Mara Evangelical Church in America local church sâkha a châhrapa MEC Maryland ta February 23, 2019 noh ta taopa general meeting ta, 2019 chhô liata Hata eikha chhô Ahmâna (Biehrai achuna) hnei awpata parysa ta, cha meeting bie cha hriapazi pata July 1-7, 2019 noh liata Hata eikha chhô ahmâna hneipa acha.

Rev. Sikhaw cha ahmana liata Biehrai pachu awpata a hawpa achâpa hawta, ano chhao âchuna zy buakha siesai chypata MEC Maryland liata Hata eikha chhô chakaona a hnei. Abie pachupa tlâhpipa thokha zycha:

1. Ngiapâtuhpa zy ta Khazohpa hmotao theina ama hmô tyh (Abraha duahmo tawta mopazipa acha)
2. Khazohpa cha eima pôhpa liata a chyh chaipa sâbu hmâta a pahnopakipa achâ vâta eima peimawpa zydua a pahno. Eima ngiana daihti liata miah a pie lyma thlaha. Pachârô awpa châvei.
3. Ngiapâna nata tiamana – Eima ngiapâ khai ha tawta cha tapata y molo leipata tiama ta hriapasa awpa acha. Thathina hro he ngiapâna hro châ leipata, ngiapâtuhpa zy cha ngiapâna ta ama tiama awpa acha.
4. Ngiapâna cha achyh chaipazy chakaona he acha.

July 7, 2019 (Pahanoh) noh he Ahmâna pachhâ noh, Mara Biehrai Noh nata MEC Maryland a vaw duana ko 9 tlôna noh (July 4, 2010 nohta MEC Maryland paduapa acha), sa 3 ta pakaopata ahmâ noh châta, Rev. Sikhaw ta Mathai 4:4 “Khazohpa bie deita hrona acha” tapa biepipa hmâpata thatihpha bie reina ahnei.

Khazohpa cha Rev. Sikhaw hmâpata MEC Maryland liata a phualua ta Arônana â palâsa hmeisei. Hlaotlona byhna a pietuhpa Abeipa Zisu moh cha chhâzaw ta reithaipa ta y mawh sy.