BIE: Thatihpha Bie nata Khazohpa Bie (Biehmeiseihpa nata Biedopa)

By Rev. Vazilai

Biehmiapa

A chô lata Bielu tawpa he eima ngiapana sizie pahno thai viana chata palasa khopa a cha. Thatihpha Bie nata Khazohpa Bie he a zaona khacha a hneipa a cha. Phaosa hmia nata hno hawhpa a cha. Ananona y aw ta a lyuna hlupi a y. Ananopa ta anoh sasyh deitah ta y thai aw vei. Ananopa ta a noh sasyh a y khiatala dyutlai khao vei. Hmathaipa cha khao vei. Eima ngiapana rah liata Bie nata a zaopa ta pachhaih-paphaona he a hlu kaw. Biehmeseihpa nata Biedopa , Khazohpa Bie nata Thatihpha Bie tahawhpazy he a
cha. Theithaina chata reihpa a cha tita pha thlaha tarawta ngiapana thliena chata nata ngiapana dopa(Sound Doctrine/ Theology ) a cha chalei pacha-pazi tita pachhai-paphaotuhna he chi a chhi kaw hra. Chavata pachana pahra awpa ta a chytah ei vaw palasa kho kawpa a cha. Pachhaita patyh hei awpa he pachuna liata hmapa a cha tyh. Chahrasala pachhai ta patyh thai khaoleina he pachuna phahlapa a cha. Pachhaituhna he patyh thai khaoleina a chhaina, py paduana a tlo khei tyh.

BIE

Bie kyh he Biehrai liata hlupi hmopa chata Zawhana chabu liata eima hmopa cha, Bie he athaona liata a y, Bie cha Khazohpa hnota a y, Bie cha Khazohpa a cha. Bie cha Sapa lata a vaw lie. Cha Bie cha Zisu Krista he a cha a tah.(Zhn.1:1-14). Cha Khazohpa nata Zisu Krista cha pokha sakha a cha. Theithaina chata nata pachuna chata Zisu pakha kyh he kao hlupi ta rei theipa pachaitheipa pachu tyhpa a cha. Chahrasala anano vei. Zisu pyly a cha.
Biehrai liata Bie he chino a y. Chazy cha: Logos nata Rhema zy he a cha. Logos cha Bie nata Sapala ta a vawlie pa Zisu Krista he a cha. Rhema cha paloruhpa liata Bie(Thlapa pathaipa Bie) tah theipa a cha. Karl Barth ta Bie he chi thoh ta a pachhai. Chazy cha:

1. Rohpa Bie (Biehrai) Written word
2. Reihpa Bie( Sermon) Spoken word
3. Sapalata aliepa Bie (Zisu Krista)Incarnation word zy he a cha.

Sapala ta aliepa Zisu Krista kyh he rohpa chata Biehrai tahpa a cha. Rohpa Biehrai tawhta Zisu Krista Khazohpa kyh reihpasiana he Reihpa Bie ( Sermon tahpa a cha. Chazydua cha sakhapa(pohkhapa) a cha. Thethaina chata kaonanopa ta palasana a cha. Reihpa Bie he adopa chata a hmeiseihpa a cha. Ahmeiseihpa a chana cha Zisu liata sapa lata a liena he a cha. Zisu cha Biehmeiseihpa a cha. Chahawhpa thatih zydua cha rohpa cha ta reihpa a cha hei hra.

Bie he azaona chata hmapa a cha. Zisu Krisata he Khazohpa nata Chyhsa azao heihna chata a cha. Cha Bie: (Zisu Krista) chata chyhsa a palysa. Khazohpa nata Chysapa azaona liata Bie he peimaw kawpa hawhta Chyhsapa nata chysapa azaona liata Bie he peimaw kaw hrapa a cha. Bie kyh he theithaipa bie ta reih awpa roh awpa a cha. Pawla ta theithaileipa/(Theithairuhpa) reihnanaopa hawraw/ kawh sakha hlata theithaipa bie kawh pangawpa he apahnai via a tah. Bie ta chysa palysa thei ta chysa ru a pachho( hie- apaha) thei hra. Bie piena y aw ta a naona Bie a y aw. Thatihpha Bie y aw ta Thatih chhiepa Bie a y aw. Bie ta chysa phao pahri thei ta tha a patlo thei hra. Chysapa chata aly y chhipa he Thatihpha Bie chata a pha kaw. Khazohpa Bie Cha vei ta thei rih-ma awpa cha vei.

Khazohpa Bie nata Thatihpha Bie

Khazohpa Bie liata Thatihpha deita a y aw tah theipa cha vei. Thatihpha Bie dei he Khazohpa Bie a cha tah theipa cha hra vei. Khazohpa Bie liata pasipa-aona bie, chhoreihna bie, biepiena hpz a y holo hra aw. Na hro haw, Vara na to aw, Ngiathaipa na cha, Lyma na hmo aw tahawhpa zy he chyhsapa chata Thatihpha chata Khazohpa Bie a cha. Chyhsapa chata tao tyh, hria tyh. Na hria awpa a cha, riethei kawpa ta hriapasa tyh, tahawhpa chyhsapa kaola ta tao awpa zy he Thatihpha cha vei tapa ta eima reih tita theithaina chatala pha tarawta Khazohpa Bie cha vei tahpa ta eima pacha khiatala a do khao aw vei.

Ngiapa tuhpa Khazohpa Kyhpachana a padihpa, Zisu Krista Ngiachhiena a pasohpa chysa chatala vaw tao tyh, hriapasatyh, riethei vaw tao tyh ama tahpa chhao he Thatihpha Bie a cha ama tah. A chhapacha Khazohpa kyhpachana, Zisu Krista ngiachhiena he athu ta a sah kaw , keima he a phu vana, pasa tao tyh, riethei tao tyh tahpa he kei chatala vahnei kawpa ei cha. Kei chhiepa tlai hema Zisu ta cha hawhta hria awpa, tao awpa ei na kho hra. A phu vana ama tah. Ama cha ta Thatihpha a cha chu a ma tah. Thatihpha Bie nata Khazohpa Bie he a pachhaithai vei. Anano ta y thai hra aw vei. Sakhapa nata hmaokhapa a cha.

Eima rah liata Tharihpha Bie reih leipa ei ta Khazohpa Bie deita ama reih, suhrawsukha vaw pie tyh, A pakhy tiama tyh, Sunday Siku a chu tyh, Pahano pathaisa tyh, tahpa he Biehrai Parohpa nata Ryhpa Bie cha ta Khazohpa Bie a cha. Thatihpha Bie cha vei tahpa pachana a y. Pachana tlo leipa, Pachuna pakileipa a cha tah theipa a cha. Suhrawsukha piena, Mission chakao tiama awpa ta pachuna, Khazohpa khopa ryhpa paki awpa ta reina zy he Thatihpha Bie a cha eima tah thei mah leipa he ngiapa panaopa, laochapa a nie thei leipa eima chana a la.
Rheithai viana chata pakho-pana ei vawpalasa kho kaw. Laola lapi nata Kala lapi he sano pa a cha. A tyh khai tawh ta Laola Lapi tah theipa chata Kala lapi ta theipa a cha hra. Lapi sa khapa a cha. Athaona ananopa lyu hrasala a chhana cha sakhapa a cha. Lapi ama chana liata a lyu hei hra. Tisi vah nata Beino vah he a tyh khai tawhta Beino vah eima tah. Tisi vah y veima eima ta tita a y thla haw. Tisi vah kha a i-hrapa ta a pachhai thai khao aw ma? Pachhai thaipa cha khao vei. Theithaina chata Beino vah chho liata Tisi vah kyh he na rei thei tarawlaw nai ta pachhai thai aw va chi. Pachhai awpa cha hra vei. Tisi vah nata Beino vah he sakha a cha haw. Ti ama chana lia ta a lyu hra.. Cha hawta Khazohpa Bie nata Thatihpha Bie he a cha. Bie hmeiseihpa nata Biedopa he a cha pyly hra.

Thatihpha tahpa Hawraw Y zie nata Athaona ( The Origin of Evangelism)

Thatihpha tahpa he Krika reih ‘evangelion’ tawhta a vypa chata Mongyu reih ta ‘goodnews’ a cha. Mara reih ta Thatihpha eima tahpa he a hmie kawpa hawraw a cha. He hawraw he Greeco-Roman khizaw daiti liata hma tuachaipa hawraw a cha. Rawma Bei zy ta charia adyuna tawhta pahniena chota ama vaw tlo tita pahniena pyu he a pathasa tyhpa chata, chahawhpa pathasana pyu cha ‘evangelion’ tahpa ta amah ma tuachaipa nata a ma hma tyhpa a cha. Daiti a vaw sie via lyma tawhta cha Abeizy ta chariah pahnie noh deita chakhaoleipa ta ama pihnoh liata Abei dyuchhai lia a tyupa ta a rah chysa zy chata hmophapa, thatihpha, aly chhihpa a reihpa zy chhao he ‘evangelion’ tahpa ta ama vaw hma haw. Abeipa ta anoh pihnoh liata a rah chho liata anoh chysahzy chata thatih aly chhihpa bie a tyuna dyuchhai tawhta a reihpa bie kha tla-awtuhpazy ta ama aw khei lymapa nata zawpi ama pahnosa lyma. Cha bie cha‘evangelion’ Thatihpha bie cha a cha.

He hawhta a ma vaw tao tyhpa nata a ma vaw hma tyhpa hawraw bie kha Krizypa zy ta a ma vaw la/hla/ hma hra. Bei Zisu ta Khizaw chysah moleipa a thi awpa zydua chata thokraws cho liata khaipa pata y ta chahawhpa thina cha pahniepa ta a thyuheihna thatih aly ypa cha khizaw chysa zydua chata thatihpha chata ama chakheipa nata ama vaw phua lymapa vata he hawraw ‘evangelion’ he ama vaw hma hrapa a cha.

Krizypa nata Thatihpha (Christianity and Evangelion)

Krika-Rawma khizaw (Greeco-Roman) daiti liata thatihpha hlupi (evangelion) a y thei aw. Chahrasala Awnanopa chata deikua cha thatihpha sakha dei a y. Chahawpa Thatihpha cha Zisu ta thokraws cho liata nama nata keima vyupa ta taopasa ta a pahniena mia a vaw tlo kheipa bie dei he a cha. Cha Thatihpha Bie cha thina ta pa hnie vei, athyu heih haw( thina he a tia haw) tahpa bie he a cha. Chysa zydua ta eima chi chaipa nata eima charia laichaipa cha thina he chata , chahawhpa thina cha Zisu ta a tia haw tahpa he Thatihpha a ly y chhihpa bie a cha. Thyuheihna he eima ngiapana liamaripa a chapa hawhta Thatihpha hmeiseihpa cha a cha. Krizypazy chata Thaihpha tahpa ta eima aw tua chaipa thyuheina ( thina pahniena) he eima aw khei lymapa nata eima chakhei lymapa cha a cha. Moto chata hrona (thina pahniena) a chapa vata Awnanopa nopaw hmiatuapazy chhao ta ama vaw aw khei lymapa nata ama reih lymapa nata ama roh lymapa cha a vaw cha. Cha thatih cha Zisu Krista thyuheihna he a cha. Cha Thatihpa bie a theituhpa zy ta ama tao awpa a y.

Thatihpha Bie nata Ngiapana

Zisu a thyuheihna, thina a pahniena thatihpha reihpa Bie cha a theituhpa zy ta ama ngiapa awpa nata a ma zo/zy awpa he a ma taovyu a cha. Chysapa taovyu y leipa ta hlao tlo thei vei. Zisu thyuheihna Bie cha a theituhpa zawpizy ta a vaw ly kaw eih ta a thyuheihpa Zisu cha hmeiseihpa a cha ma? Khapa chyhsa ma? Kheihawpa chyhsa ma? thpzy hriahrina nata pachana a vaw y. Chavata Zisu thyuheihna Thatihpha tawhta a vaw pazipa Zisu thatih pahno khona tawhta a vaw thaopa ta a thaokina, ano nata paw thatih, a chipho y zie, a chakaona, ahmotaopa zy he reih lyma pa nata roh lymapa a vaw cha.

Zisu cha Messiah a cha nazy, Thlahpa Pathaihpa ta Mari hnota papihpa a chana zy, Khazohpa a chana zy, Zuzy a ma mokhapa Messiah a chana zy, Bie a chana zy he reih pasia lymapa nata roh papua lymapa a vaw cha haw. Chahawhta reihpa nata rohpa Bie cha Thatihpha eima tahpa Zisu kyh cha a cha. Pakhopa nata reihpa a cha khia tala Maka Thatihpha bu he Thatihpha chaleipa ta Thatihpha Bie( Zisu) kyh kha a reihpa nata a rohpa chabu tlao a cha. Thatihpha Bie Zisu kyh cha reihpasiapa a cha tita a reihtuhpazy ama nanopa hawhta a ma reihna zie nata ama roh zie a lao khai khao vei. Mathai nata Maka, Luka nata Zawhana, Pawla hawhpa reihzie zy he a chyta a nanopa tlao a vaw cha. Alyuna hlupi a y hra. Pawla reihpa hmata ananona a y. A chhapa cha a nathlietuhpa nata a ma pahnosa khopa Chysa, Chipho, Khi hrozie , palophao vata a nanopa a cha. Chahawhta reipasiana zie a nanopa he Thatihpha Bie a chapa Zisu cha a ma ngiapa theinawpa nata a ma ngiapa thai nawpa ta a cha. Khazohpa Bie nata Thatihpha Bie ananopa vata cha vei. Biehmeiseihpa nata Biedopa a nanopa vata cha vei. Reihna a nanopa tlao a cha. Reihna a nanopa chhao cha a ma ngiapa thainawpa a ma thei pasia theih nawpa ta pachuna liata reihpa nata rohpa a cha.

Zisu nata Thatihpha

Zisu he Thatihpa cha a cha. Zisu Anoh tlai ta Anoh kyh, thatihpha a chana, Khazohpa a chana zy he a reih lyma. Zisu reihpa Thatihpha Bie(or) Khazohpa bie nata Zisu hmotaopa Pachhana Thatihpha Bie tahpa ta a y. Zisu reihpa nata pachuna hlata Zisu eima chata thokraws cho liata pasataopa ta thi ta pabu pata y ta a thyuheihna he Thatihpha a cha tahpa ta pahno tuapa nata phuatuapa nata a hmia tuapa cha a cha. Na hro haw, Ngiathaipa na cha, Hmotaona vata cha vei, ngiachhiena vata a cha tahawpa Zisu eima chata ataona he Thatihpha tahpa ta aw tua chaipa nata phuatuachaipa cha a vaw cha. Zisu thyuheina he a cha eima tah aw.

Chatawhna chata Zisu reihpa, pachuna, Anoh thatih kyh zy he reih via lymapa nata pachu via lymapa a cha. Chachhaocha Khazohpa Bie chata Thatihpha Bie a cha. Zisu pachuna he ngiapatuhpazy ta a ma paha khei ngai takawpa Thatihpha a vaw cha haw. Awnanopa ta a tao awpa, Khazohpa a chakaona lathlo, Zisu pachhatuhpa a reihthai awpa nata a ly awpa kyh zy reihna nata pachuna he thatihpha ta a py theih ma leipa khia tala Awnanopa panyupa nata ngiapa patuhpa panaohpa tah theipa a cha. Thatihpha Bie Zisu tahpa ta eima pahno tua chaipa Zisu thyuheihna nata hmotaona he Khazohpa Bie eima tahpa Zisu Khazohpa pachuna liata a pahniepa a vaw cha.

Chyhsa thokha ta Khazohpa Bie cha Biehrai Parohpa he a cha. Biehria Thiehpa he Thatihpha Bie a cha tahpa ta ama pachhai tyh. Khazohpa Bie nata Thatihpha Bie tahpa ta theithaina chata reihpa a cha tita pha tarawta ngiapana liata hmapa a cha tita, Biehrai parohpa he la a pyvana tahpa a pua khei haw khiatala a do khao aw vei. Bie hrai parohpa Chhao Bie hrai Thiehpa chhao Khazohpa Zisu Thatih reihna nata rohna sai a cha. Areih zie nata arohzie ananopa dei ta tlao a cha.

Awnanopa ta Khazohpa khinarah chata chakao kho kaw hrasala lathloh a pahnopasia vei khia chakao thai aw vei. A chakao awpa lathlo he pahnopaki thei nawpa ta pachuna he ngiapatuhpa Awnanopa chata Thatihpha a cha. Thatihpha Bie chata Khazohpa Bie a cha tahpa ta a py kho leipa nata a chakao kholeipa cha, Zisu he pachhatuhpa a cha tahpa deita a py ta Abeipa a cha tahpa apyma leipa a cha aw. Zisu he ei beipa nata Pchhatuhpa a cha a tahtuhpa zy ta Biehraiparohpa eima tah tyhpa Ryhpa Bie he Khazohpa Bie chata Thatihpha a cha ama tah thei haw.

Bie Pachhana

Kazohpa Bie, Thatihpha Bie( Biehmeiseihpa nataBiedopa) tahpa ta pachhaituhna hela pachuna tlo leipa a cha. Biehrai Parohpa nata Biehrai Thiehpa tahpa ta pachhaipa ta angiapana he ngiapana lathlo liata panaopa eima chana a lah tah theipa a cha. Chavata theithaina chata pachuna liata hma tyhpa chahrasala ngiapana thliena liata cha hma awpa cha vei. Biehrai siku ei vaw chuna liata Biedopa nata Bie hmeiseihpa, Khazohpa Bie nata Thatihpa Bie a chhaina kyh he ei hmo mah leipa a cha. Khazohpa Bie a pasopa ngiapatuhpa cha awpa ta Abeipa lata a hla via lyma su vy. Khazohpa tawhta hmo rohnapa eima to hawpa vata Khazohpa chata hmo rohnah kawpa tao awpa a chhuah hra ma y. Hmo rohnah kawpa tao tyh tahpa he na chata Thatihpha Bie a cha. Khazohpa Bie a cha hra. Biehmeiseihpa chata Biedopa a cha. Anano vei.

___________

Rev. Vazilai cha Lorrain Theological College & Mission Studies Center liata Lecturer nata Register rai  a hria ngahaipa acha. Article aropa hma awpata pasaina mia a piepa vata ahno ta alyna bie eima rei.