Amarica râh liata MECA awnanopa a vaw dua tawta kô 9 vaw pha haba taraw ta pastor zy MECA church council meeting lia zyta ama tyhpa ta deileipa tacha pastors conference he tao tlâ leipa acha.
Chacha MECA church council ta a pha taleipa ta chakaona liata hmasie via thei nawpata pastor zy conference tao awpa a pha tapata a pahnopa vâta Ei (5) MECA EC meeting ta September 7, 2019 noh ta pastors conference tao awpa châse tapa nata resource person châta Rev. Dr. LB Siama (GS, MEC) la awpata bie a vaw pathlu.
Church Council ryraona cha Abeipa ta ary a takheipa vâta Rev. Dr. LB Siama chhao cha Ei (6) na MECA Pakhypi a hlaona daihti nata â vaw su lachhopa vâta conference cha ano GS pohpa chhitha pata September 7, 2019 noh ta MEC Maryland liata taopa acha.
Pastors conference ahlao theipa zycha mo pa 8 pha eita, MECA Pastor mo 6 nata MEC Myanmar tawta mo 2 (Rev. Dr. LB Siama nata Rev. Bietlei) zy ama cha.
Rev. Dr. LB Siama ta paper present reita, “pastor châna liata pahno awpa a peimawhpa hlupi a ypa hry liata he leadership model sa 3 he pahno cheingei awpa abyu” tapata a rei. chazy cha:
- Mawsi chhithana dah
- Nehamiah chhithana dah
- Zisu chhithana dah
GS paper rei khai tawta pastor zyta ama chakaona experience nata hmiala MECA awnanopa châta ama sadu thliena bie zy rei pahmaona zy hnei eita za daw 5:00 pm ta conference cha pachhâsapa acha.
MEC Maryland ta Pastor zy ama tyuduana rypao thei nawpata, St. Pheitha ta mypati (breakfast) ama nie awpa nata Pupa Chôhresa paw nata Pino Chôhresa no chhôkha nohchho pati (lunch) paha kawpa ama o liata ama chhuady thei chyupa vâta pastor zyta ama lyna ama chô liata a ma palâsa hmeisei.
0 Comments