By Rev. Dr. Laiu Fachhai

Zâkô 2013 September thlapa liana kha Transition Network ta a pachhuahpanohpa Operation Nehemiah III Seminar Bangalore khihpi liata zâ hlao hra na ta. Transition Network nata he seminar ta âchhuahpa cha awnanopa he avyuna (corruption) y leina su nata py ta tao awpa a châ chai. NGO, company, political party, khihtlâh nata sawhkhâ, etc zy he avyuna y leina su nata py pachâsapa hrohsona rai hria thei awpa ta keimo awnanopa (church) nata Krizyhpa py (para church organization) zy ta eima awnanopa nata py chyu he avyuna y leina su nata py ta eima tao ha tua awpa a peimawh chai, tahpa lâ chhâh noh no chhôh tlai eima pachia. He châpaw he ta awnanopa py kheihhawhpa tlyma nata awnanopa liata hriatuhpa ahyzy tlyma ta avyuna ama vaw tao hawpa kyh reih leipa ta, awnanopa a nua eihpa hnei hra leipa ta, awnanopa chhao ta â vai leipa khiahta cha avyuna liata a ngia thei hra ta, chavâta hetawhta kaw sie lymâ nawpa liata avyuna liata a ngia lei nawpa ta a vâtlâhpa ta zikyu arâna a châ chai. Seminar liata reipahmaohpazy khaihna tawhta nata he rohtuhpa ta hmo yzie ei laichadaina tawhta mopa ta ary liata palâsapa kaozy liana he ta awnanopa chhao ta avyuna liata a ngia thei hra ta, riahvai awpa a peimawh kaw.

1. Awnanopa chhihtuhpa atlyna kyh liata

Awnanopa (Headquarters, bia, local nata branch) liata chhihtuhpa atlyna kyh liata, thlahchhâ ta Khazohpa khozie tlua châpa ta, campaign zy, a group (line) ta ataopa zy, sôh hmâpa ta khokheituhpa tluapa zy, rai pabawpa zy, rai pakia awpa ta bietaipa zy, a kao nata a kâh ta a raoh khei awpa ta ahawpa zy, atly thei awpa duahmo liata a y hrapazy reipachhiepa zy nata ngiachhiena ahawpa zy a y thei. Hezy he avyuna chi kha ama châ.

2. Awnanopa sôh hmâna kyh liata

TA/DA bill-na kyh liata zy, mawtaw nata hmobyuh chhaichhi hropazy chaleina nata mohhôhna nata paraihna (repair and maintenance) kyh liata zy, ohmo lyuhmo nata olyu chaleina nata sana kyh liata zy, awnanopa ta project ahneipa liata sô hmâna kyh liata zy, receipt taona kyh liata zy nata kao nanopazy liata ahryuhpa dopa hlâta a hluh via ta palâsa khona reipasaona nata avyuna he awnanopa liata chhao a y thei hra. A rai ria ta hria leipa nata chalei leipa hmozy phi chhyhpa receipt taona moleina liata awnanopa chhao ta â ngia thei hra. Awnanopa sôh chado leipa ta hmâ chatlao chakhyh thlah hapa chhao avyuna sâkha châ hra ta, achhyna o nata awnanopa office nata project-zy sa nawpa châta sawhkhâ (vâtlâh) râh nata private râhzy cha-iepa chhao avyuna sâkha a châ hra. Mopakha moh ta bank liata awnanopa sôh sopa nata insurance taopazy chhao avaona chi kha châ hra ta, bank loan lana kyh liata document phi chhyhpa tlyma, hlao â sâh viapa ta palâsapa tlymazy he avyuna chi kha châ heih hra ta, awnanopa sôh mopakha dyu pacheisapa chhao avyuna chi kha a châ hra. Awnanopa mawtaw nata haohtuh nata awnanopa hmobyuh chhaichhi zy mo pakha nata chhôhkha (private) peimawhpa liata hmâpa chhao avyuna chi kha châ ta, tovyuh to khao leipa chhao ta awnanopa quarters puasai leipa chhao avyuna a châ hra. Awnanopa sahlaozy ama sôh thyupa nata â phuh leipa ta hriatuhpazy hlao pahluh tupa chhao avyuna chi kha a châ heih hra.

3. Awnanopa liata hriatuhpa lana kyh liata

Awnanopa liata hriatuhpa lana, pa-ina, pakiasâhna (promotion), raihria pasisana (service extension), chahnaona (ordination), chhoreina, etc zy kyh liata sanawh chhôhkha khokhei viapa zy, chhihtuhpa sawzy khokhei viapa zy, hmiamo ypa saw nata kao nata kâh khokhei viapa ta hmiamo y leipa ochaki ochakâ sawzy cha siethlu laihpa zy, aty achhuahpazy chi ta reingiahpa chyhsa dopazy hmahchha pachâ peimawh leipa ta tlyhnypa zy, âmo hlâta dyutlai via awpa hawhta alâpazy châta tovyuh (chance) papo laihpa zy, ahyzy châta ma dâh pahua ta ahyzy châta ma pa-ipa zy he avyuna ama châ khai.

4. Awnanopa ta hlao apiepazy raihria kyh liata

Thlahpa thapasana nata Khazohpa nata a awnanopa kyhpachâna ama hnei hluh leipa chhao ta, awnanopa ta hlao apiepa ama châ vâ hrahro ta, ama hlao nata âphuhpa ta rai ama hria awpa a byuh. Awnanopa ta âhnawpa hawhta rai hria leipa, hlao nata âphuhpa ta rai hria leipa nata y nawpa su nata tao awpa raopazy liata y leipa nata tao leipazy he avyuna lai ngaitapa a châ.

5. Sawhkhâ baona daopa kyh liata

“Cha awnanopa hnohta chahawhpa châta piepa” tahpa ta ro thei leipa, hmâna kao hropa nata moh hropazy bi ta pamieh patawh laipa sôh awnanopa ta sawhkhâ tawhta a dao khiahta cha, cha awnanopa cha ano kha avyuna liata ângiapa awnanopa a châ tho ta, sawhkha biehneituhpazy chhao taih avyuna moleina liata a pangiasa pâ haw hra ei, tahna châ ta a pei kaw aw.

6. Sawhkhâ raihria ahneipa awnanopa liata hria chyna kyh liata

Sawhkhâ department kheihhawhpa liata ahria ngâpa ta daihti khasâ rakha chhôh ma awnanopa liata rai a hria khoh khiahta cha a sawhkhâ rai tawhta chhuti a la awpa châ ta, a chhuhti ta â daih khao lei tita hlao leipa chhuti la aw ta, awnanopa ta a hlao cha â tôh awpa a pha. Chhuti la leipa ta, a sawhkhâ hlao siekheipa ta awnanopa liata a hria khiahta cha, cha sawhkhâ department, hriatuhpa nata awnanopazy cha avyuna liata amâ ngia haw, tahna a châ aw. Sawhkhâ raihriapazy ta ama sawhkhâ department tawhta chhuti a phapa ta la ha tua leipa ta awnanopa committee, pakhypi nata Assembly zy a hlao awpa awnanopa ta a paryhsa thlah ha khiahta cha, cha awnanopa cha avyuna liata â hniahni haw, tah thei nawpa kao a y hra.

7. Vyuhpa ta sawhkhâ rai pahriana kyh liata

Vyuhpa ta sawhkhâ rai pahriasapa he sawhkhâ dâh ta pasai leipa ta, Khazohpa hmia liata a do hra vei, vyuhpa ta a pahriasatuhazy ta hria leipa ta hlao niena a châ awpa vâta. Chavâta pastorzy nata awnanopa liata hriatuhpa lahpinô/vahpa sawhkhâ raihripazy ta ama vyuhpa ta chyhsa pahriasa mawh ei sa la nata awnanopa machâ nata awnanopa sahlao sawhkhâ raihriapazy ta ama vyuhpa ta chyhsa ama pahriasa khiahta cha chahawhpa hriatuhpa nata a yna awnanopa cha avyuna liata amâ ngia haw, tah thei’pa duahmo liata amâ duah.

8. Bill piena kyh liata

Ti mâ, electricity mâ, lei mâ (chhie), telephone mâ, thâtihbu mâ nata sawhkhâ nata companyzy lâta pie awpa bill zydua a daihti tata nata a châna hawhta pie lymâ awpa byuh ta, chahawhta tao leipa khiahta cha awnanopa ta avyuna liata â ngia haw, tahna a châ aw. Bank loan nata sôhdaozy liata leibâh ahneipa localzy chhao ta a daihti tata ama pie lymâ vei khiahta cha avyuna liata amâ ngia haw, tah theipa a châ hra aw.

Biepachhâna

Awnanoa cha py chakhyhpa châ leipa ta, Thlahpa Pathaihpa py châ ta, Krista ta Ano a pathaihpa hawhta a awnanopa chhao pathaih hra awpa ta â hnaw. Thlahpa Pathaihpa baona ta Awnanopa he avyuna y leina su ta â tao thei. Sawhkhâ, NGO, Company nata khihtlâhzy liata avyuna a y lei nawpa ta pachupa nata hriapa he awnanopa châta chakaona peimawh ngaitapa miakha châ hra ta, châhrasala ano awnanopa chaipa ta khi achô liata palâsapa kaozy nata kao hropazy liata avyuna liata â ngia haw khiahta cha sawhkhâ, NGO, company nata khihtlâhzy liata avyuna adyuhna hrohsona rai hria thei khao aw vei. Sawhkhâ, NGO, company nata khihtlâhzy liata avyuna a y lei nawpa ta hrohsona rai hria thei awpa ta Awnanopa cha headquarters, bia, local, branch, project nata department to liata avyuna a y leina su nata py a châ ha tua awpa a peimawh.

_________

*A articles ropazy hmathei awpata pasaina mia apietuhpa Rev. Dr. Laiu Fachhai hnota alyna bie eima rei.