MARA EVANGELICAL CHURCH

A PAHRANA GUIDE BU

2014

 Biehmia

2014 September a pahrana hmâ thei awpa hrona nata tlâhna miah a pie tuhpa Abeipa Khazohpa he Amoh riethaipa ta y mawh sy.

Assembly 2014 ta he a hrana châbu patohpatiatuh awpa ta nôpawpa Rev. Sa E Hmô, E.S(Gospel & Cuture) he a vaw rao. Awnanopa vâta khitly peimawhpa nata Awnanopa vaina liata daihti vâropi vaw y hawta, a daihtita liata thâtih eima pathei thai khao leipa vâta atahmâ he tlalana a y pathlei lein’awpata he a pahrana châbu he Assembly bietlâh a tlypa hawhta “AWNANOPA A HRANA NATA MISSION CHAKAONA” tahpa ta vaw patohpatia parapa a vaw châ.

Achhôh bie he a reipasiana hlâta a tôhtlâhpi via sai a châ. Bo(3) ta pachhaihpa châ ta, Awnanopa, A hrana nata Mission chakaona zy he a châ. Awnanopa tahpa liata biechupa (9) a y. Ahrana tahpa liata biechupa (10) y heihta, Mission chakaona tahpa liata biechupa (9) y ta a zydua (28) a châ. Noh peimawhpa châta eima nôpawpa Rev. V. Ve u(AGS) ta sermon miano chhao vaw tao ta achô ta eimâ ly hmeihseih.

He 2014 A hrana biechupa heta Awnanopa ngiapâtuhpazy Awnanopa châna hmô pasiana vaw châ sala, Thlahpa Pathaihpa pahrana to lymâna chôta Mission a chakaotuhpa eima châ khai chyu n’awpa ta Abeipa ta byhnâ pie mawhsy. Amen.

September (1)

AWNANOPA

  1. AWNANOPA : (Mt. 16:13-18. Eph. 1:22-23.)

Awnanopa he phupy sâkha hawh deita ta a hmôpazy thokha ama y. Chavâta Awnanopa â pielyuna chôchâh liata palôhtlâh leinazy a y tyh. Khizaw a dyuhpi einona daihti liata Germany Awnanopa kha ama maochhie kaw sai. Zu chyhsa hluhpi a thie thlâhhapa Hitler hmaotaona policy a duakhâh leipa ta a ypa chô-châh liata palôhtlâhleina ama hnei. Chavâta Awnanopa he nohto hrozie liata yzie a hnei leipa hawhta ama hmô haw.

He hawhta Awnanopa a hmôpa zy he amâ dona hluhpi a y. Châhrasala, Awnanopa tahpa cha a chieh leipa keimozy hawhpa chyhsa hluhpi yna su châ ta, tlohna a hnei leipa chyhsazy chhaota a sie hualua lymâ. Atahmâ he amoh châna hmeihseihpa hawhta a hro thei n’awpa he khoh a chhih ngaitapa a châ. Hitler ryureina daihti nota Awnanopa kha a chakichapâ liata sopa tlâ a châ. Anodeikua atanoh Germany Awnanopa he kha hlâ via hawhta y khao vei. Khizaw kaoki liata chakaona thiehpa ta rai a hria lymâ ngâbâ.

Thokha reizie hawh tlaita Awnanopa he phupy tlaita a châ. Phupy moh tlaita chhâ zydua a vaw siepahlie lymâ hra. Hmialâ chhao a sie lymâ heih aw. Khizaw liata a vaw pihpa hawti zydua a ly kawpa ta a chhuahdypa ta â hlady lymâ aw. A vaw laisiena châta Awnanopa ta a taotheina hawhta a tao lymâ hra. A vaw thi tita chhao ngiachhie kawpa ta thlâ lâ chhihtha ta a pathlie lymâ. Khazohpa baona ta byhnâ a topazy ama vaw y tita a ly kawpa ta palyupalih ta â ly khei hra. Rairu nôpo a tyhpazy hnohta tha patlôna nata thlahpalôhna chakaona a hnei lymâ hra.Sapa nata thlahpa liata a laiseih pha lymâ thei n’awpa ta nata thlahlôhna kyhzy Awnanopa ta a pachu lymâ. Chavâta Awnanopa he mo pakha chyu hrona kyh liata maniah mohôhtuh chaipa tovyuh lai kawpa a hneipa phupy tlai a châ. Nô pychhôh tawhta thi hnoh lâ tlyzaw hrona tona taihta miah mohôhtuh chaipa a châ.

    Reipahmaoh awpa –

  1. Awnanopa he atanoh nâ zaw kheihta na hmô tly?
  2. MEC Awnanopa liata thokhazy palôh châleina, atynazy ama    hnei tyhpa he Awnanopa phaleina ma? Atytuhpa phaleina    ma?
  3. Awnanopa he mo pakha chyu hrona liata mohôhtuh chaipa      a châpa ta na thlah a cha palôh khei tlai ma?

September (2)

  1. AWNANOPA Y ZIE: (Ht. 2:43 – 47.)

Awnanopa tahpa cha Hebrai reihta “Kahal”tahpa nata Krika reih “ekklesia” tahpa hawhrawhzy tawhta a vypa châ ta, a yzie cha “Ahmaohpakhypazy” tahna a châ.Biehrai thiehpa liata Awnanopa tahpa hawhrawh saita ei(114) hmô theipa a châ. Mathai châbu liata ei(3), Hmotaopazy châbu liata ei(62), Zami châ paphaopa liata ei(2), Zawhana châ paphaopazy liata ei(3) nata Biephua châbu liata ei(20) hmô theipa a châpa ta “Biehraithiehpa Awnanopa” tahpa châbu a rohtuhpa Mc.Daniel ta a reih.

Abeipa Zisu chakaona liata “ekklesia” tahpa hawhrawh he a hmâ hluh kaw. Krika mo hry liata “ekklesia” tahpa ama novâhna zie cha su sukha liata a ypa khisawzy khotalai kawpa nata a ly kawpa ta sakizy tô eita lâthlôh liata a hmaohpakhypazy he ama châ. Hebrai mozy novâhna zie cha Abeipa tlâhkhai pathaihpa hmiakô liata a hmaohpakhypa Israel sahlaozy kha a châ. Chavâta Hebrai mo nata Krika mo pahnona liata Awnanopa tahpa cha “A hmaohpakhypa sahlao” he a châ. Hmiatuh Krizyhpazy kha “Awnanopa” tahpa ta pahnopa ama châ. Krista lâta “pahmaoh pakhypa” tahpa ta yzie a hnei.

Krizyhpazy ta Awnanopa tahpa ama novâhna zie cha, hmaohkha ta a y pakhypa phupy hawhta a ypazy, sukha liata a ypa chatlaipazy y pakhyna tahpa ta a châ. Chazy hry liata Krizyhpazy ta Awnanopa ama châna amâ pahnochaina moh cha sukha liata hmaohkha ta a y pakhypa tahpa ta a châ. He moh he Biehrai thiehpa liata direct ta ei(83) taih hmô theipa a châ ama tah.

Hmiatua Awnanopazy cha Pachupa, Uhnawhzy, Mopathaihpazy, A ngiapâ tuhpazy, Lâpi chyhsazy tahpa moh nano nanopa ta aw laihpa châ eita, daihti ama sie via laih nata cha “ekklesia” tahpa ta hmâpa a vaw châ. A chhâpa cha raihria eihpa hria awpa ta aw papuapa nata pananohapazy ama châpa vâta Awnanopa tahpa ta awpa ama châ.

Reipahmaoh awpa-

  1. Hmiatua Awnanopazy pachâna zie kha hmaohkha ta y pakhy eita, atanoh Awnanopa liata he he a hriapazi                lymâpa ta na pachâ ma?
  2. Awnanopa local miakha chyu liata local KTP, KNP nata    KHP zy khihtlâhzy a raohkhatyh leipa he khâpa vâta a       châpa ta na pachâ?

 September noh(3) Râhthiehpa noh

  1. REI LEI THEI LEIPA THÂTIHPHA; (Kawr. 9:13)

Mo pathaihpa Pawla ta thâtihpha he khapa vâta a chho? tahpa a rei pasiana liata “tao lei thei leipa ta ei chô ta a pahnieh” tahpa ta a reih. A yzie cha chanô nawh a zeihpa nata â lyu (Zawhana 16:21) tahpa ta a reina a châ.Thâtihpha he husona a hneipa bie a hrohpa a châ (Mt. 13:31-32). Ngiapâtuhpa hrona chhôh liata a laiseih theipa Khazohpa bie a hrohpa a châ. Chavâta chanô ta nawh a pi â daihna daihti liata tao lei thei leipa ta hawsaih a papipa hawh tlaita mopathaihpa Pawla ta a reipa a châ.

Hawhrawh hropa “Ei chho vei khiah ei hu a po aw” thlai a vaw tah heih. A yzie cha kyh miah a pachâ ngâsâpa a peimawh ngâsâna daihti liata a rei a ngiah khao leipa ta eima ypa tlyma? Eima pathlala hawpa tlyma? tahpa daihti liata ano hmia chhao kha khao piva, keimo chhao eima hro a ly thei khao hra va tahpa hupona he a rei khohpa a châ. A rei khohna cha Thâtihpha he ei chho vei khiah ei hrochhôh liata ei hro a ly thei aw vei tahpa ta a rei. Kaokha lâ tawhta eima rei khiahta cha Pawla ta Krista a pahnona(phil. 3:8)he a reina a châ. Chavâta Thâtihpha tahpa cha Zisu Krista tlai he a châ.

“Thâtihpha chho” tahpa cha Zisu Krista thâtih he khatlu ta na thei, khatlu ta nâ chu tahna lia y leipa ta khatlu ta na pahno tahna liata tlao a ypa a châ. Cha pahnona cha Thlahpa Pathaihpa taawh pahnona (2kaw. 5:16) he a châ. Mt. 16:17 liata Zisu Krista chhao Pity hnohta “Keima eina pahnona chi he ei Paw avâ liatahpa pahnosana a châ tahpa ta a rei hrapa a châ.

Paw tawhta pahnosana bie cha “awna” a châ vei khiah “tuana” (Hmt. 1:8) tahpa he a châ. Pachutuhpazy chhao kha Thlahpa Pathaihpa a vaw tlô khai tawhta riahpha kawpa ta thâtihpha cha phuah eita, “Eima hmôpa nata theipa zy cha rei lei thei lei y mapi”(Hmt. 4:19) tahpa ta ama reipa eima hmô hra.

Krista Thâtihpha he a rôhnah hmeihseih tlaina, rei lei thei leipa thâhtihpha tlai a châ. Rawma sawhkhâ taola chaina daihti lia chhao amâ chalih khei thei leipa thâtihpha a châ. Thina taih alô ta ama vawsaona daihti liata chhao thâtihpha reina hawhta pachâ eita hmiaphao pha ngâsâ pata daoh eita, chakeihbarohhneipa pakah lia ama yna daihti liata chhao a ly kawpa ta ama y theipa he thâtihpha rei lei thei leipa vâta a châ tahpa eima pahno.

2003 râhchhôh liata ECM Awnanopa ta Myanmar Mission he hriapazao khao lei awpa taihta palôh chhâna ama hnei. He kyh vâta Rev. Vabeilua nata Mc. Chhiehrau he Sittwe ama vaw tlyh. Rev. Vabeilua ta a reipa cha “Mission field liata Marapa saw (13)taihta luh a pabu haw eita, hria lei thei thaipa châ khao vei.” tahpa ta ECM Assembly lia a report. Cha bie vâ tlaita atanoh taih ama hria pazaopa hawhta ei pahno. Keima LTC lia pachutuhpa ta ei yno daihti châ ta, ei palôhrupa ta ei chhypa cha “Kô 1996 ECM & MEC Joint meeting he Khazohpa ao ta namâ ngiapâ thei lei vâta a châ ei aw.” ei tah ngâ kaw hra.

Mopathaihpa Pawla ta cha Krista nata khapa hmâh miah pachhaih thei vei tahpa ta a reih. Châhrasala atanoh thokhazy cha chakâhna heta Krista nata miah a pachhaihpa hawhta eima hmô. Beihpari sôh he local thokhazy lia a tla pahnai ngâsâpa ta eima pahno. Achhâpa cha chakâhna heta Krista thâtihpha chhona nata miah a pachhaih thei tahpa ta rei theipa a châ.

2016 kô lia Mission Golden Jubilee taobâ awpa châ ta, he daihti lia cha eima chhôhkha keimo pôhkha chyuta thâtihpha he rei lei thei leipa taihta ei chho ma? tahpa eimâ mo pasia chyupa a châ bâ aw. “Rei lei thei châ vana, Rei lei thei châ vana, Krista thâtihpha he…”

Reipahmao awpa-

  1. Mission rai he MEC Assembly ta “Hria khao aw mapi” tahpa ta bie chhawh ha mawh sala nâma zaw kheita e na rei aw?
  2. Krista pahnona theilâpa cha Mission rai chakaona a châ tahpa nâ pyh thei ma?
  3. Thâtihpha ei chho vei khiah “Ei hu a po aw”tahpa bie he nâmo novâhna lâ tawhta reipasia chyu t’u.

 September (4)

  1. AWNANOPA MEMBER: (Lk. 19 : 9-10.)

Awnanopa tahpa cha a hy rai Zisu Krista a ngiapâpa maih khizaw chyhsana tawh a panano ta amo eihta ta y awpa ta awpa ama châ. Âmo khotlyna tlaita Zisu a ngiapâ ta ahro a piepa chyhsazy he Awnanopa member tahpa a châ. Hrâhhrâ ta pazysapa nata pachisa pata pangiapâ sapa châ leipa ta amo bie chhawhna tlai ta a vaw ngiapâpazy ama châ. Khazohpa chhao tlaita chyhsa khotlyna parao raruahpa ta Ano lâ aw beih vei. Chavâta Awnanopa member châna cha a ngiapâpa maih châ theipa a châ. Chavâta hawtizy ngiapâna châh a pahno mâh lei penawhzy he Bâti châna pachupa ta amâ vaw py tawhta Bâti pachâsapa ta Awnanopa member tahpa ta a pypa ama châ tyh.

Awnanopa member châ khai tawhta cha Awnanopa ta a zy awpa dâh nata ryhpa, ngiapâna nata taozie tahpazy he a zi cheingei awpa a châ. Awnanopa chhôh liata a ypa chyhsazy laiseihna nata hmasiena, hrona châta dâhryhpa cha Awnanopa ta a hnei cheingei awpa a châ. Awnanopa member zy zyh awpa dâh nata ryhpa cha Awnanopa pha n’awpa ta Zisu Krista mohta taopa a châpa vâta kyhpachâna, ngiachhiena nata ngâchhihna ta taopa a châ. Chavâta zy awpa phata, Khazohpa moh parôhnahsana châ ta, Awnanopa hmiphana chhao a châ.

Awnanopa member châ khai tawhta Awnanopa dâhryhpa a zy khoh leipazy ama y tita Awnanopa ta pakhata ta pachupa ta a chhorei tyh hra. Awnanopa cha chyhsa tlohlei chiehleipa zydua y pakhyna su a châpa pahnona chôta taopa a châ. Châhrasala pachuna nata chhoreina a py khoh raruah lei tuhpa khizawpa hawhta a hro thlâhha tuhpa cha Awnanopa chhôh tawhta papua â byuh tyhna daihti a y tyh. Chati ta cha Mt.- 18:15-20 chhôh liata Zisu biereipa zyh awpa â byuhna châh a y tyh.

Pawla ta Rom. 16:17-18. 1Kaw. 5:1-2 liata a reih hra. Cha tawhta taopa a châ khiah cha, amo châta pha awta Awnanopa tlâhna chhao a châ awpa kyh he a pha kawpa ta pachu hawpa a châ. Awnanopa cha Zisu Krista Awnanopa a châpa vâta a pathaih awpa a châ. Parutuhpa lôpu ta tao awpa chi châ vei(Mt 21:13).

Hiahrina –

  1. MEC Awnanopa ta chyhsazy he tah raruahpa ta awnanopa    member liata pangiapa ta napachâ ma?
  2. MEC Awnanopa ta dâhryhpa a hneipa he a phapa tlai a    châpa ta nâ pyh ma? Reih pasia teh.

 September (5)

  1. AWNANOPA CHA KHAZOHPA CHHÔHKHA A CHÂ: (Eph.2:19.)

Awnanopa cha Khazohpa chhôhkha a châ tahpa he biehrai parohpa tawhta a vaw thao hawpa a châ. Izarel kyh liata Izarel chyhsazy cha Khazohpa chyhsazy tahpa a châ. Abaraham a awna nata a chhihthana tawhta Mawsi awna nata Izarel puana, Kana pahrana taihta nata hrosohpazy liata bie a reipazy lia Izarel cha Khazohpa chhôhkha a châna â lâpasia kawpa a châ.

Biehrai parohpa liata Khazohpa chyhsazy tahpa cha Biehrai thiehpa liata Khazohpa chhôhkhazy tahpa a vaw châ. Bei Zisu thlahchhâ pachuna liata “Eima Paw avâ liatapa” tahpa heta Khazohpa cha eima paw châ ta, keimo he a chhôhkha sawzy eima châpa â lâpasia kaw. Pawla chhao ta Eph 2:19 liata “Nâmo zenitai zy atahmâ khichhaipa nata khitlyhpa châ khao leipa ei chi ta, Mopathaihpazy nata khih chhôhkha nata Khazohpa chhôhkha zy tlao nama châ haw.” a tah. Khazohpa vâta a dyhna nata a pôhkhana a vaw y tahna a châ.

Chhôhkhapa sawzy eima châpa vâta kyhpachâna, ngiachhiena, zawngiahtheina nata a ryhna a ypa a châ.Pawla ta 1Tim 5:1-2 liata “Machâ viapazy ra kha, paw hawhta tlao reipasao teh, satlia viapazy cha uhnawh hawhta, nôpi viapazy cha nô hawhta, laihsa viapazy cha pathaih ngaitapa ta sietanô hawhta.” a tah. Awnanopa a ryh leina he o chhôh a ryh leina châ ta, o chhôh a ryh leina cha laiseih/ hmasie leina a tlô khei.

 Hiahrina –

  1. Awnanopa he Khazohpa chhôhkha eima châ khiah khazia    e lahpinô eima paru tyh tly? A pathaihpa ta a pakia awpa           pha vei ma?
  2. Awnanopa he chhôhkha tawh a pôhkha lymâ thei n’awpa    ta kheihta eima tao aw?

 September (6)

  1. AWNANOPA TAOVYUH: (Mt. 25 : 31 – 45.)

Awnanopa he a hro khiah ta cha taovyuh mia(4) a hnei. A thi khiah ta dei pahno leipa a châ. Cha taovyuh mia(4) zy cha –

  1. Khazohpa a chhyna
  2. Krizyhpa pathaihna liata laiseihna
  3. A nawh chaipazy liata chakaona
  4. Thâtihpha chhona zy he a châ.
  1. Khazohpa a chhyna he Awnanopa hnatlâna nata hrona a châ. Khazohpa a chhy khoh leipa chyhsa cha hmotaona liata diah lymâ awta, a chhâna liata a thi khei aw. Abeipa Zisu hmâhta a chhyna o a pangai lymâ tahpa a châ (Lk. 4:16). Pawla chhaota Awnanopazy hnohta “Keimo Krista liata hnabeiseihna a hneipazy pi heta a rôhnahna reithaina eima châ thei nawpa ta” a tah. Khazohpa a chhyna he Khazohpa reithai palyupalihna dei châ leipa ta nohto eima hro tha a patlôna, thazâh thiehpa eimâ lana a châ. Achhyna heta eima nohto hro lâthlôhdopa lia miah a chhihtha tyh. Khazohpa hmiakô liata eima vâ tyupa dei châ leipa ta, Khazohpa chhôhkha eima châlâhpa uhnawh sietanôzy eima tyudua lâhna chhao a châ hra.
  2. Krizyhpa a hyrai ta a laiseihna a y vei khiah a thi hai tahna a châ. Chyhsapa cha a machâ haw khiah a lai a chhâ haw tahpa a châ. Anodeikua la Awnanopa cha â ngiapâna a lai a chhâ haw tahpa a y awpa châ vei. A laiseih lymâ awpa a châ. Khazohpa bie â chu via lymâ awpa a châ. Nohto ngiapâna hro he a thieh lymâ awpa nata â hra lymâ awpa a   châ. Awnanopa he vahtie kiah liata tholopa hawhta châ ta, theiphapa a pathei lymâ (Hla.1:3).
  3. Mt. 25: 31-45 bie liata Zisu biereipa he awnanopa zy taolei theilei awpa hmo a châ. Awnanopa ta a daithla chachei lei awpa cha a nawhchaipazy liata chakaona he a châ. Zisu chhao tlai ta he raihria he kô(3) chhôh a hria via chaipa a châ. Kô 2000 khôna taihta a nawh chaipazy liata chakaona rai a hria chaipa he khizaw liata Awnanopazy ama châ lymâ. A hrapa, a hrohpa Awnanopa ta he hawhpa he a tao via pachaipa a châ.
  4. Zisu bieta hnoh chaipa cha “khizaw zydua liata sie ula, pho to pachupazy ta tao ula, hmotaopa zydua hnohta thâtihpha chho teh u.” tahpa a châ. He bie he bietapa, biepiepa châ ta, taoleipa ta chahrih thai awpa bie châ vei. Awnanopa ta thâtihpha a chho leipa cha a thipa a châ. He Zisu bie vâ he ta Pawla chhao a hu po khei kawpa ta a reipa a châ (1kaw. 9:16).

Reipahmaoh awpa-

  1. Awnanopa taovyuh zy liata na tao via tyhpa nata nâ phahla viapa zy reih teh. Nâ phahla viapa zy kheih ta na tao via thei aw?

September (7)

  1. AWNANOPA BIEZYHPA; (1Kaw 2:7-8)

Awnanopa phupy miakha chyu he biezyhpa (Doctrine) zy, ngiapâna nata taozie zy a siapa ta a hnei chyupa a châ.

Biezyhpazy cha a tlâhpipa ta he hawhta a châ –

  1. Biehrai pathaihpa he Khazohpa bie a châ.
  2. Khazohpa pakha deita a y. Ano dei ta he a chhy awpa a châ.
  3. Khazohpa pakha lia he ta manoh pathôh Paw, Sawchapawpa nata Thlahpa pathaipa tahpa ta a y.
  4. Alei nata avâ a chhôh lia hmo a ypa zydua he Khazohpa taopa sai a châ.
  5. Chyhsapa chapaw nata chanô he Khazohpa ta Ano a lyupa, Ano kakuapa ta a taopa a châ.
  6. Chyhsapa he ano khotlyna hneipa ta Khazohpa ryhpa parao ta moleina, raona liata â ngia haw.
  7. Moleina raona tawhta chyhsapa pachha heih awpa ta Khazohpa ta Asawchapaw matlupa Zisu Krista khizaw lâta a vaw tuah.
  8. Khazohpa ta Zisu Krista liana chata chyhsa zydua hnohta pachhana he a saipa ta a pie.
  9. Thlahpa Pathaipa ta chyhsazy hnohta Zisu he amo beipa nata pachhatuhpa ta a py awpa ta pahno pasiasa ta, a bao hra ei.

10.Zisu Krista ta a taopa sacrament(hmoziehpa) miano y ta, Bâtina nata Abeipa Zâpatizy he a châ.

11.Ngiapâtuhpazy pazaopakhypa ta Khazohpa a chhy awpa nata a raihria chakao awpa ta Awnanopa he paduapa a châ.

12.Nohchhâna noh liata athihpa thyuheihna, Krista â vy heihna nata khihnarâh ryureina a y aw. He biezyhpa zy he a tlâhpipa deita châ ta pahno byuh via khoh khiah ta cha MEC chakaona bu liata a y. A thei thai via heih nawpa ta Senior(A) a chuna bu, 2014. Rev. Dr. Vako ropa liata a y heih hra. MEC biezyhpa, ngiapâna nata taoziezy cha MEC chakaona bu liata palâsapa zydua he a tlâhpi chaipa a châ.

Reipahmaoh awpa –

  1. Awnanopa biezyhpa zy he na noh to hro liata na pachâpasia    tyh tlyma?
  2. Awnanopa biezyhpa zy nâ py zie, na hro liata a laiseihpa    ta nâ pahno ma? Na thlah a cha palôh khei ma?

September (8)

  1. MEC AWNANOPA TA A HNEIPA BIETAIHNA ZY;

(2kaw 7:1)

Biehrai pathaihpa liata biehraina nata bietaihna he a pahlao-pahli kawpa hawhta a châ. Chho pasia awpa ta daihti miah a daih aw vei. Chavâta atahmâ MEC awnanopa chakaona bu liata eima hneipa, tao awpa ta Khazohpa nata chyhsapazy hmiakô liata bie eima taihpa bietaihnazy a chyuna lâta eima palâsa tua aw. Awnanopa sahlao zydua tao awpa bietaihna nata chakaotuhpazy tao awpa bietaihna tahpa ta chino ta pachhaih theipa a châ.

Awnano sahlao zydua a ô-pa bietaihna zy deita eimâ chu tua aw.

  1. a) Dyhchâ kupatu bietaihna;

Vahpa nata lapinô likah thi noh pachhaina taih zyh awpa bietaihna zy a châ. Keima ta nâma he ei lapinô/ vahpa châta ei cha hnei. Vaipa ta, phaviana lâ ma, pha leiviana lâ ma, hneiviana lâ ma, sipasa viana lâ ma, tlâh nota nata tlâ lei nota chhao na kyhpachâ awpa ta, nâ palyupalih awpa ta na châta ngâchhih awpa ta atanoh tawhta thi noh pachhaina taihta Khazohpa raopa bie pathaihpa hawhta ei khohpa vâta ei ku ta na ku patupa ta bie liahsa ei châ taih.

  1. b) Sawhlâna bietaihna; Nôpawzy ta hawti châta bietaihna a châ. He hawti he Zisu Krista cha ano beipa nata pachhatuhpa châta a pahno thei nawpa ta, Krista ngiapâna kyh lâpi dopazy, a siana kyhzy nata a biepiepa pathaihna kyhzy cha hrozie ta hnei ta, pachu lymâ awpa ta atahmâ he he hawti mohta bie liahsa ei taih.

He a chô liata dyhchâ kupatuna bietaihna nata saw hlâna bietaihnazy he eima pachâpazih tly ma, eima thai tly ma, eima thai vei khiah a pei kaw. Thai cheingei awpa a phapa a châ.

Reipahmaoh awpa –

  1. Nôvah bie liahsa a taih hawpa tlaita khapa vâta amâ chhaih tyh tly? Ahy pha leina vâta e? Nôpinôvah ma, chhôhkha ma, vaih tlâh ma, khizaw hmodâh ma?
  2. Eima sawzy châta bie liasa eimâ taih hawpa ta khapa vâta e saw moleipa, rei ngiah leipazy ama hluh kaw tly?

September (9)

  1. MEC AWNANOPA BÂTINA PACHUNA;(Mt. 28:19-20)

MEC Awnanopa ta bâtina nata Abeipa Zâpati deita he hmozeihpa (Sacrament) ta â pyh. He liata bâtina he zopha kawpa ta tao awpa chi a châ. Local thokha zy ta eima sawnawhzy siku kiana lâ ama siebâ awpa vâta “ Biatuhpa y! bâti maniah pachâsa bâ teh.” ama tah tyh. Bâtina he a charâ charaohpa ta pachâsapa chi châ vei. Eima chakaona bu liata bâti pachuna he a pha ngâsâpa ta ro khaipa a châ. Local luhpazy ta bâti a châ awpazy he a chyhchai ta thlakha pachu cheingei awpa a châ. Thokha pachutuhpazy ta a pararo heih ei ta “Ama chahiahripa zydua ei ngiapâ, ei pyh tah ula, he deikua he namâ vao aw” tah ei ta, bâtina bietaihna dei ta ama pachu tyh. Bâti ama châ chhâna a pahnopasia leina vâta thokha local zy lia eino lâta bâti a châpa ama y. A pei kaw.

He bâti pachuna he pachhana campaing a châ. Chyhsa zy pachha ama châ khai awpa ta pachuna chakaona a châ. He bâti pachuna heta kheih hawhpa chyhsazy e bâti a châ ei. Sacrament he khâpa e a châ. Sacrement liata bâtina he a yzie khâpa e a châ. Abeipa Zâpati chhao he khâpa e châ ta, khâpa e a pamosa tahpazy a chu awpa â byuh. Abeipa Zisu thlahchhâna nata Apostol zy bie ngiapâpa he pathaisa khai cheingei awpa a châ. Bâti châ tawhta hro chhôh my lei awpa bietaih sâ(5) he thaita tao cheingei awpa chita a châ.

He liata ro khao leipa pita mo pakha chyuta eimâ vaopa hawhta reih chyu sila, eima thai vei khiah eimâ chu cheingei awpa a pha aw.

MEC Awnanopa ta bâtina pachu ta bâti a pachâsa hawpa zy he pachha châ â pahno haw ei ta bâti ama châ hawpa vâta pachha ama châ haw tahpa khâ châ a ngiapâpa a châ.

Reipahmaoh awpa –

  1. Nama local liata bâti pachuna he zôpha kawpa ta namâ chupa ta nama pahno tly ma?
  2. Khâpa vâta e eima sawzy siku kia chy ta bâti châ awpa   namâ thei tyh. Ama sie hlâ via ta pachâ bei veih ei chi ma?

September (10)

  1. MEC AWNANOPA BÂTI BIETAIHNA; (Eph. 3: 14-15)

MEC Awnanopa ta bâtina he ti liata nypa tlyma, nyuta hrypa tlyma, chiehleipa peimawhpa liata a thiata thiapa tly ma he zy he ama hmâ thei khaipa a châ.

Bâti a châ awpa zy hnohta Apostol zy bienngiapâpa amâ ngiapâna kyh hiahripa a châ. Hiahri khai tawhta zawpi a duapa ta reipa a châ. Khazohpa khopa taopa ta a biepiepazy zyhpa ta hrochhôh cha rei awpa ta khona palâsapa châ ta, ngiapâna biezyhpa sia ngâsâpazy hiahripa a châ. He he doctrine a châ vâta ama thai awpa peimawh kawpa a châ.

Bâtina liata ngiapâna nata a hlâna palâsana bietaih sia kawpa tao cheingei awpa sâ(5) a y.

1) Zisu Khazohpa sawchapawpa kyh eina pachâpa vâta keima molei vyuhpa ta a thi. Hrienasu nata moleina liatapa eina pachha haw tahpa ei ngiapâpa vâta Ano kyh ei pachâ. Ei hro chhôhta Ano khopa tao lymâ awpa ta ei chhuah. Ano hnohta ei pôhpa liahsa ei pie.

2) Zisu thita a hro heihpa hawhta kei chhaota moleina lâ thisaipa ta hrophapa lâta ei hroh aw.

3) Chatawh cha keima dei châ leipata ei sôh nata ei piah, ei sa nata ei bia chhao Zisu eih a châ tahpa pahno thlâhhapa ta hiatlia leipa ta Khazohpa tovyuhpa ta khâ ei sopa aw.

4) Thlahpa Pathaihpa ta eina bao awpa ta, khizaw phasana kyh liahsa ei ro. Abeipa ta noh a raopa he cha-ypa ta, apakhy tyhpa ta, Ano palyupalih awpa ta achhô azâ ta eimâ thlâh haw.

5)Awnanopa sahlao phohryhpa zydua, Abeipa Zisu Krista palyupalihpa ta liahsa zypa nata reithai tyh pata ei y lymâ aw.

He achô liata bâtina bietaihna he Awnanopa mo pakha chyu châta eima byhnâ ton’awpa thabypa a châ.

Reipahmaoh awpa –

  1. Bâti a châpazy ta bâti bietaihna he eima tao cheingei hai, na tah ma? Eimâ phahla na tah ma?

2.Bâti bietaihna he eima byhnâ tona thabypa a châ tahpa he nâ pyh ma?

September (11)

A HRANA

  1. A HRANA YZIE ( Hla. 119: 25. Isai. 26:19)

A hrana he Thlahpa Pathaihpa raihria a châ. Chavâta Ahrana he Thlahpa Pathaihpa tawhta a vaw ypa a châ. Thlahpa Pathaihpa cha Khazohpa liata manôh a châ vâta Ahrana he Khazohpa tawhta a vaw ypa a châ.

Ahrana tahpa he Hebrai reihta mohchho mia(3) a hnei.

  1. “Chayah” châ ta, a yzie cha pahropathi heih, pahro heih tahna a châ.
  2. “Nathan” tahpa cha, a rao hawpa taopathina a châ.
  3. “Chasash” tahpa cha, pathieh heih tahna a châ.

Ahrana he French reih parohpa nata Latin reih ta cha “Re- vi,‘ve(rivai) tahpa châ ta, taopathi, pahra, pahropathi heih tahpazy ta yzie a hnei. Chavâta Ahrana he â chhuahna a hneipa a châ. Ngiapâna kyh liata thazeihpazy, a parao haipa zy, a paroh hawpazy, a thi haipazy, a môpazy hnohta pahro heihna, taopathi heihna nata pahra heihna a châ. Ngiapâtuhpazy pi eima pathipalôh liata Bei chaipa nata biehneituh chaipa he Khazohpa châ leipa sala, khizaw liatahpa miakha kha a châ haw khiah ta cha Ahrana he eimâ ngiah hmeihseih haw bâ tahna a châ. Ahrana byuh vei a tahpazy he ta A hrana amâ ngiah via pachai heih.

A hrana heta eima pathipalôh liata Khazohpa kyhpachâna maniah pahnosa ta, Khazohpa kyh miah a pachâsa tyh. Chavâta A hrana he Khazohpa ta ngiapâtuhpa chieh leipazy, thazeih thachhâpazy tha miah patlô ta maniah pahropathi heih awpa ta Thlahpa Pathaihpa maniah a hrythluna a châ.

Penticost a hrana kha ngiapâtuhpa chieh leipa nata riahchhiepa zy hnohta chaihhrai chahra kawpa, hmatlâh k’awpa ta daipathina a châ. Krista moh vâta thâtihpha chhona liata chheina, taolana nata thina taihta ngâchhihpa ta ama chakaopa a châ. Chavâta A hrana he thâtihpha chho chakao nawpa kyh liata hro thabypa peimawh ngaitapa a châ.

Reipahmaoh awpa –

  1. Eima Awnanopa liata khâpa vâta e A hrana a khohpa nata a khoh leipa eima y tyh tly?

2.A hrana a khoh leipazy ta A hrana amâ ngiah viana kyh reih pasia teh.

September (12)

  1. A HRANA TA Â CHHUAHPA RAIHRIA TLÂHPIPAZY

    (Isai. 26:19)

A hrana he Khazohpa ngiachhiena vâta Thlahpa Pathaihpa raihria châ ta, â chhuahna nata raihria hluhpi a hnei.

A hrana ta â chhuahpazy cha a ngiapâna kyh liata –

1) Thazeih panaopazy thapatlô heih awpa;

2) A mô hawpazy pahra heih awpa;

3) A rao hawpa, hmo paraopazy taopathi heih awpa;

4) A pavia hawpazy a chhipakhua heih awpa;

5) A thi hawpa, a thi haipazy pahropathi heih awpa zy he a châ.

A hrana ta a raihria tlâhpizy cha –

  1. A thipazy pahro heihna-

Khazohpa hmotaotheina cha a thi hawpazy a pahropathi heih theipa hawhta ngiapâna hro liata a thi hawpazy hnohta Thlahpa Pathaihpa ta pahropathi heihna rai a hria.

  1. Hro taopathina –

Mo pakha hro, chhôhkha hro, khihtlâh hro nata râh hro a rao haipa zy he Thlahpa Pathaipa raihriana A hrana ta tao pathi heih awpa ta a byuhpa a châ.

  1. Thlahpa ta pabiena nata riahphana –

Ngiapâtuhpa ta A hrana a vaw to ha tawhta cha Thlahpa Pathaihpa ta biekato haw ta, riahpha ngaitapa ta â dua thei haw. Krista vâta china rai hnei khao vei.

  1. Thlahpa lâ mopadeina –

A hrana ta ngiapâtuhpazy he thlahpa lâ mo pavâna nata mo padeina a pahneisa. Khazohpa khozie nata kho leiziezy a pahnopasiasa. Baongiahpazy nata thlahchhâ baongiapazy a pahnosa. Moleina pahno pasiasa ta hmophapazy a pahnopasia sa.

  1. Thlahpa Theilâpa Patheina-

A hrana cha Thlahpa theilâpa kyhpachâna zy, thaphana zy, a dyhna zy, nôphana zy, ngiachhiena zy, ngâchhihna zy, a reisina zy, a sôhsina zy nata phana zy thei pathei lymâna a châ.

  1. Leidiapazy saiheina nata chakaona-

A hrana heta thlahpa liata leidia haipazy thapasana nata saiheina pahneisa ta chakaona liata a tuapapua tyh.

  1. A pôhkhana nata a kaona-

A hrana heta kyhpachâna sapapua ta a dyhna, a ryhna nata a pôhkhana liata ngiapâtuhpazy a chhihtha ei.

  1. Patlâhna-

Sapa tlâh leina cha dawhtyzy ta patlâh tyh ei ta, sapa nata thlahpa chieh leina cha taotuhpa Khazohpa ta Thlahpa Pathaihpa hmâpa ta a patlâh thei tyh.

Reipahmao awpa –

1.Eima râh liata A hrana eima vâ tyhpa he â chhuahna nata a raihriazy    vâta ma? Lâ thlâh h’awpa vâta tly ma? Na pachâna reih teh.

September (13)

  1. A HRANA HE EIMÂ NGIAHPA A CHÂ; (Zer. 31:4,30:17.   Eps – 2:5)

Awnanopa thokha ta A hrana he eimâ ngiah leipa hawhta eima pachâ tyh. A hrana he Awnanopa ta kha ti noh raita eimâ ngiahpa a châ. A hrana a ngiah leipa hawhta a pachâpa awnanopazy pita tha viata eimâ ngiah viah pachai heih. Thlahpa lâ kyh liata chieh leipazy, thazeih thachhâpazy, mochaopazy, nahpâpazy, kusy pheisypazy tha patlô ta patlâh heih awpa ta cha a hrana he eimâ ngiahpa rai a châ.

Chaihhrai hmâ tlâh a châ khao leipa hawhta chakaona kyh liata thachhâpazy,panaopazy, riahchhiepazy thlahpa novâhna rai a hnei khao leipazy thâtihpha bie nata thlahchhâna zy liata phahlapa zyta Thlahpa Pathaihpa tawhta a hrana eimâ ngiah ngaita kaw. A hrana he thlahpa saohu (thlahpa hmotaotheina khaw) a châpa vâta achô lâta palâsapa hmô pha khai leipa zydua khi thlahpa saohu lâ soh ta daipathi a byuhpa rai a châ.

Awnanopa rei raoh khao leipazy, khih tlâh ryureihtuhpa nata awnanopa a raoh leina zy, khih tlâh hmasie leina zy, chakâhna nata pasana hluhna zy taihta a hrana he eima tlâh n’awpa ta a byuhpa rai a châ.

Izarei râh liata Ryureihtuhpa abei, Theihthaipa sahlao nata Hrosohpazy amâ kao thei khao leina liata rairuhna a tyh ei ta chariahpazy ta pahniepa ta sei taih amâ châ tyh. Ama râh moleina pôh ta Khazohpa ama tlei sai nata chakâhnazy nata hri-iahzy ta tlô thlu tyh ei ta thapi ta ama riethei tyh. Chatawh tahpa cha ama kua heih thei n’awpa ta Khazohpa Thlahpa ta Hrosohpazy hmâpa ta zikyrâna bie ama phuah tyh. A nahthlietuhpazy a boh ei ta, a papeisa lei tuhpazy cha ama leidia tyh.

Reipahmao awpa –

      1.Nama local liata A hrana namâ ngiahpa ta napahno ma? A kheih hawhpa vâta e â ngiah pachaipa ta napahno?

September (14)

  1. A HRANA EIMÂ NGIAHNA DAIHTI; (Hla. 51 : 12, 17:15, 85 : 6)

Awnanopa ta A hrana he khati noh raita eima peimawhpa nata eimâ ngiah kawpa a châ. Kheih hawpa duahmo liata awnanopa â dua haw nahta ma a hrana he eimâ ngiah tahpa he kô(50) hlei a hrana a vaw chhihthatuhpa Charles G. Finney ta he hawhta a reih.

  1. Awnanopa a tha zeihta, a tao awpa peimawh ngaitapa a pakhyna zy, thlahchhâna zy hôh khao leipata hla nata bie tlaichhaina, pasôna a hnei khaolei nahta a hrana â ngiah tyh.
  2. Awnanopa liata kyhpachâna zy diah ta, a pôhkhana zy raokei ta, a ei-chhiana zy a vaw bie habâ nata a hrana â ngiah tyh.
  3. Awnanopa liata Khazohpa lâ hlâta khizaw hmo tlaichhaina sasyh a thôh khona zy a vaw bie haw nata a hrana â ngiah tyh.
  4. Awnanopa liata moleina chinanopa (paritheina, a tlao kalina, a pheina a thlyuna) zy a vaw hluh nata a hrana a ngiah ta, Abeipa lâ kuaheih â byuh tyh.

5.Awnanopazy yna khih liata ryureituhpazy, Theihthaipa Chakaotuhpazy likawh liata a pôhkhana hlâta a chakhiana zy, a do leina, sia leina zy a vaw hluh nata a hrana â ngiah tyh.

  1. Awnanopa hrona nata chakaona liahmarih chaipa ta a châpa Râhzohpa(Mission) chakaona kyh liata diathlana, tha pasa khao leina nata saihei khao leina a vaw y haw nata a hrana he â ngiah kaw tyh.

Awnanopa he ngiapâna nata taozie kyh liata zô chhie kaw awpa rai châ leipa pita, khizaw liata noh chyh ta eima châh chhôh heta cha zô pha kawpa ta eima sie lymâ thei nawpa ta a hrana he eimâ ngiahpa rai a châ.

Reipahmaoh awpa –

  1. Atahmâ hlâ he MEC Awnanopa ta A hrana eimâ ngiahna daihti a châpa ta na pachâma?
  2. A kheih hawhpa vâta e eimâ ngiah viapa ta a châ aw tly?

September (15)

  1. KHEIHTA EIMÂ HRA THEI AW ; (Hla.3:19. Isai55:5-6)

Awnanopa cha A hra ta thlahpa bie awpa ta pachupa eima châ. A hrana he amâ ta chalei awpa â byuh tyh. Ti lopa ta â sâhna lâ lo leipata â hnaipa lâ a lo tyhpa hawhta, Thlahpa Pathaihpa raihria he a reisipa nata a panawhpazy lâta a loh tyh. Chavâta a hrana châta amâ eima pie awpa cha ;

  1. “Kei” A tahna pahleina nata keichheihna hro he a châ. He he a hrana thabypa a châ. “Kei” a tahna he kraws liata eima khaipâ ha tua leipa vâta Thlahpa Pathaihpa raihria a hrana he eima pakhâ tyh.
  2. Rona nata Abeipa lâta kuaheihna he a hrana châta hmo byuh tua chaipa nata lâpi peimawh chaipa a châ. Rona nata Abeipa lâ kuaheihna he â pazaopa a châ. Molei ro hrasala Abeipa lâ a kua hlei vei khiah a phahnaina y leipata, Abeipa lâ eima kua tah hra sala molei a ro hlei vei khiah phahnaina y hra vei. Moleina ro ta Abeipa lâ kua cheingei awpa he a byuhpa rai a châ.

3.Palôhrupa miakha phaopa ta phahnai ngiah ngaitapa ta nata khopasa ngaitana chôta a hrana a vaw tlô thei n’awpa ta “Thlahchhâna” he peimawh ngaitapa chhaichhi miakha ta a châ. Mothlih tla ngâna taihta thlahchhâ hr’ei sila, eima thlahchhâna ta a hrana â nua tlôh leipa khiah cha a hrana cha vaw tlô hlei aw vei. 2011 liana kha Dawlei local church liata hyutuhpa chhihthapa ta kôkha chhôh a hrana a vaw tlô thei n’awpa ta zâ tota thlahchhâna hneipa a châ. Kôchhâna liata a rarôh y kawpa ta a vaw tlô hmeihseih haw tlaipa a châ.

Lyuhneituhpa ta a chicheipazy châta vâsua nata diahti a tlaichhaipa hawhta chhituhpazy nata sahlaozy ta palôh raoh kawpa ta nata hmeihseihna kyhta a hrana ama hia khiah ta cha a hiana cha Abeipa ta a chyh-ei thlyu awpa a châ. A hrana cha thlahchhâna ta hia byuhpa rai a châ.

Reipahmaoh awpa –

  1. Eima local liata a hrana vaw tlô ta a diah pakhua ha tyhpa he khapa vâta a châ?
  2. Chhihthatuhpa thokhazy ta a hra penawh hnohta “Evangelist a y nota lâh ei chi, a sie nata lâh hoh khao ei chi va” tahpa ta ama tah tyhpa heta a pahra via tly ma? A padiahsa via tly ma?

September (16)

  1. A HRANA PHAHNAINA ZY; (Zer.31:4. Isai. 32:15-16)

A hrana he Khazohpa Thlahpa Pathaihpa raihria châ ta, Awnanopa chiehleipazy tha patlôsana, taopathina, pahrana a châpa vâta phahnaina nata a thôhna hluhpi a hneipa a châ.

A phahnaina nata  thôhnazy cha-

  1. Awnanopa hnôh a sypazy, thachhâpazy tha patlô ta a tao pathi.
  2. Thlahpa mochaopazy, nahpâpazy, pheisypazy, tlâh leipazy a patlâh sa.
  3. Awnanopa pahro ta, thapatlôsa ta, leidiapazy thapasana nata saiheina pahneisa ta Missionary zy a tua papua tyh.
  4. Riahphana pahneisa ta Krista moh vâta nata Thâtihpha vâta taola riethei taona nata thina chhao chi khao veih ei.
  5. Khazohpa bie nata hla tlaichhaina nata pahâna, thlahchhâ pahâna zy a pahneisa.
  6. A dyhryhnazy, reiraohnazy, a pôhkhanazy pahneisa ta, Khazohpa nata chyhsapa a ryhna, chyhsa nata chyhsazy a ryhna a tao.
  7. Khazohpa kyhpachâna pahmôpasiasa ta, vaihzy lâta kyhpachâna nata lopapuana a tao.
  8. Khih tlâh hro taopathi ta, a dyhryhnazy, a donazy, ngâchhihnazy a tlô khei.

9. Thlahpa Pathaihpa a hrana he ta chyhsa sy ta, moleipazy a vaw chhita, ama moleinazy a ngiahthaipa ta ama hro taopathi ta, awnanopa maluh chhao a papôhsa lymâ.

A hrana he khizaw liata a tlô hluh kawbâ. Penticost daihti tawhta atanoh taih Thlahpa Pathaihpa raihria a hrana he a chalih beih vei. A nai zuahluah pata zy, a rakhapa rarôh ypata zy, a rarôh y ngaita kawpata zy a tlô lymâ.

Kô zabie 18,19,20 zy liata Europe râh nata America râh zy liata a tlôpa a hrana kha a rarôh y kaw ta, “A hrana rarôh y kawpa” tahpa ta “ Great awakening” ama tah. Cha chata, Missionary hluhpi khizaw kaoki liata tuah papua lymâ ta, Mission society zy, Bible society zy, Bible College zy a tao papuapa a châ. Atanoh eima râh liata a thâtih eima pahâ kawpa NGO raihria chhao he a thabypa cha a hrana theilâpa a châ.

Reipahmaoh awpa –

  1. Eima râh liata a hrana a vaw tlô tyhpa he kheih hawhpa liata miah a phahnai khei via chaipa ta na pahno tyh?

 September (17)

  1. A HRANA DOPA NATA A THEILÂPA ZY; (Isai 58:12)

A hrana he Khazohpa ta Thlahpa Pathaihpa hmâpa ta Awnanopazy pahrana nata tha patlôsana raihria a châ. Anodeikuala sâh hry liata sâh pakheipa a hlaopa hawhta sâtâ raihria chhao â pahlaopâ tyh hrapa a châ. A hrana he phahnaina hluhpi a hneipa hawhta a sohsi awpa hluhpi chhao a hnei hra.

Tahmâ he a hrana dopa kyh a chu sila, he tawhta â do leipa cha hmôpapua eimâ chhuahpâ aw.

  1. A hrana dopa cha Biehrai bie pachuna nata a chakhia beih vei.
  2. A hrana dopa cha awnanopa mo pakha tlyma, a hluh via tlyma châta phahnaina tlô khei ta a taopathi tyh.
  3. A hrana dopa heta thazeih thachhâpa zy tha patlô ta chiehleipa zy patlâhsa ta, doh lei liata a mô hawpazy a pahra tyh.
  4. A hrana dopa cha pathaih ta, khohchhih ta, za â chhih tyh. Chi a chhihleipa ta, tymâna y hra leipata a dyhna nata thaphana tlô khei ta, theiphapa a pathei tyh.
  5. A hrana dopa ta awnanopa pahro ta, thapatlô ta, a palaiseisa tyh.
  6. A hrana dopa ta thlahpa lâta mochaopazy mo pavâsa ta, hmah phaohpazy a patlâhsa tyh.
  7. A hrana dopa ta thlahpa theilâpa kyhpachâna, thaphana, a dyhna, ngâchhihna, a reisina nata a sohsina zy a pathei tyh.

8. A hrana dopa ta a dyhryhna, a pôkhana nata a kaoraohna a tlô khei tyh.

  1. A hrana dopa ta kyhpachâna pa-iasa ta, leidiapazy saiheina,

thapasana hneipa ta Missionary zy a tua papua tyh.

10.A hrana dopa ta Khazohpa hla nata bie pahâna tlaichhai ta pasônazy pahneisa ta thlahchhâ pahânazy a pahneisa.

11.A hrana dopa ta biedopa pasôta, riahphana sa papua ta thina taih ngâchhipa ta a pa ysa tyh ei.

12.A hrana dopa cha chyhsazy sy ta, moleipazy patu ta a pangiapâsa tyh.

Reipahmaoh awpa-

  1. A hrana dopa tawhta a hrana do leipata na hmô papua theipa zy rei pahmaoh teh.
  2. Eima râh a hranazy liata â dopa ma a hluh via aw, â do leipa maw?

September (18)

  1. A HRANA A PAKHÂTUHPAZY; (Mk. 6:4-6)

           A hrana he Khazohpa hmosai piepa, Thlahpa Pathaihpa raihria a châpa vâta a vaw tlô lei nawpa ta a pakhâtuhpa hluhpi a y. Vaw tlô haw hra sala, to awpa khoh nata khohlei, a pahyhna nata a pahyleina liata â pahnieh ngaita heih hra. A hrana a pakhâtuh chaipa zy cha –

  1. Khazohpa nata a raihria a ngiapâ leina he hmoto pakhâna châ ta, a hrana a pakhâ via pachai heih.
  2. A hrana he hia awpa chi châ ta, a hrana hia leina he a hrana pakhâna a châ.
  3. A lôh leina he a hrana to leina châ ta a hrana pakhâna a châ.
  4. Chyhsa a ryh leina nata nawhtawna he a hrana pakhâna a châ.
  5. Molei palâhâh khoh leina nata a heisai kho leina he a hrana pakhâna a châ.
  6. A palaina he sâtâ raihria châ ta a hrana a pakhâ chaipa a châ.
  7. A pôhkha leina nata a kaoraoh leina he sâtâ raihria châ hra ta a hra a pakhâpa a châ.

Local miakha liata cha KNP zyta a hrana châta thlahchhâ tyh eita noh kha cha ama palôh pasa kawpa ta a hmâna tao thei awpa ta local standing comeeting lâ agenda ama tao. Local standing member zy ta “ KNP nawh agenda zy cha la peimawh bao vei.” tah ei ta biechhawhna taopa khao veih ei. Eino, eithôh agenda pangia taraw ei ta local ta â pypa thei tyh leipa vâ ei ta ama palôh pasa kawpa ta ama saw thyutlia nawhzy hrozie moh ei ta a rulâ ta mothlih dei ama pathla paru ngâ kaw. A châhta cha local standing chhao he a hrana a pakhâtuhpa liata â hlao haw tyh hra.

Reipahmao awpa –

  1. A hrana a pakhâtuhpa ta na pachâ tyhpa zy reih pahmaoh via teh.
  2. Achâh ta cha local standing meeting chhao he a hrana a pakhâ tyh hra tahpa he â do na tah ma, a do vei na tah ma?

September (19)

  1. MISSIONARY ZY TA A HRANA PAKHÂ LEIPA EI TA TLAO AMA MOPADO HRI; (1Kaw. 4:1)

           Hakha Missionary zyta cha a hrapa nata a lâhpa cha ano sasyh ta Baptist awnanopa tawhta â pabâ haw tahpa ta dâh tao ei ta, a hrana he khâ châ ama vaw pakhâ haw.

Mara Missionary zy cha awnanopa panaopachyu no a châ vâta tlyma a hrana he vaw khoh tu veih ei. Anodeikua local miano miathôh zy liata a hrana a vaw tlô haw bâ nota biatuhpa pastor zy pamopadosa ei ta report na ama vaw pie tyh. Report tawhta a chopa ta a phapa nata a phaleipa zy pathlua ei ta, a phapa maih tlâ a pyh ei ta, a phaleipa pakhâna châta dâh tao hlei hra veih ei.

Atahmâ pakhâ dâh a y leipa vâta Missionary zy daihti no tawhta atanoh taih eima râh nata awnanopa liata a hrana a tlô lymâ tyhpa he hmo rôhnah ngaitapa miakha a châ. Missionary zy pachâna nata taozie chhao he pha kaw ta za â chhih kaw. A ly tlâh nata palyupalih tlâh ama châ kaw tlai na. Missionary zy daihti no tawhta a hrana a vaw tlô laihpa he a tôhpi viapa ta cha “Â vy heihna” a hrana a vaw châ via chaipa ta ama reih tyh. Biechhotuhpazy vaw sa papua lymâ ta Kri a zyh mâ leipazy vaw zyh para lymâ ei ta kô(50) zubili daihti liata cha Mara khi to zydua Krizyhpa ama vaw châ khai haw.

Chavâta Mara râh liata a hrana a vaw tlôpa he a hrana dopa nata theilâpa a hneipa tah theipa a châ.

Reipahmaoh awpa-

  1. Missionary zyta a hrana pakhâ veih ei tahpa he nâ pyna dâh a châ tlyma?
  2. Mara râh a hrana ta Krizyhpa pachâsana a sa papua khiah cha Mara râh a hrana thyutôna he pha thlâh ha vei tlyma? Kheihta na pachâ tly?

September (20)

10.KÔ(50) ZUBILI A HRANA TA MISSION CHAKAONA A VAW SA PAPUA HAW;(Bieso. 24:11. Hmt. 26:18)

           Missionary zy daihti liata a hrana a vaw tlô hawpa he ta Krizyhna vaw tao papua ta kô(50) zubili daihti liata Mara khi to Krizyhpa vaw châ khai ei ta, zubili daihti liata râh pôhpa ta a hrana vaw tlô ta, a vaw sa papuapa cha leidiapazy kyhpachâna, saiheina nata veina a vaw châ.

Âmo cha Krizyhpa vaw châ khai hawbâ ei ta ama chheipâh chihro phohropazy Kri ama zyh mâh leipa he ama palôh a pasa ngâsâ. “Eima chheipâh sâh hria’pa hluhpi a hmoh haw” tahpa hla he ta ama pathipalôzy pahnie kaw ta, thokha zy ta a sa hmâhta sa thei thlyu aw veih ei. Ama mothlih pathlapa ta ama chapâ ngâ thlyu aw. Râhzohpa byhzy a pia laih ei ta, khih to ta amâ kheih laih no ta chhôh tota ama hneipa sôh nata thihzy, sahro awhvaw zy ama thyupa chhao ama palôh a eih thai hra vei. A vaw y mâh leipa taihta a thyu chhieliepa chhao ama y hôlô tahpa a châ.

Matu râh tawhta pathaopa ta Mission field zy vaw pahy lymâ ei ta atahmâ cha Khumi, Mru, Myokhami, Lemro, Asho, Hletu, Rakhine tahpa ta field hluhpi eima vaw chakao thei habâ. Kô zabie 18, 19, 20 na zy liata Europe nata America a hranazy ta kaoki liata missionary vaw tuah papua ta, Marapa chi chhao missionary rôhnahpa eima vaw hnei theipa he a hrana theilâpa a vaw châ.

Mara râh thâtihpha kô (50)na ta a hrana vaw tlô khei ta mission chakaona a vaw tlô kheipa he a hrana dopa nata patae ngaita pa vaw châ vei tlyma?

Chichyhpa nata phahla dyhchhiepa châ hr’ei sila pahrotuhpa nata pahratuhpa he Khazohpa Thlahpa Pathaihpa a châ vâta mission eima chakaopa he ta phahla dyhchhie via hlei hra mapi, tlala maohphyu hra mapi. A hrana a taotuhpa Khazohpa moh he reithaipa ta y mawh sy.

Reipahmaoh awpa-

  1. Mission chakaona a hrana he atahmâ eima pazao hai ma? Eima dia hai tlyma?
  2. Mara Thâtihpha kô zabie (1907 – 2007) a hrana kha a vaw tlô kheipa khâpa maw? Na pahnopazy reih teh.

September (21)

MISSION CHAKAONA

  1. MISSION CHAKAONA (Mt. 18:18-20, Hmt. 1:8)

           Abeipa Zisu a ngiapâtuhpa Krizyhpa, awnanopa a hy rai châta chakao nawpa kyh Zisu ta a sia kawpa ta a reih. Khizaw zydua liata sie awpa, thâtihpha chho awpa, a ngiapâpa maih bâti pachâsa awpa, chyhsa zydua a pachupa pachâsa awpazy he a châ. Maka châ bu liata cha pakawh via heih ta hmotaopa zydua thâtihpha chho awpa ta a reih. Zerusale tawhta pathaopa ta khizaw kaoki chhâna taih chho awpa a châ. He zydua heta Krizyhpa a hy rai chakaona liata y awpa a châzie a palâsa.

Mission chakaona cha awnanopa ta khizaw phôhryhpa hmâpa ta tlyma, sie pahliepa ta tlyma a hria nata deikua rairuna hluhpi â tyh tyh. A sie haipa khizaw châna hawhta awnanopa ta y a khoh nata cha rairuna cha a tlô tyh hra. Thlahpa leipata rai a hria nata cha hawhpa rairuna cha a y tyhpa a châ. Awnanopa cha a thi haipa khizaw châta a hrohpa bie a reihtuhpa a châ awpa a châ.

Awnanopa mission chakaona lai kawpa sâno a y. Thâtihpha chho awpa nata pachu awpa raizy a châ. Khazohpa ta chyhsa to Abeipa Zisu Kraws liata a taona sie pahliepa ta a kaoraohna a hnei khoh tahpa phuah lymâ awpa a châ. Cha hawhta thâtihpha chhao zô pha kawpa ta pachu lymâ awpa â byuh. He raihria miano he awnanopa ta ama chakao cheingei awpa chi a châ. Cha hlei khô ta awnanopa a hy rai ta a yna su to maih liata sidiahna taotuhpa, a ryhna taotuhpa, zawngiahna hneituhpa, a reisituhpa nata raizy liata kyhpachâna a palâsa tuhpa a châ awpa a châ. Cha hawh hra ta awnanopa cha Khazohpa a chhyna, hmopiena, thlahchhâna nata raihriana tota chakaona a hnei lymâ awpa â byuhpa a châ. Hmotaona a hnei leipa ngiapâna cha a thiruapa a châpa hawhta mission a chakao leipa awnanopa cha a thiruapa tlâ a châ.

Reipahmaoh awpa-

  1. Biehrai bie tawhta mission chakaona châta tha châ patlô chaipazy reih teh.
  2. Nâ ngiapâna nata hmotaonazy tawhta “Kei mission a chakaopa ei châ tlai na.” tahpa nâ hmô pasiana suzy reih teh.

September (22)

  1. MISSION (Pua. 3:10. Lk. 9:1-2)

           Mission tahpa hawhrawh he biehrai liata y taraw leipata a chhopasiana nata â chhuahna, a raihria zydua cha biehrai chhôh zydua liata hmô khaipa a châ. Mission tahpa he Latin reih “ Mittere” nata “ Mitto” tahpa hawhrawh tawhta a vypa châ ta, a yzie cha tua awpa, tuah tahna a châ.

Mission yzie he awnanopa liata a pyna chi nano nano ta a y. Roman Cetholic awnanopa ta chyhsapa nata hmotaopa zydua châta a phahnaipa rai zydua he mission ta amâ pyh. Chavâta social mission he ama pahâh via. A pôhkhapa awnanopa (Ecumenical awnanopa) zyta Zisu pachhana bie thâtihpha chhona nata hmotaona ta chakaona he mission ta amâ pyh. Chavâta ti nah tlâ â hmiepa ta mission chakaona ama pahâh via. Evagelical awnanopa zyta cha Zisu Krista pachhana thâtihpha chhona deita he mission ta amâ pyh. Chavâta mission hawhrawh vyuhpa ta Evangelism tahpa ta ama hmâh.

Biehrai a thaipazy ta evangelism nata mission he a lyu vei, evangelism hlâta mission he a kawh via. Anodeikuala a theology nata a hria papuana lia deikua a zao khi khaipa a châ ama tah.

Reipahmaoh awpa-

  1. Biehrai liata Mission tahpa hawhrawh y leipata â chhuahna nata chho pasiana a y tahpa he nâ kheihta nâ pynazie a châ?
  2. Mission yzie a pyna chi nanopa zy lia he ta nâma zaw kheih hawhpa a pynazie hema na ngia châ ryh khei via tly?

September (23)

  1. MISSION CHAKAONA TA Â CHHUAHPA(Zhn. 3:16. 10:10)

           Khazohpa mission chakaona he â chhuahna sianô ngaitapa a hneipa a châ. A leidia awpazy nata a thi awpazy tluata pachhana kipa tlyzaw hrona patosa awpa he a châ.

Cha raihria cha a hlao tloh thei nawpa ta hriapazihna chi hluhpi a ypa hry ta peimawh chaipa chi(4) ta eima palâsa tua aw.

  1. Krista pachhana a pahno mâh leipazy hnohta Khazohpa hmosai piepa ngiachhie pachhana thâtihpha bie pahnosa awpa.
  2. Zisu Krista pachhana thâtihpha bie thei ta a vaw ngiapâpa maih bâti pachâsa ta awnanopa padua awpa.
  3. A vaw duahpa awnanopa cha mohôhta, pachu ta, palaiseihsa ta, awnanopa pitlohpa pachâsa awpa.
  4. A vaw pitlohpa awnanopa cha mission chakaona raihria pahriasa heih awpa a châ.

He raihriazy hlao tloh lymâ thei nawpa ta Beipa Zisu ta he hawhta a reih. “Sâh hria awpa hluh kaw ta, hriatuhpazy ama chyh. Chavâta sâh hriatuhpa vaw tua thei nawpa ta sâhhria Beipa liata hiah teh u” tahpa ta. Khizaw maluh he zyhna phota pachhaih nota Krizyhpa ama hluh chai. Zyhna pho hropazy pahlyhpa hmiakô liata cha Krizyhpa maluh he a chyh ta dei a châ heih. Chavâta sâh hria awpa he a hluh ngaitapa tlai a châ. Hriatuhpazy ama chyh tahpa he hriatuh awpa chyhsa nata a hria nawpa chhaichhi taih palyh khaipa a châ. Hriatuhpa nata a chhaichhizy a hneituhpa cha Khazohpa a châ.

Hriatuhpazy a vaw tuah thei nawpa ta Khazohpa Thlahpa Pathaihpa pahrana he â byuhpa a châ. Chavâta mission chakaona châta a hrana he thlahchhâna ta hia byuhpa peimawh ngaitapa a châ.

Reipahmaoh awpa-

  1. Mission chakaona hriapazihna chi(4) hry ta MEC awnanopa he kha tai râchhôh eima pha chypa ta napahno tly?
  2. Mission chakaona a hrana he thlahchhâna ta nama hiah beih ma? Â byuh ma? byuh vei ma?
  3. Nama local liata a hrana ei khazie a tlô chy? Mission chakaona a hra a tlôpa ta na pahno tly ma?

September (24)

  1. MISSION CHAKAONA CHIZY (At. 12:1-3, Zhn. 4:34)

           Awnanopa he Khazohpa mission chakaona raihria awpa ta khizaw tawhta a nano ta aw papuapa a châ. Chavâta Mission he Khazohpa tawhta a vaw thaopa châ ta Thlahpa Pathaihpa ta a chhihthapa a châ.

Mission chakaona châta chhaichhi hmâpa chi hluhpi a ypazy hry ta a tlâhpi viapazy eima palâsa aw.

  1. Biechhona ta chakaona

        Biechhona ta chakaona he biehrai parohpa liata cha Hrosohpazy he ama vaw châ via chai. Zisu Krista chhao he biechhona ta a chakao pathao hra. “Khazohpa khihnarâh â hnia haw, a tlô haw, ro ula thâtihpha cha a ngiapâ teh u.” tahpa ta a chho pathao. Apostol zy chhaota Zisu thina nata thyuheihna thâtihpha bie chhona ta ama hrona tlokhuh ama hmâh khai hra.

  1. Thlahchhâna ta chakaona

Ngiapâtuhpa a hy rai chieh leipa, mochaopa, pheisy kusypa nata machâpa zydua ta mission chakaona liata a hlao khai awpa eima châ. Thlahchhâna liata cha a lei thei leipata a hlao thai khaipa a châ. Notla awnanopazy nata Korea awnanopazy ta mission chakaona liata ama hlaotloh chainazy liata thlahchhâna he peimawh kawpa miakha ta ama reih. Thlahchhâna ta chakaona liata a lei thei leipata a hlao awpazy cha-

1)Hriatuhpa nata hriana chhaichhi a y lymâ thei nawpa.

2)Hriatuhpazy ta riahphapa ta thâtihpha ama phua lymâ thei nawpa.

3)Thâtihpha chhona daihti ryhpaohpa ama hnei lymâ thei      nawpa nata

4)Hrianasu thiehpa a kawh via lymâ thei nawpa.

  1. Hmopiena ta chakaona

        Biehrai parohpa liata Zerapha nôhmeipa kha, a viahchhâ chyhpa ta kha mission chakaona châta a châpa ta pahno thlyu aw vei. Anodeikuala Izarei râh liata Baal a chhyna pahleina châta hmo peimawh ngaitapa ta Khazohpa ta a vaw pachhuahpanohpa a châ. Atanoh eima hmo hneipazy he Khazohpa ta thâtihpha chho nawpa châta a pachhuhpanohpa châ vei eima tah thei aw vâ tlyma.

  1. A kaona ta chakaona

Awnanopa miakha deita ta pahnie thei lei awpa chakaona liata cha awnanopa phupyzy a kaopa ta a pôhkhana chôta chakao awpa zy a y. Atanoh khizaw lia ta râhkha nata râhkha awnanopa phuno hlâta hluh via zy ta a pakaohpa ta mission chakaona rai ama hria lymâ.

Reipahmaoh awpa-

  1. MEC ta kheih hawhpa chi he e eima tha tlô khei viata eimâ thôh khei via tly?
  2. Beihpari sôh he target patloh awpa ta nariah châ paphasa chaipa nata nariah châ pachhiesa chaipa zy reih teh(Beipari target nohkha ta saphâ my nyukha, zâ nyukha).

September (25)

  1. EIMA MISSIONARY ZY MISSION CHAKAONA (Lk.10:16-20)

Eima Missionary zy mission chakaona he a hrana tawhta thlahpa bieparu pahnosana ta chakaona a châ eima tah thei aw. Europe râh a hrana rôhnahpa vâta mission chakaona ama pahâh chaina daihti a châ. Khazohpa awna ao sia ngaitapa ama thei. Amâ ngâpachhâ awpa ta mission society zy a vaw saohiah taraw ei ta hlao tloh thei veih ei. Châhrasala ama chhôh liata thlahpa bieparu chata pa y molosa thei leipa ei ta, ama dyhchhie sipasa kawpa chhao ta viasa chyhtazy thlahchhâ khei awpa ta pahrua ei ta âmo deita ta amâ vaw thaopa a châ.

Ama vaw tlô tawhta ama tyudua nawpa nata ama raihria nawpa o lyu cha âmo ku pheita ta amâ vaw tao. Ama sawzy moh chhao Mara awzie ta a bie ei ta âmo nata âmo chhao Marapa ta apachâpa ta Marapa râh liata ama luh taih amâ vaw pabupâ khai haw.

Ama chakaona tlâhpipa chhao he biechhona, pachuna, hmotaona ta palâsana ta ama chakao. Bie he a hluhpi rei leipa ei ta daihti ryhpaohpa liata dei a peimawh kawpa ta a chyuta ama reih. Hmotaona ta ama chakaona he â lâ hluh via chai. Châzy vaw tao ei ta, pachu ei ta, Biehraizy palie ei ta, Holy Bible taih miah ama taopa. Ama yzie hâ a la awpa ta hmahsiena châta nie theipa thokô a lo ei ta, cha cha keimo a lo chyu hr’awpa ta miah ama pachupa a châ. Anodeikua Marapa ta â hia ta tlao eimâ hia tyh. Hnatlâna châta a pasipathaina nata thohnazy vaw phao ei ta keimo hra cha thina chhaichhi hawhta pachâpa ta tlao eima chi kaw hri. A dyuhpi ei(2) vâta mongyuhpa chyhsa, missionary hluhpi zy chhao ama râh lâ aw pakhuapa a châno chhaota kua chachei lei awpa ta chyutlâ a pachyu haw ei ta, Marapa thina liata thi hrata Marapa hrona liata hrohra awpa ta ama hrona khâ châ amâ hlâ haw. Chavâta “Marapa missionary(R.A Lorrain) zy chakaona cha hro tlokhuh a hlâna chakaona a châ” tahpa ta Rev. Dr. Vako ta a reih. Amâ hlâna ta atanoh eima awnanopa he Khazohpa ta kaoki taih miah a chaluah hawbâ.

Reipahmaoh awpa-

  1. Missionary zy chakaona tawhta na hro thlah châ palôh chaipa nata tha châ patlô chaipa zy reih teh.
  2. MEC missionary zy EM chakaona he eima missionary zy chakaona tluta eima hria papua theipa ta na pachâ thei ma? A chhâpazy reih teh.

September (26)

THÂTIHIHPHA TLÔ NOH

  1. THÂTIHPHA CHHOTUHPAZY PASÔNA;(1Kaw. 4:15)

           1Kawrini bô (4) chhôh bie he peimawh ngâsâpa a châ. Pawla chhao a chado ngâsâ pata a reih hra. Pawzy ta saw rei a ngiah leipa, a pahno thaileipa zy hnohta hihâh ngâsâ pata bie ama reipa hawhpa a châ. He liata Pawla paduapa Awnanopa liata biechhotuhpa a hropazy a vy ei ta, Pawla pachuna thailei ama pachâsapa vâta Pawla chhao a hihâh ngâsâna kyh a reipa a châ hra. A yzie cha kyhpachâna chôta riethei hluhpi taopa ta thâtihpha cha chhopa chakaotuhpa ma bie hmeihseihpa a reih aw, a châ vei khiah a palai kawpa ta “Kei ei thai, ei pahno” tahpa ta bie a reipa chakaotuhpa ma bie hmeihseihpa a reih via aw? tahpa rei pasiana bie chhao a châ hra. He vâta Pawla ta “ Kei Pawla he nâmo châta thâtihpha kyh liata nama paw ei châ.” tahpa ta a rei pasiana chhao a châ hra. Bo 4:10-13 chhôh liata thâtihpha vâta a rietheina kyh a rei ngâpa chhao he,“Kei Pawla he nâmo kyh châ pachâ hmeihseihpa ei châ.” tahpa bie- veih lâta a rei ngâpa chhao a châ hra. Chavâta thâtihpha chakaotuhpa tahpa cha kyhpachâna vâta thapasana lai ngâsâpa a hneipa zy he ama châ tahpa ta rei pasia theipa a châ.

Thâtihpha chhotuhpazy he, khâpa vâta eima pasô aw? khâpa he maw eima pasô aw? tahpa hiahrina hneipa châ mawh sala, a bie hlâta thapasana he pasô via awpa a châ. Thapasana a hneipa chakaotuhpazy cha ama hro nata ama bie he hmaokha ta yta pachhaih thaipa châ vei. Eima Beipa Zisu Krista chhao bie deita rei leipata Kraws liata a thipa he kyhpachâna thapasana vâta a châ. He vâta Zisu Krista thâtihpha cha Kraws thâtihpha ama tah tyhpa a châ hra.

Cha hawhpa thâtihpha chakaotuhpazy cha, Khazohpa ta â châh kheipazy ama châ. Luka 10 : 16 liata Khazohpa tlaita amo châh khâchâ â châh hawpa eima hmô. Khazohpa ta chhiesa theina, byhnâ pie theina biehneina chhao a piepa ta eima pahno. Hmt. 5 : 5 chhôh liata Pity chhiesana vâta Anania a thipa hmô pita, Hmt. 3:7 liata pheisypa a patlâhpa ta eima hmô hra. Chavâta thâtihpha chhotuhpazy he pasô lei thei thaipa châ veih ei. A chhâpa cha Khazohpa tlaita a chhâh â châh kawpazy ama châ.

Kaokha lâ liata 1Kaw. 4:15 bie he, thâtihpha chhotuhpa tahpa hlâta missionary zy he a cha khi via. Keimo Marapa châta cha Vailimapaw chhôkhazy hawhpa he a châ. Vailimapaw he khâpa bie ma a rei tahpa hlâta khatlu riethei taopa ta ma Marapa râh lia thâtihpha a chho tahpa he a peimawh via. Khizaw liata missionary hluhpi y hra sala, Vailimapaw hawhta hrona tlokhuh a piepa he ama chyh ngâsâ aw. He tlai he Mara sawzy eima vâ hnei chaina a châ. Rev. Dr. Vako ta “Vailimapaw thâtihpha cha ‘Tlokhuh hro a piena’ tahpa he a châ.” a tah hrapa a châ.

2011 ECM Assembly, Chapi liata Rev. Vaili kaw tlô ta MEC vyuhpa ta Sabyh local ta patiniena ama taopa. He daihti liata Rev. Vaili ta “ Nâmo he byhnâ tona lâthlôh nama pahno kaw.” tahpa ta a reih ama tah. Eima missionary hnôhchaipa tlai chhaota, ‘Byhnâ a pie theipa nata chhie a sa theipa ei châ’ tahpa he â pahno hmeihseihpa hawhta ei pachâ. 2013 November liata Rev. Vaili lâ a lyna bie reina kyhchhi Saiha Meisa vaih local church liata hnei hei eita Rev.Vaili ta, “Keimo la eimâ phuh lei ngâsâpata palyupalihna eima to.” a tah heih hra.

Chavâta atanoh Mara sawzy he eima vâ hnei hmeihseih. Thâtihpha ta miah a sapa missionary zy eima hneipa he a châ. 2014 liata Australia, Lutheran College liata thla(3) training ei hnei. He liata Luther pachuna he eimâ chu hra. Bie ama reipa zydua he Luther a reih ma, kheihta ma a rei tahpa he pa peimawhsa kaw ei ta, cha liata eima pachutuhpa ta a reipa cha “Luther Awnanopa liata Luther hlâta a thai viapa, a soh viapa ama y thai awpa châ vei.” tahpa ta eina chho. Chata tluta thâtihpha kyh lia ama pawzy ama pasôpa ei hmô nata kei chhao novâhna hluhpi eina pie hra ei. Mara awnanopa liata Vailimapaw chhôhkhazy hlâta a thai viapa, a soh viapa, a ngiapâ viapa eima y lei awpa he thâtihpha chhotuhpazy eima pasôna châ mawh sy.

Reipahmao awpa-

  1. Thâtihpha chhotuhpazy liata chhiesana nata byhnâ pietheina pavaosapa a châ tahpa nâ pyh thei ma?
  2. Thâtihpha chhotuhpazy pasôna nata Khazohpa pasôna he khâpa vâta pachhaih theipa a châ vei?

September (27)    

  1. MARA AWNANOPA MISSION CHAKAOPA THAONA

     (Mt. 9 : 37. Zhn. 4 : 35.)

Marapa râh liata a hrana hmiatuah chaipa cha 1934 kô ta Saiha khih liata a vaw tlô. 1935-36 rachhôh liata Rev. Za-eih nata Mizo chyhsa pa (4)zy atahmâ ta Myokhami field eima tahpa liana heta thâtihpha chho ama vaw chakao tua chai. Khizaw a dyuhpi ei(2)na vâta ama kaw kua pakhua haw. Chavâta he mission chakao pathaona he Mara râh a hrana hmiatua chaipa theilâpa tah ei sila chhei thlyu aw mapi.

1957-58 Mara râh Thâtihpha Golden Jubilee ta râh pôhpa a hrana chhao a vaw tlô khei. He a hrana heta leidiapazy thapasana vaw tlô khei ta, mission chakao awpa ta veina khâ châ ama vaw hnei haw. 1963 kô LIEC (Lakher Independent Evangelical Church) Assembly, Amôbyuh ta mission chakaona raihria pathao awpa ta vaw pathlu ta, Mission Board Committee ama vaw padua. He Mission Committe heta hmah vaw la lymâ ta 1966 kô ta hriatuhpazy vaw la ta Khami râh liata a vaw tua pathaopa a châ. Missionary hmiatuhpazy cha-

(1) Evan. Khôsâ (Tôkalô)

(2) Htp. Sôthâ (Dawlei)

(3) Rev. Reha (Chakhai) zy ama châ.

Rev. Reha nata Ht. Sôthâ zy he kôkha deita vaw chakao ei ta ama vaw bâh haw. Amo vyuhpa ta Rev. Thlachhau(Sosai) nata Rev. Viachha (Patheitlah)zy lapa ama châ heih. Evan. Khôsâ chhao he 1971 liata pasana vâta Paletwa thohna o lia a chakotuhpa Abeipa hnoh â vaw pahâ haw.Athlâsu chhao he Paletwa lia y ta, Paletwa MEC awnanopazy nata Khami awnanopazy ta ama pasô ngaita kawpa a châ.

Reipahmaoh awpa-

  1. Ahrana ta mission chakaona a sa papuapa tahpa nâ py nata py lei reih pahmaoh teh.
  2. Missionary zy ama raihria ama bâ sai tyhpa zy chôchâh na hmônazie reih pahmaoh teh.
  3. Mission liata luh a pabuna chôchâh na hmôzie reih pahmaoh teh.

September (28)

  1. MEC MISSION CHAKAONA; (Mt. 5:13-14.)

Mara râh thâtihpha kô(50)na a hrana ta mission chakaona a vaw tlô kheipa heta Mara awnanopa hrona hmeihseihpa a tao papua tah lei theipa châ vei. He raihria rôhnah ngaita pa hria awpa ta, Assembly ta 1963 lia Mission Committee vaw padua ta 1966 kô lia hriatuhpa a vaw tuah pathao. Headquarter liata chhao department eihpa hneipa ta Executive Secretary, Field liata Director nata missionary zy a vaw hnei laihpa a vaw châ.

MEC Awnanopa ta mission chakaona a vaw hneipa â chhuahna zy cha –

1) Awnanopa he missionary awnanopa a châ lymâ thei awpa,

2) Awnanopa sahlao zydua ta mission a chakaopa ama châ khai thei n’awpa,

3) Awnanopa he mission chakaona liata amâ hra lymâ thei n’awpa nata

4) Thlahhmih leidiapa zydua pachha khai thei awpa zy a châ.

MEC Awnanopa ta he a chhuahna zy hlao patloh thei awpa ta he hawhta rai a vaw hria heih.

1) Awnanopa pahrana

2) Thâtihpha chhona

3) Awnanopa paduana nata mohôhna

4) Pachuna, a chuna nata patlâhna

5) Khih tlâh hmasiena zy a châ.

MEC mission chakaona châta biepipa(motto) cha “Khizaw khaihpa nama châ”(Mt. 5:14) he a châ. He a chô lia tahpa raihria zy hria papua thei nawpa ta Headquarter Office, Evangelism & Mission department tawhta raihria kaono ta pachhaihpa ta hria pazihpa a châ. Chazy cha Home Mission nata Evangelical Mission zy a châ. Chavâta department moh chhao he Evangelism & Mission Department tahpa a châ.

Home Mission raihriapa zy cha –

  1. Awnanopa sahlaozy thlahpa lâ hro pahrana.
  2. Awnanopa sahlaozy mission chakaona liata amâ hlao lymâ thei nawpa ta pahrana nata thapatlônazy a châ.

Raihriazy chakao awpa ta Home Evangelist pa(4) nata Part time Evangelist(Mission Golden Jubilee Evangelist) pa(8) tahpa ta biechhotuhpa (12) hneipa a châ.

Evangelical Mission raihriazy cha –

  1. Thlahhmih leidiapazy hnohta Krista pachhana thâtihpha chhona.

2)   A vaw ngiapâ thiehpazy bâti pachâsa ta, mohôh ta awnano paduana.

3)   Awnanopazy sapa nata thlahpa lâ hmasie lymâ thei nawpa ta pachuna, a chuna, mohôhna zy a châ.

He raihriazy chakao awpa ta Director a vaona ry liata missionary (20) nata a râh chyhsa hriatuhpa (61)zy hneipa ta field sâ(6) liata local (112), odyh (1202), maluh(7428), middle siku (2), Primary siku (25) paduapa ta chakao haipa a châ. 2016 liata awnanopa maluh 10,000 (thykha) pabie cheingei awpa ta eimâ râpasua hai.

He chakaona liata kô (7)chhôh chakâhna a zao lymâ hra sala, awnanopa chhôhto tiama papuana hmasie lymâ ta, foreign MEC nata Mara awnanopa sahlaozy tiamana chhao â thu via lymâpa he mission châta eima byhnâ tona rôhnah ngâsâpa a châ kaw.

Reipahmaoh awpa-

  1. Home Mission liata Evangelist zy chakaona namâ thôhkheina zie reih pahmaoh teh.
  2. Evangelical Mission chakaona vâta na palôh lia kheihta a cha pa ysa tly?
  3. Kô(50) daihmâ liata maluh 10,000(thykha) chhao eima hmô thei mâh leipa he kheihta eima hria via aw tly?

September (29)    

  1. MEC MISSION FIELD ZY; (Mt. 28 : 19-20.)

Mission chakaona he Mara Awnanopa nochhi nata notla ta hmaoh kha ta atanoh taih chakao pazao lymâpa a châ. Eima chakaopa field zy cha atahmâ field(6) a pha haw. Eima vaw pathao- patona nata tahmâ duahmozy cha he hawhta a châ.

  1. Khumi field

1966 kôta Lialaipi liata mission committee hneipa châ ta, nochhi Mara tawhta Mc. Sotha(Dawlei), Rev. Reha(Chakhai) nata notla Mara tawhta Evan. Khôsâ(Tôkalô) zy tua papuapa châ ei ta Khumi field Tisi kao lia chakaona ama pathao. Mc. Sôthâ nata Evan. Reha vyuhpa ta 1967 tawhta Rev. Viachha(Patheitlah) nata Rev. Thlachhau(Sôsai)zy ama vaw tuah hei. Atahmâ he hriatuhpa (15)ta ama chakao hai. Local (33), Odyh (195) nata maluh (1134) ama pha. Primary siku sâkha chhao paduapa a châ hra. Atahmâ he âmota ta Khumi Evangelical Association tahpa ta amâ chhihtha hai.

  1. Myokhami field

1969 kô ta Kaisitlah lia Mission Board meeting hneipa châ ta, nochhi Mara tawh Rev. Rahlao (Chakhai) nata notla Mara tawh Evan. Hralai(Tisôpi), Evan. Lawbu(Sulôtla), Evan. Zasia(Sakana)zy ta chakaona ama vaw pathao. Atahmâ he hriatuhpa (12) zyta ama chakao hai. Local (13), odyh(41), primary siku (1), maluh(518) ma châ. He chiphozy he Mara mota Vâhkô chyhsa eima tah tyhpa kha ama châ.

  1. Mru field

He field he hnôh lâta cha a eihta pachhaih pachhuahpa a châ. A thaotuano cha Vâhkô râh tahpa ta hmaohkha ta pahlypa a châ. 1969 tawhta Rev.Rahlao(Cahkhai), Evan. Lawhbu (Sulôtlah), nata Evan. Zasia(Sakana) zyta ama vaw

chakao pathao. Atahmâ he hriatuhpa (17)zy ta ama chakao hai. Local (19), odyh(268), maluh(1573) a châ. middle siku (1) nata primary siku (15) paduapa châ ta, 2013 liata middle siku cha sawhkhâ siku ta a pypa a châ haw.

  1. Lemro field

           He field he Sawhlai râh eima tah tyhpa kha a châ. 1970 kô tawhta Rev. Thlachhau(Sosai) ta vaw pahy ta Evan. Thlabu(Para) chhao ta hmaohkha ta ama vaw chakao pathaopa a châ. Atahmâ he hriatuhpa (18) ta ama chakao hai. Local (28), odyh (410), maluh (2336) ama châ. Primary siku mia(3) paduapa a châ.

  1. Asho field

           He field he 1995 liata Pro.P. Chhaitu(Biethau,Tipa V) nata Rev. Daikô (Potia A)zyta ama vaw chakao pathao. Atahmâ local (3), odyh (25), maluh (300) châ eita, hriatuhpa (5) ta ama chakao haipa a châ.

  1. Hletu field

1996 tawhta CCI(m) awnanopa ta vaw chakao pathao ta, ECM nata amâ vaw pôhkha tawhta MEC-ECM joint meeting ta MEC a vaona ry liata a vaw pa ysapa a châ. Rev. Va u (Lelai), Evan. Lytu (Hloma)nata Rev. Awkho(Heimata) zyta ama vaw chakao pathaopa a châ. Atahmâ hriatuhpa (14) ta ama chakao hai. Local (16), odyh (258), maluh (1413), middle siku (2) nata primary siku (5)paduapa a châ.

Reipahmaoh awpa-

  1. Mission field sâ(6) eima hneipa heta MEC a riethei kheipa ta ma â lâ, a thôh keipa ta ma?
  2. Field thiehpazy pahy awpa ta châ mawh sala, nâ kheih hawhta na hria papua khoh tly?

September (30)   

  1. MEC MISSION GOLDEN JUBILEE; (Mt.5:14)

Mara Awnanopa ta mission chakaona a vaw pathaona 1966 tawh a laichadaipa ta 2016kô liata kô(50) a phabâ awpa a châ. Chavâta kô (50)na Golden Jubilee tao thei awpa ta kô(7) a byuhpa 2009 MEC General Assembly ta vaw paryhsa ta Board Committee chhao a vaw padua. Atahmâ he kô (2) nata khophie deita daihti eima hnei bâpa a châ.

He pakhypi he mission field eimâ ngiatua chaipa Khumi field nata a hnia chaina New Patheitlah local liata tao awpa ta 2011 Assembly ta a vaw paryhsa haw. Keimo MEC sai tao awpa a pha leipa vâta ECM nata Joint Meeting taopa châ ta, Joint Celebration ( A hmaohkha ta ) tao awpa ta paryhsapa a châ.

He Golden Jubilee châta raihria chhielie awpa peimawhpa hluhpi a y. Marapa cha hmoto he pachâpazih tua leipa ta miah a vaw tlô thlu nata â pahlawpa ta a hria para tyhpa eima hluh kaw tyh. Chavâta Golden Jubilee pahrana he local to liata fund tluana chhao pakaohpa ta Evangelist zyta ama hria haina daihti a châ. 2013-14 kô lia No. (1) nata No.(4) local zy chakao khai hawpa châ ta, 2014-15 kô he No.(2) nata No. (3) chakaopa a châ heih. Foreign MEC local zy lâ chhao chakao lymâpa a châ hra. He Golden Jubilee kyhchhi châ heta budget Tein (550) taopa a châ. MEC Tein (350), ECM Tein(150), EM Tein(50) thyu chyupa a châ aw.

A hmâna awpa zy cha he hawhta a châ –

  1. Khumi Evangelical Association Office Building he Ks.Tein (150) mâpa ECM ta a sa aw.
  2. Headquarter, Sabyhpi liata ES(mission) quarter he Ks. Tein(100)

mâpa MEC ta a sa aw.

  1. Pakhypi tlô nawpa Patheitlah liata (Khichhai peimawhpazy tlô nawpa) Pastor quarter Ks. Tein(70) mâpa he MEC ta a sa aw.
  2. A byuh hropa zydua he budget liata palâsanazie hawhta Ks. Tein(230) ta taopa a châ.

He Jubilee he Rev. Haidau(Senior Pastor) ta cha “ Pitlohpazy tao tlai awpa kyhchhi a châ.” a tah. He he eima chakaona eimâ saipazihna châ awta, thâtihpha eimâ palaikheina châ awta, miah a tuahtuhpa Zisu Krista moh eima parôhnah sana chhao a châ aw. Keimo atahmâ ahropazy pita chhâ kha liata ei kha deita eima tlôpa a châpa vâta hmo rôhnah ngaitapa nata sôh ngaitapa a châ.

Reipahmaoh awpa-

1.Mission Golden Jubilee he na palôh khei ta e a cha hria?

2.He jubilee châ heta nâ khei ta Abeipa lâta a lyna bie rei n’awpa ta nâ patohpatia tly?

 MARA EVANGELICAL CHURCH

Mission Golden Jubilee Estimated Budget

 

Income

  1. MEC ———————–            35,000,000/
  2. ECM ———————–            15,000,000/
  3. EM ———————–            5,000,000/

Expense

  1. Building (Paletwa) ———————– 15,000,000/
  2. Building(Sabyhpi) ———————– 10,000,000/
  3. Building(N.Patheitlah) —————– 7,000,000/
  4. EM Chronicles & Megazine ———- 4,000,000/
  5. T A. D A ———————-                        5,000,000/
  6. Jubilee Lôbô ———————-                        2,000,000/
  7. Decoration ———————-                        2,000,000/
  8. Music Board ———————-                        2,000,000/
  9. EM Video ———————-                        1,500,000/
  10. Palyupalihna ———————-                        1,500,000/
  11. Mei/ Biereina/ VIP ——————– 1,500,000/
  12. Calendar/ Hlabu ———————-                        1,000,000/
  13. T. Shirt/ Pohthâ ———————-                        1,000,000/
  14. Carry ———————-                        1,000,000/
  15. Â byuh hropa ———————-                        500,000/

Noh peinawhpa Programme

  1. September (3), 2014 Râhthiehpa noh

Biepipa     – Rei lei thei leipa Thâtihpha (1Kaw. 9:16)

  1. a) 2. 9. 2014(Achhuahdy zâ) –

Apakhyna & Bie a chuna a y aw.

  1. b) 9. 2014 (Râh thiehpa noh)

            – Mydi tlâh awna a y aw.

– Nohchho thapapuana/ thyupakhyna a y aw.

– (Bâti chiehpa zydua nohkha tha via a supa ta)

Zâlâ a pakhyna liata thyu pakhypazy hlâna/ byhnâ awna thlahchhâna a y aw.

  1. September (26) Thâtihpha tlô noh

Biepipa      – Thâtihpha chhotuhpazy pasôna (1Kaw.4: 15: 16)

  1. a) 9. 2014 (Achhuahdy zâ)

            A pakhyna & Bie a chuna a y aw.

  1. b) 9. 2014 (Thâtihpha tlô noh)

– Mydi thâtihpha a lyna tlâh awna a y aw.

– Missionary a lyna/ O tlô a chhuahdyna châta thyu pakhyna a y aw.

– Zâlâ a pakhyna nata Bie a chuna a y aw.

Remark: Programme he a pha thei chaina hawhta Local/ Mission board ta maohphaopa a châ aw.

Rev. S. Lathai

Executive Secretary

(Evangelism & Mission)