MISSIONARY CHHOKHA ATHEITHLANA (Sep.26, 1907- 2024)
Mission tapa yzie cha “tuapa” tana châta, Paw Khazohpa ta a Sawchapaw matlupa Zisu cha chyhsa zy moleina (thina) tawta pachha ta chhâzaw hrona ama hnei thei nawpa ta khizaw lâta a vaw tuapa hawhta, missionary zycha “Zisu Pachhana Thatipha bie” phua awpata tuapa ama cha hra. Missionary tana cha “Zisu Pachhana Thatihpha bie apua kheituhpa” tana achâ.
Mara Missionary, Rev. Reginald Arthur Lorrain cha London khipi liata 1905 kô liata Lakher Pioneer Mission padua ta, September 26,1907 noh ta ama chhôkha ta Maraland, Saikao khi ama vaw tlô. September 26, 2024 noh he Mara Missionary chhôkha Mararâh ama vaw ngiana kô 117 tlona châ.
Khazohpa ta a chyhsa siapazy Mara râh lâ a vaw tua thlahapa he alypa achâ hmeisei. Missionary nata chhôkha zycha riethei sipasanazy papeisa leipata Krista nata a khinarâh châta thina taihta ngâchhi pata ama chakaopa vâta ama chô liata Mara awnanopa sahlao zydua ta ama ly hmeisei. Tahmâ Missionary zy cha thina lytlâ hmâta khôkhai ha hra ei sala, ama hmopha taona chakaona theilâpa cha nohkha hno nohkha a pathei via lyma.
Mara Evangelical Church Mission Director Rev. S Lathai tawhta July 31,2023 noh ta Report daona liata “MEC Awnanopa ta atuapa Mara missionary zy cha moh 18 pha eita, Mission field chhô tawhta a râh chyhsa chakaotuhpa zy (native workers) zy mo 42, ama zydua ta mo 60 ama pha” a tah.
Evangelical Church of Maraland Awnanopazy tawhta Mission Fields zy lâta Missionary ama tuapa/hriatuhpa zydua mo 200 ama pha tahpata ECM Facebook tawhta thatih daopa achâ hra.
Vârâh liata ryu pachôna bie, tlâhchô liata Zisu ta azituhpa zawpi zycha he hawhta a pachu, “Chhoma-u nata saiiepa ta niepa ta, parutuhpazy ta a ngia ei ta ama paru theina alei liana heta ryuzy a pachô khuh vy. Chhoma-u nata saiiepa ta a nie thei leina, parutuhpazy ta amâ ngia thei leina nata paru thei leina vârâh liata ryuzy tlao a pachô muh vy. Na ryu yna liata na palôh chhao a y aw,” (Mathai 6:19-21) ata ei.
Abeipa Zisu reipa, “Vârâh liata ryu pachô” tana yzie cha “chyhsa zy hnota thatihpha chhota Zisu ngiapâtuhpa ta taona” achâ. Apostle Pawla ta, “Eima Beipa Zisu â vy tita a hmiakô liata eima hnabeiseihna, eimâ lyna nata eima rônahna lakho a châ awpazy cha khâpa ma a châ aw? Nâmo (Thysalawnika liata ngiapâtuhpazy) he châ veih ei chi ma?” a tah. (1 Thy. 2:19)
Chavâta, Vârâh liata ryu pachô thei hra nawpata:
- Zisu pachhana Thatipha bie chhona raihria liata pôhpa cheingei ta a hlao hra awpa achâ. Kaonanopa ta reikhiala pôhpa tlaita sie pata Thatihpha chho awpa achâ.
- Pôhpa ta a sie thei leipa zyta thlachhana nata hneina soh piena ta thatihpha bie chhotuhpa zy chakaona deichhy awpa achâ.
Khitlyna khizaw liata hrona daihti buakha hnei chhô ta Khazohpa tawhta tlâna byhnâ eima topazy, thaina zy, sohna zy, novâhna zy, khisa rypaonazy, duahmo phapa zy liata byhna hlupi eima topa zy he Vârâh liata ryu pachô nawpa châta hmâ chyu awpa achâ.
Missionary chhôkha zy amâ lyna nata ama rônahna cha Mara Awnanopazy he ama châpa hawhta Mara sawzy ta eima lyna nata eima rônahna a châ hra awpa cha eima chakaopa Mission fields zy tawhta ngiapâtuhpazy he ama châ hra aw tahpa he my khah suh vy.
Mission Field zy liata hriatuhpazy nata lâhla/lâhnia tawhta mission chakaona a deichhytuhpa zydua hnota Khazohpa ta a thlaochhina byhna cha nama hnota patlôsa via rili mawh sy! Amen.
Pastor Auko
MEC GA Church Pastor &
Secretary, Mission & Evangelism
Mara Evangelical Church in America
September 26, 2024
0 Comments