Mara Evangelical Church, North Carolina cha MEC local church ama padua tawta ko 5 a pha na ta Khazohpa ama chhy nawpa O pha ngâsâpa, US dollar half million  hryupata October 19, 2018 noh ta ama chalei haw. Chyhsa malu 300 hlei atyu theipa achâ hleikhota, Office zy, Sunday school class room zy, akaona (fellowship) hall zy, biechhona (kitchen) room zy a ypâpa, Eka sa 9 a kawpa râh liata sapa Achhyna O acha.

MEC North Carolina cha Charlotte khipi liata a pahrapa Marasaw zyta Mara awnanopa padua awpata khopasana ama hneipa vâta Pupa Lezahmo (Lelaipi) O liata January 19, 2013 noh ta ama paduapa châta February 3, 2013 (Pahanoh) noh ta Pastor Chou Hlychho ta Local Church pahyna a hneipa acha.

Awnanopa malu 21 ta ama vaw paduapa local church cha Abeipa byhna piena vâta atanoh awnanopa malu 190 pha haw eita, a tahma hawta achhyna o hneitheina taita Khazohpa ta byhna a piepa awnanopa cha.

America râh liata MEC Local Church sa 8 yta, MEC North Carolina he Achhyna o a hnei tuachaipa Local Church acha. MEC North Carolina he Abeipa ta a khinarâh raihria liata hmâ via lyma mawh sy tapata marachurch.org ta khokheina eima hla.