Ei (5) na Mara Evangelical Church in America Pakhypi  cha Atlanta khipi, Georgia State liata August 31, 2018 (Chutynoh) tawta pathao pata September 2, 2018 (Pahanoh) ta Abeipa ngiachhiena vâta hlaotlôna byhna hlupi tona chôta pachhâ hawpa acha.

Pakhypi ahlao theipa malu 517 (khichhai 357, khichho 160) pha eita, Pakhypi ryureina a hlaopa zydua 65 ama pha. Myanmar tawta MEC Assembly nopaw Rev. Victor Veu (AGS) nata Rev. Zahne (ES, Social and Culture), Yangon MEC tawta KNP chhituhpa nata EC member zy mo 6, MECA Pastor mo 5, MECA Church council adviser Rev. Sikhaw (Ph.D Candidate, Lutheran School of Thelogy, Chicago) nata Saya Elaisa Vahnie (Executive Director, Burmese American Community Institute) zy Pakhypi cha ama hlao thei.

September 2, 2018 (Pahanoh) noh ta Pastor pitlohpa chahnaona, Pro. Pastor pa-ina nata awnanopa machâ chahnaona hneipa acha. Chazy cha ary liata palâsapa acha.

  1. Pastor pitlohpa ta chahnaopa: Pro-Pastor Caleb (MEC Tennessee biatuhpa)
  2. Pro. Pastor chata pa-ipa: Saya Khaitha (MEC Texas)
  3. Awnanopa Macha chata chahnaopa zycha
    1) Km. C. Biehmo (MEC Maryland)
    2) Km. William Vemau Khaimie (MEC Indiana)
    3) Km. Sathau (MEC Indiana)
    4) Km. Rakua (MEC Iowa)
    5) Km. Biehne (MEC Tennassee)

Pastor chahnaona nata pa-ina cha Rev. Victor Veu (AGS) ta chakaona hneita Rev. Auko Choza ta awanopa macha chahnaona a hnei. Ahmâna daihti chhôta Thatihpha bie a reituhpa zyta “Bie hmeiseipa vata ngiapana liata aduana” (Zawhana 8:30-32) tapa biepipa hmâ pata thatihpha bie rei eita, pakhypi a hlaotheipa zawpi zy ngiapâna palo ama pathyu hmeisei.

2018-2020 term châta MECA Church Council nopawpazy atlyna hneipa châta a tlypatlôpa zycha

  1. Chairman: Mc. Aung Shwe
  2. V-Chairman: Htp. Bie U
  3. Secretary: Rev. Chou Hlychho
  4. Assistant Secretary: Htp. Za Hu
  5. Treasurer: Rev. Caleb zy ama cha.

MECA Pakhypi Ei (5) na achhuadypa Atlanta khi liata a pahrapa Mara awnanopa zydua hnota alyna bie Abeipa Zisu moh ta rei pita, Abeipa ta byhna pie ei sala, a khi nah râh châta hmâ via lyma mawh ei sy. MEC Indiana ta ei (6) na pakhypi ama phaopa vâta Abeipa ta a ry atakhiala MECA Pakhypi (6) na cha MEC Indiana liata patlô awpa acha.