Quarterly (May, June, July) Report piena

MEM Office duahmo

1. MEM office liata chakaotuhpazy cha, Director nata chhohkha maluh 7, Accountant nata chhohkha maluh 3, Cashier nata chhohkha maluh 3, Peon nata chhohkha maluh 6 cha pi ta eima zydua maluh 19 eima pha.
2. April chhana nata May thaona taihta he Assembly budget pasaina hawhta MEM Office ocho rahva diapathina nata MEM Quarter ocho rahva diapathina rai vaw hria pi ta eima vaw patlo thei haw.
3. May 10 tawhta Mocha Cyclone thlihpi a vaina chata patopatia byuhpazy patopatiana zy eima vaw tao. Thochiah thlu byuhpazy thlu pata ocho pa i byuhpazy nata chhaichhi pasopano byuhpazy liahsa pasopanopa a cha. May 12 nohta Office staff chhohkha hawti sahlaozy, khichhai chiehlei tlah leipazy nata nawh hneipa khichhaizy cha Kyauk Taw la achhai awpata Director ta a siekhei  ei. Thatlo viapa nata thyutlia via nawh zy he office compound liata ama y. May 14 liata thlihpi chhao miah a vaw pachhai pa haw hra. ABeipa phana vata ahy hmahta athipa nata hmaphaohpa y tla hraoh mapi.
4. Mocha thlihpipa ta eima compound chhoh liata o zy beihchhona o zy ochhi hluhpizy, ceilling zy thotheipako zy kudoh zy mei pavana zy nata ahropa didiahpa chhao hluhpi miah a paraopa khai holo haw. Compound liata a y pa eima zydua ta hata eino hlei chhoh tlai he pasipathaina raihria he tiamapata eima vaw hria.  Field lata hriatuhpa nawh sokha ama chhainy chy nawpata sinpaulin zy chalei phiepha pita hriatuhpazy nata nohmei zy khihsa rairu patlua peimawh viapazy eima paphao. Field lata chakaotuhpa thokha nata  Office Staff zy hmala kheipa ta eima field chhoh raokheina data la awpata khi thlai ama tlyh. Headquarters tawhta nata USA Church Council tawhta relief soh miah a ma vaw paphaopa he Sittwe bank pahy theipa a cha mah khao leipa vata Director ta Yangon la ta a va thaoh.
5. Pasipathaina raihria eima vaw pahnie via syulyu haw ba tawhna heta Office tawhta thlai hmah la pathaopata Myo-Khami field Secretary Quarter, Kyauk Taw liatapa he eima vaw sa pathao. Cha khai tawhta MEM Charity Home he vaw sa heih pita eima vaw pangoh tawhta Kanpu quarter, Taungmingala quarter nata Ngapuachaung quarter zy eima sa pazao laih hei.
6. Eima raihria nawpa relief hmiatuapa a vaw chha haw chy bapa vata noraih kawpata eima vaw y haina daihti liata Headquarters Office tawhta eima nopawpa Rev. Dr. Sikhaw, Associate General Secretary  ta eima Office taihta miah a vaw tlyhpa vata eima ly ngasa. Apohpa deita cha leipa ta Headquarters tawhta paphaopa Mission soh thla 2 hlao chata nata relief soh zy chhao miah a vaw phaopa hra.
7. Relief soh raina nata raihria pazihna chata Field secretary zy pahruapa ta noh 2 chhoh he AGS hyu pata meeting (June 21-22, 2023) eima hnei. Missionary 2 nata Sittwe local hyutuhpa chhao miah ama hlao thei hra.
8. Relief soh he Headquarters nopawzy pachhuahpanohna zie hawhta thlipi paraopa achhyna o nata quarter zy paraih pathina chata nata awnanopa sahlao zy odyhkha ta Ks. 90,000/-  chyu ta thlahchha kheipata rai thei awpata reipahmaohpa acha.
9. Thlihpi ta asu leipa field mia 3 zy liata awnanopa sahlaozy tawhta thlahchhana nata thyuna program hneipata MEM Office la relief soh ta paphao awpata rei pahmaohpa acha.
10. Field lata relief raina he June thla chhana hata liata Myo-Khami field la rai khai theipa acha. July thla thaona hata liata Myo field la rai khai theipa acha hra.
11. Thlihpi ta parao haw ta relief soh ta adaih mah khao leipa achhyna o nata quarter thokhazy he cha relief soh a vaw y khao leipa khiah ta cha MEM Central Meeting tawhta EMC lata Assembly Project chata agenda ta tlo khei ba awpata rei pahmaohpa acha.
12.  Awnanopa thlahchhana, thapapuana nata Hqrs nopawzy deichhy mohoh phana zawzi vata Hriatuhpa zy hlao nata Pesioner zy hla chhao he July thla taihta pie thei hawpa a cha vata chakaotuhzy ama thapha ngasata ama chakao tiama kaw sai.
13. July thla chhana hata liata MEC Home Evangelist Mch Vabeikhoh miah vaw chapia chho ta noh 3 chhoh miah ahma khei awpata thlyu pita miah ahma khei thei hrapa vata eima ly ngasa.

MEM Field chhoh duahmo

1. Asho field

Asho field liana he Missionary eima tuapa zy Rev. Daikau, Rev. Vabeiluah nata Pro. Pastor Sokhai zy mo 3 nata arah chyhsa chakaotuh Evangelist 3 nata Project Workers 5 zy ta ama chakao hai. Rev Daikau, Field secretary he pension chyta acha vata ngiachhiepata Ann liata napa y sa thlaha chy bei ula tahpa ahawna hneipata a y chy. Ano ynawpa Dalet Siankung Quarter liata Evan Baswe nata Prj. Khin mar Aye ta ama pahra. Ama pahrana Quarter he ko 2 hlei chhoh riapaih ta ma rasai hawpa vata araokei holopazy cha amo taka tata pariah eita varo ama chha hrapa a cha.

Ama missionary hmiatuapa Leader Paw chhao field liata luh apabu cheingei awpa ta March thla liana kha zatlo pakhua heih ta, atahma he Kanlet khih liata apahra hai nota tlaleina eikha avaw tyh ta Siankung liata thohna ta mohopa acha. A vaw tlah tawhta Ngaunchaung khih liata thatihpha chho awpata o miakha chalei ta a vaw y. Awnano thiehpa mo 8 he bati piepa ama cha. Tlaleina a vaw tyh heihpa vata Ann liata thohna ta amoho heihpa acha. Director nata chhokhano ta vaw vaih eita apasana he Hemoglobin ahnaitupa vata acha. A pavyhpi liata abyuhpa a ypa chhao alai via syulyu ngala pata pahnopa acha.

May 14 liata Mocha thlipi liana heta Kandaukyi nata Siankung zy liata Quarter nata Awnanopa sahlao ozy achyhta a parao holo hra. Office tawhta Sinpaulin chaleina rakha dei he chakaotuh lata phusa paphao thei pi ta, sahlaozy deikua cha amo tata ama paryhpapaoh holo hrapa acha.

July thlah chhana la liata EM office tawhta Director nata chhokhano ta Dalet chavah kao local church zy vaina vaw hnei ei ta, Lotung local church, Kanlet local church nata Siankung local church zy liata chakaotuhzy chakaona nata Nonawh nata Hawtinawhzy hnatlana training zy he su 3 liata ama taopa thei. Atlaleipa chakaona zy hneipa laih eita awnanopa sahlaozy thata ama ly ngasa. Lotung khih liata hawti kokhapa athlaw ru apako hawpa a vy khei eita, ABeipa baona vata a vaw tlah haw. Kanlet khih liata hawsaih thlano pa apakhupa vata ano sahpi apazy thei khao leipata ahuso chhao a riethei ngaitapa vaw cheih eita ABeipa vata a vaw tlah haw. Siankung khih chapaw satlia pakha thoko tawhta tla ta abyhpi ru aphi hawpa a vy khei eita Abeipa vata a vaw tlah haw hra. Paw pakha nata byhpi ru apahleipa satlia pakhapa chhao he Zisu mohta bati piepa ama cha hra.

2. Hlaytu Field

Hlaytu field liata missionary ta eima tuapa Rev Va u( Field Secretary), Mission Pastor Lytu nata Evangelist Emali zy mo 3 nata arah chyhsa mo 4(Rev. 1, Mission Pastor 1, nata Biehrai achu haipa Pro Pastor 1,) zy ta ama chakao haipa field ta acha. Vadua chhih kawpata eima ngapachha kawpa Evan. Win Myint deikua cha ama rah chipho phoryhpa hawhta lapino notho ahnei hawpa vata January thlapa tawhta araihria a bah hawpa acha.

 Panchaung khiparoh local church liata U Aye Tun Kyaw ta asaw chapaw thla 8 pa he tlaleipata Myinpya thohna o la za siekhei ta Minpya thohna o tawhta Sittwe thohna ola za sie khei para heih eita Sittwe thohna o liata apaha haw. Khapa hmah ahnei leipa ama chapa vata Myipya dawty ta Sittwe thohna o lata apohpa ta azachhihpa acha. Sittwe liata ri kiana, ri pasiena nata ama khih la ama liena taih chata Office tawhta deichhypa acha.

Chwechaung local hyutuhpa U Kyin Win he a sawchapawpa chhoh la tlaleina ahneipa vata Sittwe thohna o lata azu khei. Operation tao awpa acha haw. Ama chhohkha tawhta phusa ahnei tla leipa ama cha pa vata Office tawhta deichhypa a cha. Abeipa phana zawzi vata a vaw tlah haw.

Laytuh field chhoh liata hriatuhpa zy he amachy kaw bapa vata May 2, 2023 nohta  ama field chakaotuhzy nata MEM Office lia atyhna hneipa acha. Cha liata he hawhta bia pachhaih pathipa acha. Chwechaung bia he Rev. Va u ta a vao aw. Panchaung bia he MP Lytu ta a vao aw.  Sokat bia he MP. Than Maung ta a vao aw. Alepuzawh bia he Rev. Than Tun ta a vao aw. Ama pasie pa yna transfer deikua he term chhana liata pa ipa acha aw tahpa ta ryhrao kheipa acha. Ama field tawhta Pro. Pastor Lin Aung deikua LTC liata Biehrai achu pathi hai nota acha.

Atahma ama field liata ama bia chyu ta chakaona tiama ama papua lichih nota acha. Ama field Secretary pa Missionary Rev Va u nata chakaotuhzy chhithapa ta Alepuzaw bia liata ahmana hneipa cha ta awnanopa ama hra ngasa.

3. Laymyo Field

Laymyo field liana heta cha Missionary eima tuapa achakao nga haipa vaw y tla khao veih ei. Missionary Pension pa Rev. Thlachhau he Cheidaw(Kidaw) khih liata y ta, Rev Sauko he Hmuntanu khih liata nata Sayama Pawzau he Chaisanu(Khachanu) khih liata ama y. Tahma cha amo arah chyhsazy chakaotuhzy dei sai cha eita  mo 10 (Rev. 5, Mission Pastor 1, Pro Pastor 1 nata Evangelist 3) zy ta ama yna su chyu liata tiama ngasa pata ama  chakao hai nota acha.

Paisin khih liata cha ama field chakaotuhpazy chhithana ta Thyutlia zy music achuna nata Sunday school pachuna training pahlyhpata April hata hmiatuapa liana kha ama tao thei hra. Hmuntanu khih liata Awnano macha training nata Nonawh hnatlana training pakaohpa ta tao awpata thlah ama chha haipa kha sao nota cha lyu liata ama chah khai hawpa vata October-November thla rachhoh liata tao thei awpa ta pachhuapanoh haipa acha.

May thla 14 nohta apathlipa Mocha thlipi vata ama field chhoh awnanopa ozy nata achhyna o thokhazy arao holo hra. Boilawng khih achhyna o, Khamtho khih achhyna o nata Kyichaung khih achhyna o zy deikua he cha thata a raokei haw hra. Relief ama kadaih khao hra leipa vata a vaw y heih awpa relief zy a y thai bao khiah ta tahpata thlah chha khei haipa ama cha.

Laymyo biehrai he chhuh thei awpata patopatiana, edit taona raihriazy vata Rev. Bu Thein, Hmuntanu biatuhpa nata Rev Paul Mang Nai, LEC Yangon biatuhpazy  he May-July chhoh ta Bible Society of Myanmyar , Yangon liata raihriapata a vaw y. Biehrai thiehpa cha ABeipa baona vata nata Bible Society of Myanmar ta tiama papua kheina vata Edit a ma vaw tao pangoh haw. A bu ta chhuh awpa deita ama bah pa acha. Biehrai parohpa chhao thlai pazao thei heih awpa ta thlah ama chha haina daihti a cha.

Laymyo field thyutliazy he rah reka lata nata khipi nata rah hrola zy ta hlaosa ta ama sie khai hawpa vata ama rah liata nonawh, pawnawh nata hawti nawh dei sai ro ta ama y haw ba. Yangon liata local church miakha paduah eita ama hluhpa ngasa ba. Ama pakhyna su he Laymyo Field Gospel Kyhchhi nota budget amah ma laipa ta O chyhpata sakha ama chaleipa a cha. Ochhoh a buah kawpa vata ama pakhyna su acha ie ngasapata ama y.   

4. Myo khami Field

Myo-Khami field liana heta missionary ta eima tuapa achakao nga haipa Rev. Beichhitha(Field Secretary), Rev Awkho, Pastor Tehlie zy mo 3 cha eita, arah chyhsa chakaotuhpa  9 (Rev. 2, Evangelist 6, Project worker 2) zy ta ama yna su chyu liata tiama papuapa ta ama chakao nga sai nota acha.

May 14 liata apathlipa mocha Cyclone thlihpipa ru ngaitapa khata Myo-Khami field liata eima awnanopa sahlao odyh 95 nata Riapaih 0dyh 24 zydua 0dyh 119 pahrana 0 zydua phiephieh a paraokei khai haw. Achhyna 0 mia 3 nata  Quarters mia 9 zydua chhao phie aparao pakei khai haw hra.

Awnanopa Assembly Relief soh tawhta Quarters mia 6 nata achhyna 0 miakha zy deikua he May-June thlapa chhoh liata sa patlo thei chypa acha. He Quarter nata Achhyna o raopazy taopathina liata thapi miah aphia khei chaipa  Mr. Vabiethai, Mr. Senao nata Mr. Vabeiracha zy hnohta alyna thata eima hnei hmeiseih.

 Awnanopa sahlao 0dyh 119 zy hnohta chhao Hqrs relief soh tawhta 0dyh dyhkha ta Ks. 90,000/- chyu deichhyna ta pie theipa ama cha. Ama field chakaotuhpa Pastor mo pa 3 cheingei ama yna su taihta thlahchhana hnei kheipata ama pie laihpa acha. Niechhei achhyna O, Ngapyuachaung achhyna O, Kalachaung Quarter, Tethin Quarter nata Kacheinpyin Quarter zy deikua cha Relief soh ta miah a kadaih mah khao leipa vata sa thei mah leipa acha.

May chhana liata Evan Hla Zi Nu he Assembly pasaina hawhta Mission Pastor chata MEC Local church Sittwe liata Director ta chahnaona chakaona ahnei. Ano he ama field liata ngachhih ngasapa chata, chano pastor hmiatua chaipa chhao a cha.

5. Myo Field

Myo field liata missionary ta eima tuapa Rev. Thaiki, Rev. Khailua, Evan Vasoh,  Evan Neingie, Evan Laihe zy nata arah chyhsa chakaotuh 9 (Rev. 1, Mission Pastor 1, Evangelist 7, Project worker 1) zyta ama chakao hai.

May 14 nohta apathlipa mocha thlipipa liana khata Myo field liata eima awnanopa sahlao odyh 271 nata Riapaih 0dyh 34 zydua 0dyh 305 pahrana 0 zydua phiephieh a paraokei khai haw. Achhyna 0 mia 4 nata  Quarters mia 8 zydua chhao phie aparao pakei khai haw hra. Awnanopa Assembly Relief soh tawhta Quarters mia 4 nata achhyna 0 miakha zy deikua he May-June thlapa chhoh liata sa patlo thei chypa acha. Awnanopa sahlao 0dyh 305 zy hnohta chhao 0dyh dyhkha ta Ks. 90,000/- chyu deichhyna ta pie theipa ama cha. Ama field chakaotuhpa Pastor mo pa 3 cheingei ama yna su taihta thlahchhana hnei kheipata ama pie laihpa acha. Myahle achhyna O, Ngasaraikai achhyna O he, Myahle Quarter, Butitaung Quarter nata Tauchaungkyi Quarter nata Nahan Quarter zy deikua cha Relief soh ta miah a kadaih mah khao leipa vata sa thei mah leipa acha. Myahle Achhyna O he Sinpaulin dia pata amo tata sa eita apakhyna chata ama hmah ngala hai. Quarter chhao he amo tata pastor tlona chata a khaohrapata araokeina parohpazy padaihpakhyh pata ama sa hra.

Field Statistics duahmo

Sr No	Field moh	Missionaries	Natives Workers	Local/ cell	Odyh	Maluh	Apih pa	Athipa	Ngiapa thiehpa
1	Asho	3	8	7/2	85	579	2	1	28
2	Hlaytu	3	3	16/21	273	1440	3	1	5
3	Laymyo	–	12	19/10	455	3014	5	2	–
4	Myo-khami	3	10	16/8	141	863	3	1	1
5	Myo	5	9	21/17	394	2392	12	–	–
6	Office	4	–	1	4	19	–	–	–
	Total	18	42	80/58	1352	8325	25	5	34

Field Secretary zy report hnohchaipazy  liata achopata Statistics he taopa  a cha. Riapaihzy , thlihpi  nata khisa runahnazy vata apasiepasah lymapa duahmo cha ei ta ama maluh alaichadaina zie chhao ado paki theileipa a y holo tyh.