Biehrai Rei Peimawzie

Rev. Vazilai

Biehmiapa

Pohpa liata peimawpa hlupi a y aw. Eima sapa abohna, eima sapa chata a ngiahpa niedo, chysia, O nata lyu, sona, tlana hpz he a cha. Pohpa chata a ngiahpa niedo chakahna rairuna nata phahlana eima tyh hliekho ta Thlahpa lata chakahna eima tyh awpa he kho a chhih leipa a cha. Thlahpa lata chakahna he Thlahpa lata thielahpa a yna su liata eima pamoh kho leipa vata a cha aw. Thlahpa lata patie nie awpa y thlaha ta chakahpa eima chapa he a pasa kaw ei tah. Thlahpa lata Thatihpha eima chakahna pabie awpa ta tao awpa hlupi a y thei aw. Chazy hry ta Peimaw chaipa cha Biehrai rei awpa he a cha. He Chapaw lia ta Khazohpa Bie nata Biehrai he ei hma pahlao lyma aw.

Biehrai y zie

Bible he Khazohpa Husohthlupa Chabu Pathaihpa tahna a cha. Biehrai tahpa cha “Testament” tahpa chata ‘Testementum’ tahpa Latin reih tawhta a vyhpa chata a yzie cha Biehraina tahpa a cha. Khazohpa ta chysapa nata Anoh likaw liata Biehraina a taopa he a cha. Khazohpa a to tao theituhpa ta eima chata Biehraina a tao. Halleluijah a rohnah hmeiseih. Eima chata tlana hnaw, hmasiena hnaw hneirohna hnaw, chhazaw hrona hnaw Khazohpa ta a taopa Biehriahna he Biehrai (or) Khazohpa Bie cha a cha. Khazohpa ta Biehraina a taopa he a paki lyma. Khapa na peimawpa a y? Thaisohna ma?, Hneirohna ma?, Alyna ma? Tlana ma? Khizaw nata ahmie kawpa ta hrozie thaina zydua Khazohpa Bie liata a y, a ki thla haw. Biehrai a reihpa nata a pasohpa zydua ta Thlahpa la pati chakah bei vei eih.

Biehrai Reih awpa Peimaw zie

Eima rah lia ta chhoto eima moh tita Biehrai a hneima leipa nata a reih leipa eima hlu kawpa ta pahnopa a cha. A ie-viapa ta thyutlia hro liata Biehrai hnei awpa, reih awpa, he pachana rai a y leipa a lyu kaw. Pohpa sapa laiseih nawpa ta nohkha ta a chy chai ta eino pati he nie tyh pa a cha. Anodeikuala Thlapa nata pohpa, sapa zydua chata a tloh(dai)-pakipa pati Biehrai dei kua he la reih hlu mapi, doh kho tyh mapi. Hneimah leipa eima y hra. A hneipa zy ta reih hlu hra vei eih. Reih awpa nata hnei awpa a chhuahna he a chy kawpa vata Thatihpha eima chakah kaw tah theipa a cha. Thatihpha cha eima kiahpa liata y thlah ha ta eima chakah lyma. Eima hrona liata a thabyhpa nata a hnaw eima chakahpa vata Pohpa chata a ngiahpa zy chhao eima chaka tyh hra.

Via bieso sakha ta “A y leipa hlata Pahno leipa he a peimaw via” atah. Pahnoleipa hlata pahno ta rawta a pahnopa hawhta a tao leipa he a pei maw via heihpa a cha. Biehrai he eima chata a to liata a to eima hmona hnaw a cha. Chavata Biehrai he reih awpa a peimaw hmeiseihpa a cha. Nama nata keima he eima va hnei kaw. Reih hropa ta Biehrai he y sala reih hropa ta reihpa chasala nama nata keima ta eima padi thei vama. Eima reih ta reih awpa a ypa he Khazohpa ngiahchhiena a cha. Eima chata Biehraina cha eima sapa,thlapa, pohpa paloruh, a to laisiena chata a daihpakipa a cha. Cha hawpa thlapa lata thatihpha thielahpa nata sapa chata a tloh-pakipa Khazopa Biehraina Chabu Pathaipa he eima reih chengei awpa a cha. Cha cha eima chata Thatihpha a cha. Eima tlana , eima lyna, eima hmasiena, a to eima taopa lia ta eima hlao tlona a cha. Noh khata eikha(lakha) cha reih cheingei awpa a cha.

Biehrai rei awpa eima ngiahzie nata a peimaw zie cha aryh la liata a chyta ei vaw palasa tua rai aw..
01. Khazohpa Bie he tlokhu a tloh pakipa/a dopa a cha. (Hlazy. 19:7)
02. Khazohpa Bie he a pathaihpa a cha. A kileina hnei vei. (Bies. 30:5-6)
03. Khazohpa Bie he a tlo pakipa vata baichhah awpa byu vei. (Rev. 22:18,19)
04. Khazohpa Bie he na ngiahpa zydua chata a daipakipa a cha.(2Tim.3:16-17)
05. Khazohpa Bie he hmotao theina a hneipa chata a ki lyma. (Is. 55:11)
06. Khazohpa Bie he na chata pachhana kipa a tao theipa cha. (Zhn.8:47;20:31)

Khazohpa Biehrai Pathaihpa eima Reihpa vata eima Hlaoawpazy
Khazohpa Bie na reihpa vata na to awpa nata nahlao awpa he Khazohpa Biehraina a chapa Biehrai ta mia a chho lilawpa a cha. Chazy cha na pahno awpa a peimaw kaw. Eima thohna nata eima to awpa nata eima hlao awpa zy cha hlupi ay. Chazy hry liata a ryh la ta a chy ta ei vaw palasa aw.

01. Biehrai he Biehmeiseihpa nata Biedopa pahnona hnaw a cha. (Zhn.17:17)
01. Biehrai Bie he na zyh khiatala byhna zydua tona hnaw a cha. (Lk.11:28)
02. Biehrai Bie he Pahniena thabyhpa a cha.(Ephs.6:17)
03. Khazohpa Bie he hmasiena nata laisiena hnaw a cha. (I Pet 2:2)
04. Khazohpa Bie he hmotaotheina, thatlona hnaw a cha. (Rm. 1:16)
05. Khazohpa Bie he mia chhithatuhpa (lapi) a cha.(Hla.119:105)
06. Khazohpa Bie he eima hrona hnaw a cha.
07. Khazohpa Bie he a to liata a to mia a chapa lyma.

Khazohpa Biehraipa Biehrai Chochah liata eima taovyu zy
Khazohpa Biehraipa Biehrai chochah liata keimo ngiapatuhpa zy ta eima tao awpa taovyu zy cha a ryh la hawta a cha.

01. Biehrai he a ngiapa(a pyh) awpa a cha.( Believe it) Zhn. 6:68-69.
02. Biehrai he eima za(pachonosa) awpa ( a cha. (Honour it) Zb. 23: 12.
03. Biehrai he kyhpacha, tlaichhai la a pahnieh te. (Love it) Hla.119: 92.
04. Biehrai Bie he a ngiahrih lyma te. ( Obey it) I Zhn. 2: 5.
05. Khazohpa Bie he paso, mohoh khasia awpa a cha. (Guard it) I Tim. 6: 20)
06. Khazohpa Bie he a chabah la a chha a chah lyma te.( Fight it) Zd. 3.
07. Khazohpa Bie he pachu la pahnosa lyma te (Preach it). 2Tim. 4:2.
08. Khazohpa Bie he a chu lyma te /Reih lyma te. (Study it) Ezra. 7:10.
09. Khazohpa Bie he pachu lyma ta chhopasia lyma awpa a byuh.(Ryh. 6:7-8: Nrh.8:7-8)

Biehrai a reih aw pazy

Bie hrai arei lyma awpa zy cha a hy zy ma a cha aw eih tahpa pahnopasia viana chata a ryh lata hiahrina he nama sasy ta a tao tua ma y.
01. Pachhachana na pahno mah ma? (I Kaw. 2:14-16)
02. Khazohpa Bie na va ma? Na kho ma na pasoh ma? (IPet. 2:2)
03. Khazohpa bie he na tlua ma? Nohto na reih ma? (Hmt. 17: 11)
04. Thlapa Pathaihpa ta na bie ma? ( Eph.5:18)
05. Ngiaptuhpa na chama?
06. Thlapa pati he khatalia e ei nie aw?
07. Baotuhpa ei ngia mah?
08. Thatihpha Bie he khata lia a y?
09. Biehrai he hmotaotheina ahnei ma?
10. Pachuna dopa na pahno kho ma?
He hiahrina zy he a chhy awpa a chhua pachhi la Biehrai a reih awpa eima cha chalei eima pahnopasia thla ha aw.

Biehrai reihna liata Peimawpa pahno awpa zy

Biehrai he rei leipa ta y thaipa cha vei. Reih cheingei awpa a cha. A chhapa cha eima chata a to a kina su a cha. Biehrai eima reih tita eima pahno awpa nata eima pacha awpa peimaw kawpazy a y. Chazy hry liata baotuhpa chata a ryh la liata ei vaw pua khei hrapa a cha. Khazohpa bie he:
01. Biehrai he a phakawpa ta reih awpa a cha. (reading)
02. Eima reihpa Biehrai he eima chho-pasia awpa eima pachapasia awpa a cha.

Eima pachapasia, Eima pachapachi tita pahno awpa zy cha:
(2.1) Biehrai hawraw eima reihpa sakha heta bie-chhawna eima hnei awpa cha vei. (Do not draw conclusion).
(2.2) Pachana buapa eima hnei awpa cha vei. Abua kawpa ta eima chhopasia awpa cha vei. (Avoid supperficial interpretation).
(2.3) Thlapala kyh deita eima pacha awpa cha vei. (Do not spiritualize the passage). Biehrai he sapa,pohpa nata thlapa chata a daipakipa a cha tahpa a pyh awpa a cha.
03. Eima pacha pakhua lyma awpa a cha. Eima reihpa Biehrai Bie kha eima pachapachi heih awpa a byuh hmeiseih.. Pachapachileipa ta tla reih chakhypa cha vei. Eima mopasia awpa a cha. (Evaluating).
04. Hma awpa a byu. Biehrai bie eima reihpa kha nohto hro liata hma awpa a byu. Vara tlo tita hma awpa hawhta pacha awpa cha vei. A tahma khizaw liata eima hro chho chata hma awpa ta rei awpa nata a chhuah awpa a cha. ( Applying)
05. Eima hrona nata Biehrai he eima pakao lyma awpa a cha.. (Correlating). Biehrai he mo hropa chata reih awpa cha vei. Keimo eima hrona chata reih awpa a cha.

Biepachhana

Mara sawzy rahto-suto liata eima paipatla via lyma. A chuna ta a pai patlapa y pita, Sohtluapa ta a pai patlapa eima y holo hra. Eima tyhpa nata eima hmopa zy, khizaw hmasiena zy ta moleina lathlo la mia a chhitha lyma hra. Chaliata eima bo nawhpa eima taopa liata eima hlao tloh nawpa cha Khazohpa Bie dei he a cha. Soh nata niedozy hnei kaw hrasala, Thatihpha Bie , Khazohpa Bie eima hnei vei khia, eima nie vei khia, Chakahpa eima cha thla ha. Mara sawzy eima y na suto liata khina ta rah noh a pazaopa, khizaw a tlaichhaipa, apa buatuhpa cha leipa ta Biehrai a reihpa, ngiapatuhpa phapa, Nopaw rei a ngiahpa, cha chyu su vy. Mara sawzydua ta Khazohpa a chhyna O la eima pakhyna daiti mai liata Biehrai nata Hlabu he a cheipa ta a pa khy sila hmo khochhi kawpa nata hrona pha kawpa a cha. Biehrai liata a to a ki thla haw. Khazohpa ta Biehrai a reihpa zydua hnota byhna to bi via lyma maw sy. Amen.