Khaipâ Noh (Good Friday)
April 10, 2020
Rev. Auko Choza

Biepipa: “A chheina hreichheihpa zy ta patlâhpa ta eima y haw”

“Châhrasala ano (Zisu) cha eima taopasina zy vâta hmah phaopa ta y ta, eima hmoparaona zy vâta thi padôhpa ta y ta; eima thlahlôhna awpa ta chhoreina cha a chô liata tla ta, a chheina hreichheihpa zy ta patlâhpa ta eima y haw” (Isai 53:5).

Hrosopa Isai ta a rei chhilipa “a chheina hreichheihpa” tahpa he Zisu Krista tho kraws liata keimo vyuhpa ta riethei taona, ahro hlâna awpa a rei khohna a châ. He bie chhôh zy tawhta hmaohkha ta pachâ khona hnei awpa ta Points ei vaw lakhoh kawpa zy cha ary lâzy he a châ.

1. Thina/moleina a ngiana (Sin)
2. Vyuhpa ta tho kraws kiana (Substitutionary)
3. Khazohpa palôtlâhna (Reconcitiation, Peace and Unity)
4. Pachhana (Salvation)
5. Pachha châna lei thei vei (Salvation can’t be losed)
6. Sapa patlâhna (Healing power)

1. Khizaw liata thina/moleina a vaw ngiana (Sin)
“Chhie nata pha pahnona tho thei deikua he na nie awpa rai châ vei. Na nie khiahtala na nie noh tlaita na thi thlyu awpa a châ, tahpa ta bie pie ta” (Athaona 2:17).

Khazohpa ta tho theipa nie lei awpa ta Adam hnoh ta bie a taihpa cha, Ada nata Ivy zy reingia leina vâta tho theipa cha a ma nie hawpa vâta moleina/thina he khizaw liata a vaw ngia haw. Moleipa zy cha apathaihpa Ida sadô chhôh liata y awpa Khazohpa ta apasai khao leipa vâta Ada nata Ivy zy cha papuapa ta, Ada vâta chhiesana khizaw liata a vaw ypa lâna chata a ma y haw. Ada chi pathlapa zydua cha eima mahpaw Adaa reingia leina/moleina vâta moleina seichâna liata eima vaw thi khai haw. Apei ngaita kaw.

Khazohpa ta amo kakuapa ta a taopa Ada nata ano deichhytuh awpa ta Ivy a tao noh liata a pha tah kaw tah, Aly ngâsâ kaw hra. Châhrasala Ada pathla zy ta chhiesana alei liata a ma vaw y ti ta, a ma moleina zy /hmo ama paraona zy vâta Khazohpa ta chyhsa taopa he a ngiapachhi ngâsâ kaw. (Athaona 6:6)

2. Vyuhpa ta tho Kraws (Substitutionary)
Biehrai parohpa liata cha molei ngiathaina awpa châta seina hnei leipa Viachao tôhpa zy, Mietaku tôhpa zy, Mie tôhpa zy nata Pivawzy ta kô kha ta ei kha atheihna a ma vaw hlâ tyh. Moleina hlao cha thina châ tlôh ta, tahpa hawh ta molei ngiathai theina awpa chaâa thisaih abyuh haw. Chyhsapa cha thisaih leipa ta ahro thei leipa eima châpa vâta Adam reingia leina vâta eima thlahpa athi hawpa kha hrona eima hnei thei heih n’awpa châta Zisu Krista thisaih a byuh haw tahna a châ.

He khizaw chyhsa zy pachha theituh awpa he khizaw liana he ta ahyhmâh ta y khao veih ei!! He daihti liata Khazohpa ta Asawchapaw matlupa a hnei chhôhpa Zisu Krista khizaw lâta miah a vaw tuapa kyhpachâna he arônah ngâsâ kaw. Abeipa moh reithai pata y mawh sy! Amen.

Ano (Zisu) cha Khazopa hawhta y ta, Khazohpa tluta ypa cha tlaichhai thei awpa ta rao leipa ta, chyhsapa zy hawhta vaw pipa ta, sei hawhta a tao ta, anosasyh ta tlao a panawh ta. Chyhsa hawhta vaw ypa ta a panaw ta, thina taihta reingiapa ta y haw ta, kraws liata thina tlai ta cha (Phi 2:6-8).

A mylâ ta Zawhana ta Zisu ano lâta a vypa hmô ta, “Mo teh u, Khazohpa Mietakupa Tawh khizaw moleina siekheituh awpa hu” tah ta. (Zawhana 1:29).

Krista chata eima Khazohpa nata eima Paw khonazi hawhta, atahmâ hlâ khizaw molei ngaitapa tawhna heta maniah a pachha thei n’awpa ta eima moleina vyuhpa ta anosasyh ta a pie ta (Kalatia 1:4).

“Krista cha eima vyuhpa ta chhiesapa ta ypa ta ryhpa chhiesana tawhtapa maniah a pachha haw; Tho liata khaipâpa mai cha chhiesapa ama châ” tahpa ropa cha tlôh ta. (Kalatia 3:13)

3. Khazohpa palôtlâhna (Reconcitiation, Peace and Unity)
Adam moleina vâta thina a vaw ypa, Khazohpa nata Adam pathlapa zydua hnohta thlahpa liata eima chhaih hawpa zydua kha, Zisu Krista tho kraws liata keimo vyuhpa ta â piena ngiachhiena vâta Khazohpa palôtlâhna a vaw tlô haw!! Khazohpa ta Chyhsazy hnohta adyhna (Peace) miah taopatuhps Zisu Krista moh he tlyzaw ta reithaipa ta y mawh sy! Amen.

Ano (Zisu) cha eima ryhna cha tlôh ta, ano chata apachhaina hmotao awpa zy liata biepiepa ryhpa a ypa cha. (Ephesi 2:14)

Akraws (Zisu) thisaih chata adyhna taopa ta ano liana chata ato ano nata a paryhsapa he, Khazohpa palôh châ ngaitana cha tlôh ta, ano liana tlai chata hmo a ypa zy chhao ano nata a paryhsapa he. (Kaolaosa 1:20)

Châhrasala Khazohpa chata a kyhpachâna cha reithai tlâhpa ta paluahsa ta,moleipa zy eima châ nota Krista eima vyuhpa ta a thipa vâna khata. Chavâta a thisaih ta thai pachâsapa ta eima y tawhna he ta, ano (Zisu) vâta Khazohpa hiehâhna tawhtapa cha pachhapa ta eima y tlai aw. (Rawma 5:8-9)

4. Pachhana (Salvation)
Zsu Krista cha ano Abeipa nata Pachhatuhpa ta a zopa/pyhpa (angiapâ pa) zydua cha pachhapa sawzy ama chá. Abraham chhao ta ABEIPA a ngiapaâna vâta siana ta raopa haw ta. (Athaona 15:6)

Ngiapâna vâta ngiachhiena ta pachhapa châ tloh ei chi ta; cha chhao cha nâmo tawhta a puapa châ leipa ta, Khazohpa hmosaipiepa a châ. (Ephesi 2:8)

“Khazohpa ta khizaw kyhpachâ ngaita ta, chatanachata a Sawchapaw matlupa pie ta, ano cha ahyrai a ngiapâpa maih leidei leipa ta, chhâzaw hrona tlao ama hnei n’awpa ta”. (Zawnaha 3:16)

Chhie nata pha pahnona a hnei mâh leipa hawtipa zydua deikua cha Krista tho Kraws liata chatlaina/ngiachhiena ry liata a ma y. Rei khohpa cha Adam nata Ivy cha Ida sado liata chhie nata pha pahnona tho theipa ama nie hlâ ta cha Khazohpa nata a zaona ama hnei lymâ tyhpa hawh ta, Zisu Krista tho kraws liata chatlaina ngiachhiena vâta chhie nata pha pahnona a hnei mâh leipa hawtipa zydua cha ama thi ti ta, Zisu Krista pachhana a ma to khai aw tahna a châ.

Moleina lâta zy thi hapat a, siana lâta eima hro thei n’awpa ta, ano tlaita a pôhpa ta tho liana kha eima moleina zy phao ta, Ano ama chheina hmahzy chata patlâhpa ta y haw ei chi ta, Mietakupa aleipa hawta nama leipa kha, atahmâ deikua cha nama thlahpa vaituhpa nata Hyutupa lâna chata nama kua haw heih hi!! (1 Pity 2:24-25)

Krista hnohta khaipâpa ta ei y haw; châhrasala ei hro; keima deikua cha khao vana, Krista cha keima liata tlao a hro; chatawcha atahmâ sapa liata ei hropa he, ngiapâna liata a hrohpa ei châ. Khazohpa Sawchapawpa, kyh na pachâ ta ei vyuhpa ta anosasyh a pie tuhpa ngiapâna liana chata. Khazohpa ngiachhiena cha khapahmaâ châ leipa ta pa ysa va na, ryhpa vâta siana a y tlôh khiahta cha Krista cha khâpahrao leipa ta a thipa a châ aw. (Kalatia 2:20-21)

5. Pachha châna lei thei vei (Salvation can’t be losed)
Zisu Krista cha eima Beipa nata Pachhatuhpa ta angiapâpa zydua maih cha pachhana ama to aw. Ama thlahpa leidia khao aw vei. Zisu ta “ama hnohta chhâzaw hrona ei pie, chhazaw ta leidia leipa aw ei ta, ahyhmâh ta ei ku tawhtapa na chhu hra aw veih ei”. tah ta. (Zawhana 10:28)

Ngiapâtuhpa zy (Pachhasawzy) liata pyno (2 group) pachhaipa a châ. Chazy cha:
(a) Thlah viapa ngiapâtuhpa zy nata
(b) Sa viapa ngiapâtuhpa zy acha.

(a) Thlah viapa ngiapâtuhpa zy cha khizaw hmo tozy hlâ ta Khazohpa Thâtihpha bie liata ama hrona daihti hmâ awpa he ama lyna chai viapa châ ta, Zisu Krista chakaona raihria liata chhao ta phahnai ama ngiah via ngâsâ kaw. Khizaw nôpona zy, rairuna zy, buabâna zy, chiehleina zy, mâchhiesana zy liata Khazohpa tawta thlahloôhna ama hnei pha ngâsâ kaw tyh. Zisu Krista ngiapâna liata amâ i ngâsâ kaw. Zisu ta “Lôpinô chô liata” nata “Leisahdi chô liata” O satuhpa zy pakhona bie hawhpa kha a châ! Thlahpa liata a-i kawpa zy cha lôpinô chô liata O sapazy hawhpa châ ei ta, thlihpi ta su ngâsa kaw hra ei sala, pahnie thei rai aw vei.

(b) Sa viapa ngiapâtuhpa zy he pachhasawzy (Ngiapâtuhpazy) cha hra ei ta, ama thi tita Vara ama kia hra aw. Achhâpa cha Zisu Krista he ama Beipa nata Pachhatuhpa ta liahsa amâ py (zo) ngiapâ haw hrapa vâ ta, Châhrasala khizaw hmo zy he Khazohpa Thâtihpha bie hlâ ta ama sapa palôhrupa ta a khoh via haw tyhpa vâta a châ. He hawhpa ngiapátuhpazy he leisahdi chô liata O satuhpa zy hawhpa ama châ. Rairuna zy, buabâna zy, chiehleina zy, nôpona zy, machhiesana zy amâ tyh ti ta, chi awh ei ta, ama chalyuh ngâsâ aw. Khazohpa Thâtihpha biezy hlâ ta khizaw hmo tozy liata amâ lyna a châ via haw tyhpa vâta a châ. Khazohpa taopa hmo tozy he ta alyna kipa miah a pie thei leizie a palâsa kaw. taopa hmozy hlâ ta, taotuhpa Khazohpa he eima byuh via tahna a cha.

6. Sapa patlâhna (Healing power)
Zisu Krista tho Kraws liata miah a chatlaina he sapa chhao mia apachhapa khai hawh tahpa ta ngiapâtuhpa thokha zy ta ama ngiapâ. He hawhpa pachuna he Biephua liata Zezebel pachuna doleipa hawh pa a châ. Tho kraws liata mia pachhsna he sapa pôhpa châta a châ haw khiahta cha, ngiapâtuhpa zydua hnoh ta pasana zy, nôponazy, buabâna zy, vâsâhna zy, mâchhiesana zy, thina zy he khizaw liata y khao rai aw vei. Châhrasala Zisu Krista cha atahmâ “COVID -19” pasana tawhta ei na vaih thlâh ha aw, tahpa ngiapâna cha apha ngaâsâ. Zisu eina vaih thlâh ha awpa vâta “COVID 19” ta apasa ngâhaipa zy nata akao hra sala, pei vei, tahpa ngiapâna zy he hmo yzie châ hra vei. Avai muh vy tahpa bie zy he eima chôta hmo atlô leina awpa châta “zikyu arâna” a châ hra.

Theithai via n’awpa chata, Zisu khitlyna lâthlôh liata Aphawhpa pahrawhpa zy ta “Zisu, Pachutuhpa y, maniah ngiachhie teh” tah ei ta, Theihthaipa zy lâta a kei pamosa teh u, (nama tlâh khai ha aw) tah ta. Ama sie hai noh chata Aphawhpa zydua cha vaw pathaih khai haw ei ta. Châhrasala ama hryta Samari chyhsa pakha ta a tlâh hawpa a pahno pata nahta, ao paro ngaitakawpa ta Khazohpa reihthai ta. Zisu lâta tlai vaw kua heih ta aphei thaby liata pao ta, alyna bie reih ta. Zisu ta a chhy ta, “Chysa pahrawh pathaisapa châ veih ei chi ma? Pachakipa zy kha khataih liata e ama y? tah ta.

He liata Samari chyhsa he thlahpa nata sapa miano tota apatlâh hawpa tah na a châ. Chavâta atlâhpa ta nata y molo thei khao leipa ta, Khazohpa reithai ta, Zisu lâta thlai a vy ta a lyna bie a vaw hlâpa a châ. Chyhsa hropa pachakipa zy deikua cha sapa deita ta patlâhpa a ma châpa vâta Khazohpa lâta alyna bie rei n’awpa pahno thai khao veih ei. Zisu lâta vaw kua khoh rai hra veih ei. A mo khona lâta a ma sie haw tahpa a châ.

Zisu ta atlâh leipa zy, mochaopa zy, napâpa zy, pheisypa zy, aphawhpa zy apatlâhna hmo no-âhpa hluhpi a taopa zy eima hmô. Athipa zy taihta a pathyupa zy eima pahno. He zydua he sapa ngiapâna vâta patlâhna (healing faith & power) a châ. Atahmâ thokha chakaotuhpa zy chhao ta (healing power) hneina taihta Khazohpa Thlahpa ta hmo no-âhpa eima hry liata atao laih lymâ hra.

Moleina seichâna vâta eima thlahpa thina liata eima y hai noh ta, Khazohpa ta kyh miah pachâ ngaita ta chatanachata Asawchapaw matlupa miah vaw pie ta, keimo vyuhpa ta tho kraws liata thi ta, ano thisaih ta miah chatlaituhpa Zisu Krista ngiachhiena eima topa he eima vâhnei chaina acha. Zisu Abeipa Zisu moh he tlyhzaw ta reithaipa ta y mawh sy! Amen.

Zisu Krista eima ngiapâna vâta Khazohpa hmiakô liata siana ta raopa eima châ haw. Zisu tho kraws liata keimo vyuhpa ta ataopasana/ngiachhiena vâta eima thlahpa tlâhna byhnâ eima vaw to khai haw. Mitakupa aleipa hawhta eima leipa kha, atahmâ deikua cha Zisu Krista ngiachhiena vâta eima thlahpa Vaitupa/Hyutupa (Khazohpa) lâna chata eima kua haw heih hi. Abeipa Zisu Krista moh cha chhâzaw ta reithaipa ta y mawh sy! Amen.

He Zisu Krista Pachhana thâtihpha bie a vaw reih theituhpa nama zydua hnohta Zisu Pachhana byhnâ vaw tlô mawh sy! Amen.

Rev. Auko Chozah
Mara Evangelical Church
Georgia – USA
April 8, 2020 (Wednesday)