carm.org/why-do-we-worship-sunday-instead-saturday,
  3. http://baptistbulletin.org/the-baptist-bulletin-magazine/why-worship-on-sunday/