September 2, 2016 noh ta paduapa Mara Evangelical Church in America,  Local Church sa (6) na, MEC Iowa pahyna ahmana cha April 16, 2017 (Pahanoh) noh, daw 1:00 -4:00 pm ta Open Bible Church, West Des Moines, IA liata hlaotlô kawpata MECA Church Council EC Meeting a vaw hlaopa awnanopa nopawzy nata hrua eihpa KTP, MEC Indiana zychhao ta arôna kawpata ahmapa acha.

Htp. Meipaw Aung Shwe (MEC Indiana) ta daihti sie kheita Rev. Chou Hlychho ta Local Chruch pahyna nata Zisu Thyuhei Noh biepipa “Athipa hryta ahropa” (Luka 24:5) hmapata thatihpha bie reina a hnei. Rev. Daniel T. Hietha ta MEC Iowa chhituhpazy châta thlachhana nata Pro. Pastor Caleb Ngochho ta vaituhpa thlachhana, Rev. Mara Hrato ta Abeipa Tlakhai chakaona ama hnei chyu.

Local Church pahyna a hma nawpa su, achhyna o pasai kawpata  a pahmapa Pastor Daniel (Church Pastor, Open Bible Church) ta MEC Iowa hmosai piepa a dao khai tawta alyna bie reina hneita a bie reipa chyhsa palô a pahnie ngasa. A bie reipa thokha zycha “Cha pahno vei na, châhrasala Khazohpa ta acha pahno ei. Namo chhaota Khazohpa nama pahno. Abeipa Zisu ngiapâna liata unaw nata sietano sai eima cha. A daihti atlô tita Abeipa hmiakô liata mopho, chipho pathluana y khao leipa awta, hmaokha ta Abeipa eima palyupali khai aw”.

KTP nata KHP Iowa zyta hla pyungia ngaitapa nata bievaopa reina ta, KTP, MEC Indiana ta hlapy, mo pakha hlasana nata praise & worship ta Abeipa palyupali eita, Abeipa rôhnahna ama palâsa hmeisei. Abeipa eima Khazohpa ta MEC Iowa he byhna pie sala Ano a pahno kheituhpa awnanopa ama châ thei lyma nawpata hrobi lyma bei mawh ei sy.

MEC Iowa pahyna liata a hlao theipa Abeipa kyhpachapa sawzy

Rev. Chou Hlychho MEC Iowa pahyna a hnei nga hai nopa

Krista vyuta lyuchapa KTP, MEC Indiana ta hlapy ta Abeipa ama reithai

Rev. Daniel T. Hietha ta Local church chhituhpazy chata byhna awna thlachhana a hnei

MEC Iowa tawta alyna hmosai piepa a dao khai tawta Pastor Daniel (Open Bible Church) ta alyna bie reina a hnei. Alyna bie areipa acho liata palâsapa acha.

MEC Iowa Pahyna hneina su (Open Bible Church, West Des Moines, IA)